തമിഴ്നാട്ടിലെ വാല്പ്പാറയിലുണ്ടായ ദാരുണമായ വാഹനാപകടത്തില് ഒന്പത് പേര് മരണപ്പെട്ട സംഭവത്തില് പ്രതിപക്ഷ നേതാവ് വി.ഡി. സതീശന് അനുശോചിച്ചു. മലപ്പുറം പാങ്ങ് ചേണ്ടി പാറമ്മല് എല്.പി സ്കൂളിലെ അധ്യാപകരും ജീവനക്കാരും സഞ്ചരിച്ച വാഹനം അപകടത്തില്പ്പെട്ട വാര്ത്ത ഏറെ വേദനാജനകമാണെന്ന് അദ്ദേഹം പറഞ്ഞു.
പൊള്ളാച്ചി-വാല്പ്പാറ റോഡില് വെച്ചുണ്ടായ ഈ അപകടം കേരളത്തെയാകെ നടുക്കുന്നതാണെന്ന് അദ്ദേഹം പ്രസ്താവനയില് വ്യക്തമാക്കി. അപകടത്തില്പ്പെട്ടവര്ക്കും അവരുടെ കുടുംബങ്ങള്ക്കും ആവശ്യമായ എല്ലാ സഹായങ്ങളും ഉറപ്പാക്കണമെന്നും അദ്ദേഹം ആവശ്യപ്പെട്ടു.
പ്രതിപക്ഷ നേതാവിന്റെ പ്രസ്താവനയുടെ പൂര്ണ്ണരൂപം:
വളരെ ദുഃഖകരവും വേദനാജനകവുമായ വാര്ത്തയാണ് വാല്പ്പറയില് നിന്നും വരുന്നത്. മലപ്പുറം പാങ് ചേണ്ടി പാറമ്മല് എല്.പി സ്കൂളിലെ അധ്യാപകരുടെ സംഘമാണ് പൊള്ളാച്ചി- വാല്പ്പാറ റോഡില് അപകടത്തില്പ്പെട്ടത്. ഒന്പത് പേര്ക്ക് ജീവന് നഷ്ടമായെന്നാണ് ഇപ്പോള് പുറത്ത് വന്ന വിവരം. പരിക്കേറ്റവര് പൊള്ളാച്ചി, കോയമ്പത്തൂര് ആശുപത്രികളില് ചികിത്സയിലാണ്. പരിക്കേറ്റവര് എത്രയും വേഗം സുഖം പ്രാപിക്കട്ടെ. മരണപ്പെട്ടവര്ക്ക് ആദരാഞ്ജലികള്. കുടുംബാംഗങ്ങളുടെ ദുഃഖത്തില് പങ്കുചേരുന്നു.
