ന്യൂയോര്ക്ക്: പ്രമുഖ എഐ ചാറ്റ്ബോട്ടായ 'ക്ലോഡിന്റെ' നിര്മ്മാതാക്കളായ ആന്ത്രോപിക് ഓഹരി വിപണിയില് ചരിത്രപരമായ അരങ്ങേറ്റം കുറിച്ചു. വ്യാഴാഴ്ച നാസ്ഡാക്കില് ലിസ്റ്റ് ചെയ്തതോടെ കമ്പനിയുടെ വിപണി മൂല്യം രണ്ട് ലക്ഷം കോടി ഡോളറായി കുതിച്ചുയര്ന്നു. ഇതോടെ ഇലോണ് മസ്കിന്റെ സ്പേസ് എക്സിനെ മറികടന്ന ആന്ത്രോപിക്, ഒരു ടെക്നോളജി കമ്പനി നടത്തുന്ന ചരിത്രത്തിലെ ഏറ്റവും വലിയ ഓഹരി വിപണി അരങ്ങേറ്റമെന്ന റെക്കോര്ഡും സ്വന്തമാക്കി.
ഓഹരി ഒന്നിന് 83 ഡോളറായിരുന്നു പ്രാരംഭ ഓഹരി വില്പ്പന വിലയെങ്കിലും വിപണിയില് വ്യാപാരം ആരംഭിച്ചപ്പോള് തന്നെ ഇത് ഏകദേശം 34 ശതമാനം ഉയര്ന്ന് 111.50 ഡോളറിലെത്തി. പിന്നീട് 108.72 ഡോളറിലാണ് വ്യാപാരം തുടര്ന്നത്. പൊതുവിപണിയില് എത്തുന്ന ലോകത്തിലെ ആദ്യത്തെ മുന്നിര എഐ കമ്പനിയാണ് ആന്ത്രോപിക്. എഐ മേഖലയിലെ വന് നിക്ഷേപങ്ങള് ലാഭകരമാകുമോ എന്ന ആശങ്കകള് നിലനില്ക്കുന്നതിനിടയിലും നിക്ഷേപകരില് നിന്ന് ലഭിച്ച വന് സ്വീകാര്യത ടെക് ലോകത്തിന് വലിയ ആശ്വാസമാണ് നല്കുന്നത്.
70 മുതല് 78 ഡോളര് വരെയായിരുന്നു ആദ്യം നിശ്ചയിച്ചിരുന്ന ഓഹരി വിലയെങ്കിലും ആവശ്യക്കാര് ഏറിയതോടെ 83 ഡോളറിലേക്ക് ഉയര്ത്തുകയായിരുന്നു. 98 കോടി ഓഹരികളാണ് കമ്പനി വിറ്റഴിച്ചത്. പ്രൈവറ്റ് പ്ലേസ്മെന്റിലൂടെ സമാഹരിച്ച 26 ബില്യണ് ഡോളര് ഉള്പ്പെടെ ആകെ 107 ബില്യണ് ഡോളറിലധികം മൂലധനം സമാഹരിക്കാന് കമ്പനിക്ക് സാധിച്ചു. എഎംഡി (AMD), ബ്രോഡ്കോം, ഗൂഗിളിന്റെ മാതൃകമ്പനിയായ ആല്ഫബെറ്റ്, മൈക്രോണ്, മൈക്രോസോഫ്റ്റ്, എന്വിഡിയ, ടി.എസ്.എം.സി തുടങ്ങിയ പ്രമുഖ ടെക് ഭീമന്മാരും ആന്ത്രോപിക്കില് നിക്ഷേപം നടത്തിയിട്ടുണ്ട്. ഇതോടെ മൈക്രോസോഫ്റ്റ്, ആപ്പിള്, എന്വിഡിയ എന്നിവയ്ക്കൊപ്പം ലോകത്തിലെ ഏറ്റവും മൂല്യമുള്ള കമ്പനികളുടെ പട്ടികയിലും ആന്ത്രോപിക് ഇടംപിടിച്ചു.
ഐപിഒ വില അടിസ്ഥാനമാക്കിയാല്, കമ്പനിയില് ഏകദേശം 10 ശതമാനം ഓഹരി പങ്കാളിത്തമുള്ള സിഇഒ ഡാരിയോ അമോദെയ്ക്കും മറ്റ് ആറ് സഹസ്ഥാപകര്ക്കും കൂടി ഏകദേശം 150 ബില്യണ് ഡോളറിന്റെ ആസ്തിയാണുള്ളത്. കൂടാതെ, കമ്പനിയിലെ ആദ്യകാല ഗവേഷകര്, എഞ്ചിനീയര്മാര്, മറ്റ് ജീവനക്കാര് എന്നിവരില് നിന്ന് ആയിരക്കണക്കിന് കോടീശ്വരന്മാരും നിരവധി ശതകോടീശ്വരന്മാരും സൃഷ്ടിക്കപ്പെടുമെന്നാണ് വിലയിരുത്തപ്പെടുന്നത്. 2027-ല് ഓഹരി വിപണിയിലേക്ക് എത്താന് ഒരുങ്ങുന്ന എതിരാളികളായ ഓപ്പണ് എഐക്കും ആന്ത്രോപിക്കിന്റെ ഈ പ്രകടനം വലിയൊരു മാനദണ്ഡമായി മാറും.
വിപണിയില് വന് മുന്നേറ്റമുണ്ടാക്കിയെങ്കിലും എഐ മേഖലയിലെ വളര്ച്ച ഒരു 'കുമിള' മാത്രമാണോ എന്ന ചര്ച്ചകളും സജീവമാണ്. ഡാറ്റാ സെന്ററുകള്ക്കും കമ്പ്യൂട്ടിംഗ് അടിസ്ഥാന സൗകര്യങ്ങള്ക്കുമായി ചെലവഴിക്കുന്ന ഭീമമായ തുകയ്ക്ക് ആനുപാതികമായ ലാഭം തിരിച്ചുപിടിക്കാന് കഴിയുമോ എന്നതില് പല നിക്ഷേപകര്ക്കും ആശങ്കയുണ്ട്. എഐ കമ്പനികളും ചിപ്പ് നിര്മ്മാതാക്കളും ക്ലൗഡ് സേവനദാതാക്കളും തമ്മിലുള്ള പരസ്പര നിക്ഷേപ ഇടപാടുകളാണ് ഈ വളര്ച്ചയ്ക്ക് പിന്നിലെന്നും വിമര്ശനമുയരുന്നുണ്ട്.
സാമ്പത്തിക വെല്ലുവിളികള്ക്ക് പുറമെ, അതിവേഗം വളരുന്ന എഐ സംവിധാനങ്ങളെ നിയന്ത്രിക്കുന്നതിലും നിരീക്ഷിക്കുന്നതിലും നേരിടുന്ന വെല്ലുവിളികളെക്കുറിച്ച് ആന്ത്രോപിക് തന്നെ തങ്ങളുടെ ഐപിഒ രേഖകളില് മുന്നറിയിപ്പ് നല്കിയിട്ടുണ്ട്.
ചരിത്രനേട്ടവുമായി ആന്ത്രോപിക്; ഓഹരി വിപണി അരങ്ങേറ്റത്തില് മൂല്യം രണ്ട് ലക്ഷം കോടി ഡോളറിലെത്തി, സ്പേസ് എക്സിനെ മറികടന്നു