80ാം സ്വാതന്ത്ര്യദിനാഘോഷ നിറവിൽ രാജ്യം; ചെങ്കോട്ടയിൽ ചരിത്രത്തിലാദ്യമായി വന്ദേമാതരം, ദേശീയപതാക ഉയർത്തി പ്രധാനമന്ത്രി നരേന്ദ്ര മോദി

ന്യൂഡൽഹി: 80ാം സ്വാതന്ത്ര്യദിനാഘോഷത്തിന്റെ നിറവിൽ രാജ്യം. പ്രധാനമന്ത്രി നരേന്ദ്ര മോദി ചെങ്കോട്ടയിൽ ദേശീയപതാക ഉയർത്തി. ചരിത്രത്തിലാദ്യമായി ചെങ്കോട്ടയിലെ സ്വാതന്ത്ര്യദിനാഘോഷ ചടങ്ങിൽ വന്ദേമാതരം ആലപിച്ചു.

ധീര സ്വാതന്ത്ര്യസമര സേനാനികൾക്ക് ആദരമർപ്പിച്ചുകൊണ്ടാണ് പ്രധാനമന്ത്രി രാജ്യത്തെ അഭിസംബോധന ചെയ്ത് പ്രസംഗം ആരംഭിച്ചത്. രാജ്യത്തിന്റെ എല്ലാ മനസുകളിലും വന്ദേമാതരം മുഴങ്ങുന്നുവെന്ന് പ്രധാനമന്ത്രി പറഞ്ഞു.

പുത്തൻ പ്രതീക്ഷകളുമായാണ് ഇന്ത്യ മുന്നേറുന്നതെന്ന് പ്രധാനമന്ത്രി വ്യക്തമാക്കി. ലക്ഷ്യങ്ങൾ പൂർത്തീകരിക്കാനുള്ള യാത്രയിലാണ് രാജ്യം. ഈ യാത്ര സഫലമാകുമെന്നും സ്വപ്നങ്ങൾ യാഥാർഥ്യമാകുമെന്നും അദ്ദേഹം പറഞ്ഞു. വികസിത ഭാരതം എന്ന ലക്ഷ്യത്തിലേക്ക് 2047 വരെ ഇനിയും നിരവധി നേട്ടങ്ങൾ കൈവരിക്കാനുണ്ടെന്നും വലിയ ലക്ഷ്യങ്ങൾ സാക്ഷാത്കരിക്കാൻ രാജ്യത്തിന് കഴിയുമെന്നും പ്രധാനമന്ത്രി കൂട്ടിച്ചേർത്തു.
 
കഴിഞ്ഞ 12 വർഷമായി ദൃഢനിശ്ചയത്തോടെ രാജ്യം മുന്നേറുകയാണെന്ന് പ്രധാനമന്ത്രി പറഞ്ഞു. ദുർബലമായിരുന്ന സമ്പദ്‌വ്യവസ്ഥയിൽ നിന്ന് ഇന്ത്യ ലോകശക്തിയായി മാറി. സാങ്കേതികവിദ്യാ രംഗത്ത് വിപ്ലവകരമായ മാറ്റങ്ങൾ സൃഷ്ടിക്കാനായി. ഡിജിറ്റൽ മേഖലയിലും വലിയ മുന്നേറ്റമുണ്ടായതായി അദ്ദേഹം ചൂണ്ടിക്കാട്ടി.

ദാരിദ്ര്യനിർമാർജനമെന്ന ലക്ഷ്യത്തിലും രാജ്യം മുന്നേറുകയാണെന്ന് പ്രധാനമന്ത്രി പറഞ്ഞു. കാലഹരണപ്പെട്ട നിരവധി നിയമങ്ങൾ ഒഴിവാക്കുകയും നിയമവ്യവസ്ഥ കൂടുതൽ ശക്തവും സുതാര്യവുമാക്കുകയും ചെയ്തു. എല്ലാവർക്കും അടിസ്ഥാന സൗകര്യങ്ങൾ ഉറപ്പാക്കുകയെന്ന ലക്ഷ്യവും സാക്ഷാത്കരിക്കാനായെന്ന് അദ്ദേഹം വ്യക്തമാക്കി.

സ്വയംപര്യാപ്തത പൂർണ അർഥത്തിൽ യാഥാർഥ്യമാക്കുകയാണ് ഇനി ലക്ഷ്യമെന്ന് പ്രധാനമന്ത്രി പറഞ്ഞു. ഇതിനായി രാജ്യത്തിന്റെ കാര്യക്ഷമത വർധിപ്പിക്കണം. മറ്റുരാജ്യങ്ങളെ ആശ്രയിക്കേണ്ട സാഹചര്യം ഒഴിവാക്കി വിവിധ മേഖലകളിൽ ഇന്ത്യയ്ക്ക് സ്വന്തം ശക്തിയിൽ മുന്നേറാൻ കഴിയണമെന്നും അദ്ദേഹം പറഞ്ഞു.

കഴിഞ്ഞ 12 വർഷത്തിനിടെ ഡിജിറ്റൽ ഇടപാടുകൾ നിരവധി മടങ്ങ് വർധിച്ചു. സെമികണ്ടക്ടർ മേഖലയിലും ഇന്ത്യ വലിയ മുന്നേറ്റം കൈവരിച്ചു. ഇന്റർനെറ്റ് ഉപയോക്താക്കളുടെ എണ്ണം നാലിരട്ടിയായി വർധിച്ചതായും പ്രധാനമന്ത്രി പറഞ്ഞു.

രാജ്യത്ത് മൂന്ന് സെമികണ്ടക്ടർ പ്ലാന്റുകൾ യാഥാർഥ്യമാക്കാൻ കഴിഞ്ഞു. ആണവോർജ മേഖലയിലും ഇന്ത്യ സ്വന്തം ശക്തി നേടിയതായി പ്രധാനമന്ത്രി വ്യക്തമാക്കി.