മാസപ്പടി കേസിൽ ഇഡി കുരുക്ക് മുറുകുന്നു; പിണറായി വിജയനെതിരെ പാർട്ടിക്കുള്ളിൽ പടയൊരുക്കം

മാസപ്പടി കേസിൽ എൻഫോഴ്സ്മെന്റ് ഡയറക്ടറേറ്റ് (ഇഡി) പിടിമുറുക്കുന്നതോടെ, മുൻ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയനെതിരെ പാർട്ടിക്കുള്ളിൽ പ്രതിഷേധം ശക്തമാകുന്നു. തിരഞ്ഞെടുപ്പേറ്റ കനത്ത തിരിച്ചടിക്ക് കാരണം പിണറായിയുടെ നേതൃത്വമാണെന്ന ആക്ഷേപങ്ങൾക്ക് പിന്നാലെയാണ് ഇപ്പോൾ ഇഡി അന്വേഷണവും പാർട്ടിക്ക് വലിയ നാണക്കേടായി മാറിയിരിക്കുന്നത്.

അന്വേഷണ ഏജൻസികളുടെ നടപടികളിൽ നിന്ന് രക്ഷപ്പെടാനും സമയം നീട്ടി കിട്ടാനുമാണ് പിണറായി വിജയൻ പ്രതിപക്ഷ നേതൃസ്ഥാനം ചോദിച്ചു വാങ്ങിയതെന്ന ആക്ഷേപം ശക്തമാണ്. ഇപ്പോഴത്തെ സംഭവവികാസങ്ങൾ ഈ വാദത്തെ ശരിവെക്കുന്ന തരത്തിലാണ് മുന്നോട്ടു പോകുന്നത്. പിണറായി വിജയനും കുടുംബത്തിനും പുറമെ മുൻ മന്ത്രി മുഹമ്മദ് റിയാസിനെതിരെയും ഇഡി കള്ളപ്പണം വെളുപ്പിക്കൽ നിരോധന നിയമപ്രകാരം രണ്ട് ഇസിഐആറുകൾ രജിസ്റ്റർ ചെയ്തിട്ടുണ്ട്. വിജിലൻസ് കേസെടുത്തതിന്റെ തുടർച്ചയായാണ് ഈ കേന്ദ്ര ഏജൻസി നടപടി.

നേതാക്കൾക്കും അണികൾക്കും ഇടയിൽ ഈ വിഷയം വലിയ രീതിയിലുള്ള അമർഷത്തിന് കാരണമായിട്ടുണ്ട്. പിണറായി വിജയനിലൂടെ സിപിഎം വലിയ പ്രതിരോധത്തിലാകുകയാണെന്നും, ഇത് പാർട്ടിയെ നാശത്തിന്റെ വക്കിലേക്കാണ് നയിക്കുന്നതെന്നുമാണ് ഒരു വിഭാഗത്തിന്റെ അഭിപ്രായം. അന്വേഷണങ്ങളിൽ നിന്ന് രക്ഷപ്പെടാൻ പിണറായി നടത്തുന്ന ശ്രമങ്ങൾ പാർട്ടിയെ വൻ വില കൊടുക്കാൻ പ്രേരിപ്പിക്കുമെന്നും അണികൾ ആശങ്കപ്പെടുന്നു.