തമിഴ് സിനിമയിലെന്നല്ല, തെന്നിന്ത്യൻ സിനിമയിൽ തന്നെ സമീപകാലത്ത് ഏറ്റവും വലിയ പ്രീ-റിലീസ് ഹൈപ്പോടെ എത്തിയ ചിത്രമാണ് 'ജയിലർ 2'. 2023-ൽ പുറത്തിറങ്ങിയ ചിത്രത്തിന്റെ ആദ്യ ഭാഗം സമ്മാനിച്ച വിജയമാണ് ഇതിന് പ്രധാന കാരണം. ബഹുഭാഷാ താരങ്ങളുടെ കാമിയോ വേഷങ്ങൾ, വിനായകന്റെ വില്ലൻ പ്രകടനം, നെൽസന്റെ സംവിധാനം, അനിരുദ്ധിന്റെ സംഗീതം എന്നിവയെല്ലാം ആദ്യ ഭാഗത്തിന്റെ വിജയത്തിൽ നിർണായക പങ്കുവഹിച്ചിരുന്നു. ഈ ഘടകങ്ങളെല്ലാം ഒത്തിണങ്ങി വന്നപ്പോൾ ചിത്രം വലിയൊരു മാസ് ഹിറ്റായി മാറുകയും ചെയ്തു. ഈ വിജയം നൽകിയ ആത്മവിശ്വാസത്തിലാണ് രണ്ടാം ഭാഗം ഇപ്പോൾ തിയേറ്ററുകളിലേക്ക് എത്തുന്നത്.
ബുക്കിങ് പ്ലാറ്റ്‌ഫോമായ 'ബുക്ക് മൈ ഷോ' (BookMyShow) വഴി വൻ കുതിപ്പാണ് ചിത്രം കാഴ്ചവെക്കുന്നത്. മണിക്കൂറിൽ ഏറ്റവുമധികം ടിക്കറ്റുകൾ വിൽക്കുന്ന രണ്ടാമത്തെ തമിഴ് ചിത്രം എന്ന നേട്ടമാണ് ജയിലർ 2 സ്വന്തമാക്കിയിരിക്കുന്നത്. ചിത്രത്തിന്റെ ആദ്യ പ്രദർശനങ്ങൾക്ക് ശേഷം ഉച്ചയ്ക്ക് 1 മണി മുതൽ 2 മണി വരെയുള്ള സമയത്താണ് റെക്കോഡ് ബുക്കിങ് രേഖപ്പെടുത്തിയതെന്ന് പ്രമുഖ ട്രാക്കർമാരായ സാക്നിൽക് വ്യക്തമാക്കുന്നു. ഈ സമയത്ത് 76,350 ടിക്കറ്റുകളാണ് ബുക്ക് മൈ ഷോയിലൂടെ വിറ്റുപോയത്. വിജയ് നായകനായ 2023 ലെ ചിത്രം 'ലിയോ' ആണ് ഈ പട്ടികയിൽ ഒന്നാം സ്ഥാനത്ത് (82,400 ടിക്കറ്റുകൾ). രജനികാന്തിന്റെ തന്നെ 'കൂലി' മൂന്നാം സ്ഥാനത്തും (60,170), ആദ്യ ഭാഗമായ 'ജയിലർ' നാലാം സ്ഥാനത്തുമാണ് (59,240).
മോഹൻലാൽ അടക്കമുള്ള പ്രമുഖർ അതിഥിതാരങ്ങളായും വിവിധ ഭാഷകളിൽ നിന്നുള്ളവർ പ്രധാന കഥാപാത്രങ്ങളായും എത്തുന്നതിനാൽ ചിത്രത്തിന് വലിയ പാൻ-ഇന്ത്യൻ അപ്പീലാണുള്ളത്. സൺ പിക്ചേഴ്സ് നിർമ്മിച്ചിരിക്കുന്ന ചിത്രത്തിന് കേരളത്തിലും മികച്ച ബുക്കിങ് ആണ് ലഭിച്ചിരിക്കുന്നത്. വൻ ഓപ്പണിങ്ങോടെ ചിത്രം ബോക്സ് ഓഫീസിൽ ചരിത്രം കുറിക്കുമെന്ന പ്രതീക്ഷയിലാണ് ആരാധകരും സിനിമ ലോകവും.
ബുക്ക് മൈ ഷോയിൽ ചരിത്രമെഴുതി 'ജയിലർ 2'; മണിക്കൂറിൽ ഏറ്റവുമധികം ടിക്കറ്റുകൾ വിൽക്കുന്ന രണ്ടാമത്തെ തമിഴ് ചിത്രം
Jaihind TV News Report
Jaihind TV Web Desk
2 min read
77 reads
