തൃപ്പൂണിത്തുറ: കേരളത്തില്‍ ഓണാഘോഷങ്ങള്‍ക്ക് ഔദ്യോഗികമായി തുടക്കം കുറിച്ചുകൊണ്ട് പ്രശസ്തമായ തൃപ്പൂണിത്തുറ അത്തച്ചമയ ഘോഷയാത്ര ഇന്ന് നടക്കും. ഓഗസ്റ്റ് 25 വരെ നീണ്ടുനില്‍ക്കുന്ന വിപുലമായ അത്താഘോഷ പരിപാടികള്‍ക്കാണ് രാജനഗരിയില്‍ ഇന്ന് തുടക്കമാകുന്നത്. രാവിലെ 9-ന് തൃപ്പൂണിത്തുറ ഗവ. ബോയ്‌സ് ഹയര്‍ സെക്കന്‍ഡറി സ്‌കൂള്‍ മൈതാനിയില്‍ നടക്കുന്ന ചടങ്ങില്‍ മുഖ്യമന്ത്രി വി.ഡി. സതീശന്‍ അത്താഘോഷ പരിപാടികളുടെ ഉദ്ഘാടനം നിര്‍വ്വഹിക്കും. ദീപക് ജോയ് എം.എല്‍.എ അധ്യക്ഷത വഹിക്കുന്ന ചടങ്ങില്‍ മന്ത്രി അനൂപ് ജേക്കബ് അത്തപ്പതാക ഉയര്‍ത്തും.
ഹൈബി ഈഡന്‍ എം.പി., അഡ്വ. ഫ്രാന്‍സിസ് ജോര്‍ജ് എം.പി., ജില്ലാ കളക്ടര്‍ ജി. പ്രിയങ്ക തുടങ്ങിയവര്‍ ചടങ്ങില്‍ മുഖ്യാതിഥികളാകും. ഉദ്ഘാടന ചടങ്ങുകള്‍ക്ക് ശേഷം പ്രശസ്ത സിനിമാതാരം മനോജ് കെ. ജയന്‍ വര്‍ണ്ണാഭമായ അത്തച്ചമയ ഘോഷയാത്ര ഫ്‌ലാഗ് ഓഫ് ചെയ്യും. കേരളത്തിന്റെ സാംസ്‌കാരിക പൈതൃകവും വൈവിധ്യമാര്‍ന്ന നാടന്‍ കലാരൂപങ്ങളും വിളിച്ചോതുന്ന നിശ്ചലദൃശ്യങ്ങളും അണിനിരക്കുന്ന ഘോഷയാത്ര കാണാന്‍ പതിനായിരക്കണക്കിന് ആളുകളാണ് തൃപ്പൂണിത്തുറയിലേക്ക് ഒഴുകിയെത്തുന്നത്.
ഓണത്തിന് കൊടിയേറി; വര്‍ണ്ണപ്പകിട്ടാര്‍ന്ന തൃപ്പൂണിത്തുറ അത്തച്ചമയ ഘോഷയാത്ര ഇന്ന്; മുഖ്യമന്ത്രി ഉദ്ഘാടനം ചെയ്യും
Jaihind TV News Report
Jaihind TV Web Desk
Updated Oct 12, 2026
2 min read
668 reads
