ഇവി വിപണി പിടിക്കാൻ മഹീന്ദ്ര: ഒറ്റച്ചാർജിൽ 600 കി.മീ ഓടും; മഹീന്ദ്രയുടെ 'ബി.ഇ. 07' പ്രീമിയം ഇലക്ട്രിക് എസ്‌യുവി ഇന്ത്യൻ റോഡുകളിൽ പരീക്ഷണയോട്ടത്തിൽ

ഇലക്ട്രിക് വാഹന വിപണിയിലെ സാന്നിധ്യം കൂടുതൽ ശക്തമാക്കാനൊരുങ്ങി മഹീന്ദ്ര ആൻഡ് മഹീന്ദ്ര. കമ്പനിയുടെ 'ബോൺ ഇലക്ട്രിക്' (Born Electric) ശ്രേണിയിൽ ഉൾപ്പെടുന്ന പുതിയ ബി.ഇ. 07 (BE.07) ഇലക്ട്രിക് എസ്‌യുവി ആദ്യമായി ഇന്ത്യൻ റോഡുകളിൽ പരീക്ഷണയോട്ടം നടത്തുന്ന ചിത്രങ്ങൾ പുറത്തുവന്നു. മുൻപ് കൺസെപ്റ്റ് മോഡലായി അവതരിപ്പിച്ചിരുന്ന ഈ വാഹനം ഇപ്പോൾ ഉൽപ്പാദനഘട്ടത്തോട് അടുക്കുകയാണെന്നാണ് റിപ്പോർട്ടുകൾ സൂചിപ്പിക്കുന്നത്.

BE.6-നേക്കാൾ വലിയ രൂപകൽപ്പന

മഹീന്ദ്രയുടെ ബി.ഇ. 6 മോഡലിനേക്കാൾ ഉയർന്ന ശ്രേണിയിലായിരിക്കും ബി.ഇ. 07 വിപണിയിലെത്തുക. വലിപ്പമേറിയതും ഉയർന്നതുമായ ബോഡി ഘടന വാഹനത്തിന് മികച്ച റോഡ് പ്രസൻസ് നൽകുന്നു. മഹീന്ദ്രയുടെ സി-ആകൃതിയിലുള്ള എൽ.ഇ.ഡി ഡേ ടൈം റണ്ണിങ് ലൈറ്റുകൾ, അതിനു താഴെയുള്ള ഹെഡ്‌ലാമ്പുകൾ, കരുത്തുറ്റ ഫ്രണ്ട് ബമ്പർ, പോപ്പ്-ഔട്ട് ഡോർ ഹാൻഡിലുകൾ, ഫ്രെയിംലെസ്സ് ഡോറുകൾ, വലിയ അലോയ് വീലുകൾ എന്നിവയാണ് പ്രധാന ബാഹ്യ സവിശേഷതകൾ.

അത്യാധുനിക ഫീച്ചറുകളും പ്രീമിയം ക്യാബിനും

ഔദ്യോഗിക വിവരങ്ങൾ പുറത്തുവന്നിട്ടില്ലെങ്കിലും മികച്ച സൗകര്യങ്ങളോടെയായിരിക്കും ഇന്റീരിയർ ഒരുക്കുക. വലിയ ഡിജിറ്റൽ സ്ക്രീനുകൾ അടങ്ങിയ ഡാഷ്ബോർഡ്, കണക്റ്റഡ് കാർ സാങ്കേതികവിദ്യ, വെന്റിലേറ്റഡ് ഫ്രണ്ട് സീറ്റുകൾ, ഡ്യുവൽ സോൺ ക്ലൈമറ്റ് കൺട്രോൾ, 360 ഡിഗ്രി ക്യാമറ, വയർലെസ് സ്മാർട്ട്ഫോൺ കണക്റ്റിവിറ്റി, പനോരമിക് ഗ്ലാസ് റൂഫ്, പ്രീമിയം ഓഡിയോ സിസ്റ്റം എന്നിവ വാഹനത്തിൽ പ്രതീക്ഷിക്കാം.

ബാറ്ററി ശേഷിയും ഡ്രൈവിങ് റേഞ്ചും

59 kWh, 70 kWh, 79 kWh എന്നിങ്ങനെ മൂന്ന് വ്യത്യസ്ത ബാറ്ററി പാക്കുകളിൽ ഈ എസ്‌യുവി ലഭ്യമായേക്കും. ഇതിൽ ഏറ്റവും ഉയർന്ന ബാറ്ററി പതിപ്പിന് ഒറ്റ ചാർജിൽ ഏകദേശം 600 കിലോമീറ്റർ വരെ സഞ്ചരിക്കാനാകുമെന്നാണ് റിപ്പോർട്ടുകൾ.

വിപണിയിലെത്തുന്നത് 2027-ൽ

2027-ന്റെ തുടക്കത്തിൽ ബി.ഇ. 07 വിപണിയിലെത്തുമെന്നാണ് പ്രതീക്ഷിക്കുന്നത്. 22 ലക്ഷം മുതൽ 28 ലക്ഷം രൂപ വരെ എക്സ്-ഷോറൂം വില പ്രതീക്ഷിക്കുന്ന ഈ മോഡൽ, വിപണിയിലെത്തിയാൽ ടാറ്റ ഹാരിയർ ഇ.വി (Tata Harrier EV) ഉൾപ്പെടെയുള്ള പ്രീമിയം ഇലക്ട്രിക് എസ്‌യുവികൾക്ക് ശക്തമായ എതിരാളിയാകും.