20-ാം വയസിൽ അൽഫോൺസ് പുത്രന്റെ ഓഫർ നിരസിച്ചു; കാരണം തുറന്നുപറഞ്ഞ് ജേസൺ സഞ്ജയ്

ചെന്നൈ: നടനും തമിഴ്നാട് മുഖ്യമന്ത്രിയുമായ വിജയിയുടെ മകൻ ജേസൺ സഞ്ജയ് സിനിമാലോകത്തേക്ക് സംവിധായകനായി അരങ്ങേറ്റം കുറിക്കാനൊരുങ്ങുകയാണ്. അദ്ദേഹത്തിന്റെ ആദ്യ സംവിധാന സംരംഭമായ 'സിഗ്മ'യുടെ വിശേഷങ്ങൾക്കിടെയാണ് സംവിധായകൻ അൽഫോൺസ് പുത്രൻ നൽകിയ അഭിനയാവസരം താൻ ഒരിക്കൽ നിരസിച്ചിരുന്നുവെന്ന് ജേസൺ വെളിപ്പെടുത്തിയത്.

ഒരു  മാസികയ്ക്ക് നൽകിയ അഭിമുഖത്തിലായിരുന്നു ജേസന്റെ തുറന്നുപറച്ചിൽ. ഏകദേശം 20 വയസുള്ളപ്പോൾ അൽഫോൺസ് പുത്രൻ തന്റെ ഒരു ചിത്രത്തിലെ കഥാപാത്രത്തിനായി തന്നെ പരിഗണിച്ചിരുന്നുവെന്ന് ജേസൺ പറഞ്ഞു. തന്റെ ചിത്രം കണ്ടാണ് സംവിധായകൻ സമീപിച്ചതെന്നും എന്നാൽ അന്ന് കാനഡയിൽ ഫിലിംമേക്കിങ് പഠിച്ചുകൊണ്ടിരുന്നതിനാൽ അഭിനയത്തെ കരിയറാക്കുന്നതിനെക്കുറിച്ച് ചിന്തിച്ചിരുന്നില്ലെന്നും അദ്ദേഹം വ്യക്തമാക്കി.

അൽഫോൺസ് പുത്രനെപ്പോലുള്ള താൻ ഏറെ ആരാധിക്കുന്ന സംവിധായകന്റെ കഥ കേട്ടശേഷം പിന്നീട് അഭിനയിക്കാൻ കഴിയില്ലെന്ന് പറയേണ്ട സാഹചര്യം സൃഷ്ടിക്കാനില്ലെന്നായിരുന്നു തന്റെ നിലപാടെന്നും അതിനാലാണ് കഥ പോലും കേൾക്കാതെ ഓഫർ വിനയപൂർവം നിരസിച്ചതെന്നും ജേസൺ പറഞ്ഞു. ആ കഥാപാത്രത്തിന് കൂടുതൽ അനുയോജ്യനായ മറ്റൊരാളെ കണ്ടെത്താൻ സംവിധായകനോട് നിർദേശിക്കുകയും ചെയ്തതായി അദ്ദേഹം കൂട്ടിച്ചേർത്തു.

"അൽഫോൺസ് പുത്രനെപ്പോലുള്ള പ്രതിഭാധനനായ സംവിധായകൻ എന്നെ പരിഗണിച്ചതുതന്നെ വലിയ അംഗീകാരമായാണ് ഞാൻ കാണുന്നത്. അത് എനിക്ക് അഭിമാനവും സന്തോഷവും നൽകുന്ന കാര്യമാണ്," ജേസൺ പറഞ്ഞു.

'സിഗ്മ സ്റ്റൈൽ' എന്ന പ്രൊമോഷണൽ ഗാനത്തിൽ അഭിനയിക്കുകയും നൃത്തം ചെയ്യുകയും ചെയ്തതിനെക്കുറിച്ചും ജേസൺ പ്രതികരിച്ചു. അത് സിനിമയുടെ ഭാഗമല്ലെന്നും ചിത്രത്തിന്റെ പ്രമേയവും ശൈലിയും പ്രേക്ഷകരിലേക്ക് എത്തിക്കാൻ ഒരുക്കിയ പ്രൊമോഷണൽ വീഡിയോ മാത്രമാണെന്നും അദ്ദേഹം പറഞ്ഞു.

"ഒരു സംവിധായകനെന്ന നിലയിൽ സെറ്റിൽ നടന്മാർക്ക് രംഗങ്ങൾ വിശദീകരിക്കുമ്പോൾ ഉള്ളിലെ നടനും പുറത്തുവരും. എന്നാൽ ഇപ്പോൾ എന്റെ മുഴുവൻ ശ്രദ്ധയും 'സിഗ്മ' മികച്ച രീതിയിൽ റിലീസ് ചെയ്ത് വിജയിപ്പിക്കുന്നതിലാണ്. ചിത്രം പുറത്തിറങ്ങിയ ശേഷമേ അഭിനയത്തിൽ കൂടുതൽ ശ്രദ്ധിക്കണോ, സംവിധാനത്തിൽ തന്നെ തുടരണോ എന്ന കാര്യത്തിൽ തീരുമാനമെടുക്കൂ," ജേസൺ വ്യക്തമാക്കി.

സന്ദീപ് കിഷനും ഫരിയ അബ്ദുള്ളയും പ്രധാന കഥാപാത്രങ്ങളെ അവതരിപ്പിക്കുന്ന 'സിഗ്മ' ജൂലൈ 31-ന് റിലീസ് ചെയ്യാനായിരുന്നു ആദ്യം തീരുമാനിച്ചിരുന്നത്. എന്നാൽ വിജയ് നായകനാകുന്ന 'ജന നായകൻ' റിലീസ് ചെയ്യുന്ന സാഹചര്യത്തിൽ ചിത്രത്തിന്റെ റിലീസ് ഓഗസ്റ്റിലേക്ക് മാറ്റിയേക്കുമെന്നാണ് റിപ്പോർട്ടുകൾ.