കേരള പോലീസ് സ്പോർട്സ് ചുമതലയിൽ മാറ്റം: എഡിജിപി അജിത് കുമാറിനെ നീക്കി

Jaihind TV Web Desk

February 04, 2025

1 min read • Updated: June 06, 2026

കേരള പോലീസ് സ്പോർട്സ് ചുമതലയിൽ മാറ്റം: എഡിജിപി അജിത് കുമാറിനെ നീക്കി

തിരുവനന്തപുരം: കേരള പോലീസ് സ്പോർട്സ് വിഭാഗത്തിൽ നടന്ന നിയമന തർക്കത്തെ തുടർന്ന് ADGP എം.ആർ. അജിത് കുമാറിനെ സെൻട്രൽ സ്പോർട്സ് ഓഫീസർ സ്ഥാനത്ത് നിന്ന് മാറ്റി. പുതിയ ചുമതല ADGP എസ്. ശ്രീജിത്ത് ഏറ്റെടുക്കും. കണ്ണൂർ സ്വദേശിയായ വോളിബോൾ താരത്തെ സിവിൽ പോലീസ് ഓഫീസർ തസ്തികയിൽ നിയമിക്കാൻ ശ്രമിച്ച നടപടിയിലാണ് വിവാദം ഉരുത്തിരിഞ്ഞത്. നിയമവിരുദ്ധമായ ഈ നീക്കത്തിനെതിരെ ശക്തമായ പ്രതിഷേധമുണ്ടായതോടെയാണ് ചുമതല മാറ്റം നടന്നത്. ഒളിമ്പിക്സ് അല്ലെങ്കിൽ ദേശീയ ഗെയിംസിൽ പങ്കെടുത്തിട്ടില്ലാത്ത ഈ കായിക താരത്തിന് നിയമനം നൽകണമെന്നായിരുന്നു ഉന്നത തലത്തിലെ നിർദ്ദേശം. എന്നാല്‍, നിയമവ്യവസ്ഥ പാലിക്കണമെന്ന നിലപാട് സ്വീകരിച്ച അജിത് കുമാർ, നിയമന നടപടികൾക്ക് തയ്യാറാകാതിരുന്നതിനാൽ അദ്ദേഹം അവധിയെടുത്ത് സ്ഥാനമൊഴിയുകയായിരുന്നു. അതിനിടെ, സ്പോർട്സ് ഓഫീസർ ചുമതല ഒഴിവാക്കണമെന്ന് ആവശ്യപ്പെട്ട് അദ്ദേഹം കത്തും നൽകി. താൽക്കാലികമായി ചുമതല ഏറ്റെടുത്ത എസ്. ശ്രീജിത്ത് ആ നീക്കം മുന്നോട്ട് കൊണ്ടുപോയില്ല. അതേസമയം, രണ്ട് ബോഡി ബിൽഡിങ് താരങ്ങളെ ആംഡ് പോലീസ് ഇൻസ്പെക്ടർമാരായി സൂപ്പർ ന്യൂമററി തസ്തികയിലൂടെ നിയമിക്കാനുള്ള മന്ത്രിസഭാ തീരുമാനം വലിയ വിവാദം സൃഷ്ടിച്ചു. കേരള പോലീസിലെ സ്പോർട്സ് ക്വാട്ട നിയമനങ്ങൾ, ഒളിമ്പിക്സോ ദേശീയ ഗെയിംസിലോ അംഗീകൃത കായിക ഇനങ്ങളിൽ മെഡൽ നേടിയവർക്കായി നിശ്ചയിച്ചിരിക്കുന്നതിനാൽ, പുതിയ നിയമനങ്ങൾ ചോദ്യം ചെയ്യപ്പെടുകയായിരുന്നു.