ജറുസലേം: ഇസ്രായേല്‍ രാഷ്ട്രീയത്തില്‍ വലിയ മാറ്റങ്ങള്‍ക്ക് വഴിയൊരുക്കിക്കൊണ്ട്, രാജ്യത്തിന്റെ അടുത്ത സര്‍ക്കാര്‍ രൂപീകരണത്തിനായി മുന്‍ സൈനിക മേധാവിയും യഷാര്‍ പാര്‍ട്ടി നേതാവുമായ ഗാദി ഐസന്‍കോട്ടിനെ ഇസ്രായേല്‍ പ്രസിഡന്റ് ഐസക് ഹെര്‍സോഗ് ചുമതലപ്പെടുത്തി. പൊതുതെരഞ്ഞെടുപ്പില്‍ ഒരു കക്ഷിക്കും വ്യക്തമായ ഭൂരിപക്ഷം ലഭിക്കാതിരുന്ന പശ്ചാത്തലത്തിലാണ് ദീര്‍ഘകാലം പ്രധാനമന്ത്രിയായിരുന്ന ബെഞ്ചമിന്‍ നെതന്യാഹുവിനെ മറികടന്ന് ഐസന്‍കോട്ടിന് പ്രസിഡന്റിന്റെ ക്ഷണം ലഭിച്ചത്.
120 അംഗ കനെസ്സെറ്റിലെ (പാര്‍ലമെന്റ്) 67 എം.പിമാരുടെ പിന്തുണ ഉറപ്പാക്കാന്‍ ഐസന്‍കോട്ടിന് സാധിച്ചു. അതേസമയം നെതന്യാഹുവിന് 46 എം.പിമാരുടെ പിന്തുണ മാത്രമാണ് ലഭിച്ചത്. ചേഞ്ച് ബ്ലോക്കിലെ 48 അംഗങ്ങളും റാം പാര്‍ട്ടിയുടെ 7 അംഗങ്ങളും ജോയിന്റ് ലിസ്റ്റിന്റെ 12 അംഗങ്ങളും അടങ്ങുന്നതാണ് ഐസന്‍കോട്ടിനെ പിന്തുണയ്ക്കുന്ന സഖ്യം. സഖ്യസര്‍ക്കാര്‍ രൂപീകരിച്ച് ഭൂരിപക്ഷം തെളിയിക്കാന്‍ ഐസന്‍കോട്ടിന് 28 ദിവസത്തെ സമയം ലഭിക്കും. ജറുസലേമിലെ പ്രസിഡന്റിന്റെ വസതിയില്‍ വെച്ചാണ് ഔദ്യോഗിക ചുമതല കൈമാറ്റം.
ഗാസ യുദ്ധം, ദേശീയ സുരക്ഷ എന്നിവയില്‍ നെതന്യാഹുവിന്റെ നയങ്ങളെ കടുത്ത രീതിയില്‍ എതിര്‍ത്ത നേതാവാണ് ഐസന്‍കോട്ട്. മുന്‍പ് ഹമാസ് ആക്രമണത്തിന് ശേഷം രൂപീകരിച്ച യുദ്ധകാല മന്ത്രിസഭയിലും അദ്ദേഹം പ്രവര്‍ത്തിച്ചിരുന്നു. പുതിയ സര്‍ക്കാര്‍ രൂപീകരിക്കാന്‍ സാധിച്ചാല്‍, പശ്ചിമേഷ്യന്‍-ഉത്തരാഫ്രിക്കന്‍ വേരുകളുള്ള ഇസ്രായേലിന്റെ ആദ്യ പ്രധാനമന്ത്രിയായി ഗാദി ഐസന്‍കോട്ട് ചരിത്രത്തില്‍ ഇടംപിടിക്കും.
നെതന്യാഹുവിന് തിരിച്ചടി: പുതിയ സര്‍ക്കാര്‍ രൂപീകരിക്കാന്‍ ഗാദി ഐസന്‍കോട്ടിനെ ചുമതലപ്പെടുത്തി പ്രസിഡന്റ്
Jaihind TV News Report
Jaihind TV Web Desk
2 min read
63 reads
