പയ്യന്നൂരിലെ രാഷ്ട്രീയ അക്രമസംഭവങ്ങളിലും തിരഞ്ഞെടുപ്പ് വിഷയങ്ങളിലും കണ്ണൂർ ജില്ലാ സെക്രട്ടറി കെ.കെ. രാഗേഷ് നടത്തിയ തുറന്നുപറച്ചിലുകളും വെല്ലുവിളികളും സി.പി.എമ്മിനെ കൂടുതൽ പ്രതിരോധത്തിലാക്കുന്നു. പയ്യന്നൂർ ഡിവൈഎസ്പി ഓഫീസിലേക്ക് നടന്ന മാർച്ച് ഉദ്ഘാടനം ചെയ്ത് സംസാരിക്കവെ, "വെറുമൊരു ഷെഡ് മാത്രമല്ല, അതിനടിയിലുള്ളതും മാന്തിയെടുക്കാൻ ശേഷിയുള്ള പ്രസ്ഥാനമാണിത്" എന്ന പ്രകോപനപരമായ പ്രസ്താവനയാണ് പാർട്ടിക്കുള്ളിലും പുറത്തും വലിയ ചർച്ചയായിരിക്കുന്നത്. ഇതിന് പുറമെ, പയ്യന്നൂർ മണ്ഡലത്തിലെ സ്ഥാനാർത്ഥിയായിരുന്ന ടി.ഐ. മധുസൂദനനെ മാറ്റാതിരുന്നത് രാഷ്ട്രീയ എതിരാളികളുടെ ആരോപണങ്ങൾ ശരിയാണെന്ന് വ്യാഖ്യാനിക്കാതിരിക്കാനാണെന്ന രാഗേഷിന്റെ പരാമർശവും വിവാദങ്ങൾക്ക് വഴിവെച്ചു. ആരോപണങ്ങളുടെ പുകമറ നിലനിൽക്കുമ്പോൾ ജനങ്ങളെ കാര്യങ്ങൾ ബോധ്യപ്പെടുത്താൻ സമയമില്ലാതിരുന്നതുകൊണ്ടാണ് സ്ഥാനാർത്ഥിയെ മാറ്റാതിരുന്നതെന്നും, ഒരു തിരഞ്ഞെടുപ്പ് തോറ്റതുകൊണ്ട് പയ്യന്നൂരിലെ പാർട്ടി ഒലിച്ചുപോകില്ലെന്നും അദ്ദേഹം കൂട്ടിച്ചേർത്തു. എന്നാൽ ജില്ലാ സെക്രട്ടറിയുടെ ഇത്തരം പ്രസംഗങ്ങൾ അണികൾക്കിടയിൽ തെറ്റായ സന്ദേശം നൽകുമെന്ന ആശങ്ക മുതിർന്ന നേതാക്കൾക്കുണ്ട്.
പയ്യന്നൂർ മേഖലയിലുണ്ടായ വിവിധ രാഷ്ട്രീയ സംഘർഷങ്ങളുമായി ബന്ധപ്പെട്ട അന്വേഷണം സി.പി.എം പ്രവർത്തകരിലേക്ക് നീളുന്നത് നേതൃത്വത്തിൽ വലിയ ആശങ്ക സൃഷ്ടിച്ചിട്ടുണ്ട്. സി.പി.എം വെള്ളൂർ ലോക്കൽ കമ്മിറ്റി അംഗം വി.കെ. കൃഷ്ണന്റെ വീട്ടിലെ പച്ചക്കറികളും ചെടികളും നശിപ്പിച്ച സംഭവത്തിൽ, പരാതിക്കാരന്റെ മരുമകനായ ജുബീഷാണ് പ്രതിയെന്ന് വ്യക്തമാക്കി പോലീസ് കോടതിയിൽ അന്വേഷണ റിപ്പോർട്ട് സമർപ്പിച്ചതാണ് പാർട്ടിയെ കൂടുതൽ ഞെട്ടിച്ചിരിക്കുന്നത്. സംഭവത്തിന് പിന്നിൽ സ്വന്തം പ്രവർത്തകരും ബന്ധുക്കളുമാണെന്ന് വ്യക്തമായത് പാർട്ടിയുടെ വാദങ്ങളുടെ മുനയൊടിച്ചു. പയ്യന്നൂരിലെ മറ്റ് അക്രമ സംഭവങ്ങളിലും അന്വേഷണം പുരോഗമിക്കുന്നതിനിടെ കൂടുതൽ പ്രവർത്തകർ പ്രതിപ്പട്ടികയിൽ ഉൾപ്പെടുമോ എന്ന ഭയത്തിലാണ് പ്രാദേശിക നേതൃത്വം.
