പി.പി. ദിവ്യക്കെതിരെ വിജിലൻസ് നീക്കം ശക്തം; ബിനാമി കമ്പനി ആരോപണത്തിൽ 12 കോടിയുടെ ഫയലുകൾ കസ്റ്റഡിയിൽ

കണ്ണൂർ ജില്ലാ പഞ്ചായത്ത് മുൻ പ്രസിഡന്റ് പി.പി. ദിവ്യക്കെതിരായ അഴിമതി ആരോപണത്തിൽ അന്വേഷണം ശക്തമാക്കി വിജിലൻസ്. ദിവ്യയുടെ ബിനാമി കമ്പനിയെന്ന് ആരോപിക്കപ്പെടുന്ന 'കാർട്ടൺ ഇന്ത്യ അലയൻസ് പ്രൈവറ്റ് ലിമിറ്റഡ്' എന്ന സ്ഥാപനത്തിന് വിവിധ വികസന പദ്ധതികളുടെ കരാറുകൾ നൽകിയതുമായി ബന്ധപ്പെട്ട സുപ്രധാന ഫയലുകൾ വിജിലൻസ് സംഘം കസ്റ്റഡിയിലെടുത്തു. കണ്ണൂർ ജില്ലാ പഞ്ചായത്ത് ഓഫീസിൽ നേരിട്ടെത്തിയാണ് 12 കോടിയിലധികം രൂപയുടെ പദ്ധതികളുമായി ബന്ധപ്പെട്ട രേഖകൾ വിജിലൻസ് ശേഖരിച്ചത്.

മോഡുലാർ ടോയ്‌ലറ്റ് നിർമ്മാണം, തെരുവ് നായ നിയന്ത്രണത്തിനായുള്ള എ.ബി.സി (ABC) കേന്ദ്രത്തിന്റെ നിർമ്മാണം എന്നിവയടക്കം അഞ്ചോളം പ്രധാന പദ്ധതികളുടെ ഫയലുകളാണ് പിടിച്ചെടുത്തിട്ടുള്ളത്. പൊതുമേഖലാ സ്ഥാപനമായ 'സിൽക്ക്' (SILK) മുഖേനയാണ് കാർട്ടൺ ഇന്ത്യക്ക് ഈ കരാറുകൾ ലഭ്യമായത്. അതിനാൽ സിൽക്കിന്റെ പങ്കിനെക്കുറിച്ചും വരും ദിവസങ്ങളിൽ വിജിലൻസ് അന്വേഷണം നടക്കും. പിടിച്ചെടുത്ത ഫയലുകൾ വിശദമായി പരിശോധിച്ച ശേഷമായിരിക്കും അടുത്തഘട്ട നടപടികളിലേക്ക് കടക്കുക.

കഴിഞ്ഞ സർക്കാരിന്റെ കാലത്ത് കെ.എസ്.യു സംസ്ഥാന വൈസ് പ്രസിഡന്റ് മുഹമ്മദ് ഷമ്മാസാണ് ദിവ്യക്കെതിരെ അഴിമതിയും ബിനാമി ഇടപാടുകളും ആരോപിച്ച് വിജിലൻസിന് പരാതി നൽകിയത്. എന്നാൽ അന്ന് അന്വേഷണത്തിന് സർക്കാർ അനുമതി നൽകിയിരുന്നില്ല. തുടർന്ന് പുതിയ സർക്കാർ അധികാരത്തിലെത്തിയതോടെയാണ് കേസിൽ വിജിലൻസ് അന്വേഷണത്തിന് ഉത്തരവിട്ടത്. വിജിലൻസ് ഉത്തരമേഖലാ എസ്.പിക്കാണ് നിലവിൽ അന്വേഷണ ചുമതല. അതേസമയം, ജില്ലാ പഞ്ചായത്തിന്റെ കരാറുകൾ സുതാര്യമായ ഇ-ടെൻഡർ വഴിയാണ് സ്വന്തമാക്കിയതെന്നും ബിനാമി ആരോപണങ്ങൾ അടിസ്ഥാനരഹിതമാണെന്നുമാണ് കാർട്ടൺ ഇന്ത്യ അലയൻസ് അധികൃതരുടെ വിശദീകരണം.