അഗ്രി-ഫുഡ് മേഖലയിലെ ചെറുകിട സംരംഭങ്ങൾക്ക് കരുത്തേകാൻ ‘കേര സ്മാർട്ട്’; ലോഗോ പ്രകാശനം ചെയ്ത് മുഖ്യമന്ത്രി

തിരുവനന്തപുരം: സംസ്ഥാനത്തെ അഗ്രി-ഫുഡ് മേഖലയിലെ സൂക്ഷ്മ, ചെറുകിട, ഇടത്തരം സംരംഭങ്ങളെ (MSME) ശക്തിപ്പെടുത്തുന്നതിനായി ‘കേര സ്മാർട്ട്’ പദ്ധതിക്ക് തുടക്കമായി. ലോകബാങ്കിന്റെ സഹകരണത്തോടെ കൃഷിവകുപ്പ് നടപ്പാക്കുന്ന കേര (Kerala Climate Resilient Agri Value Chain Modernization - KERA) പദ്ധതിയുടെ ഭാഗമായാണ് പുതിയ പദ്ധതി ആരംഭിക്കുന്നത്.

സെക്രട്ടേറിയറ്റിൽ നടന്ന ചടങ്ങിൽ കേര സ്മാർട്ട് (KERA SMART - Strengthening and Modernising Agro MSMEs for Resilience and Transformation) പദ്ധതിയുടെ ലോഗോ മുഖ്യമന്ത്രി വി. ഡി. സതീശൻ പ്രകാശനം ചെയ്തു.

ആധുനിക സാങ്കേതികവിദ്യ, ഹരിത വികസനം, വിപണി വിപുലീകരണം, മൂല്യവർധിത ഉൽപ്പാദനം എന്നിവയിലൂടെ സംസ്ഥാനത്തെ അഗ്രി-ഫുഡ് സംരംഭങ്ങളെ പുതിയ വളർച്ചയിലേക്ക് നയിക്കുകയാണ് പദ്ധതിയുടെ ലക്ഷ്യമെന്ന് മുഖ്യമന്ത്രി പറഞ്ഞു.

കാർഷിക ഉൽപ്പന്നങ്ങളുടെ മൂല്യവർധനയും സംസ്കരണ ശേഷിയും വർധിപ്പിക്കുന്നതിനൊപ്പം കർഷകർക്കും സംരംഭകർക്കും ഒരുപോലെ പ്രയോജനം ലഭ്യമാക്കുന്നതിനാണ് പദ്ധതി രൂപകൽപ്പന ചെയ്തിരിക്കുന്നത്.

കാർഷിക ഉൽപ്പന്നങ്ങൾ ആധുനിക രീതിയിൽ സംസ്‌കരിച്ച് ആഭ്യന്തര, കയറ്റുമതി വിപണികളിലേക്ക് എത്തിക്കാൻ ശേഷിയുള്ള അഗ്രി-ഫുഡ് എംഎസ്എംഇ യൂണിറ്റുകൾക്ക് പദ്ധതിയിലൂടെ സാമ്പത്തികവും സാങ്കേതികവുമായ സഹായം ലഭ്യമാക്കും.

ഒരു സംരംഭത്തിന് പരമാവധി 1.5 കോടി രൂപ വരെ ഗ്രാന്റ് ലഭിക്കുന്ന രീതിയിലാണ് പദ്ധതി വിഭാവനം ചെയ്തിരിക്കുന്നത്.
 മൂന്ന് വർഷമായി പ്രവർത്തിക്കുന്ന സംരംഭങ്ങൾക്ക് മുൻഗണന

കേരളത്തിൽ കുറഞ്ഞത് മൂന്ന് വർഷമായി പ്രവർത്തിക്കുന്നതും മികച്ച വികസന സാധ്യതയുള്ളതുമായ എംഎസ്എംഇ യൂണിറ്റുകൾക്കാണ് പദ്ധതിയുടെ ആനുകൂല്യം ലഭിക്കുക.

ഉൽപ്പാദന, സേവന മേഖലകളിൽ പ്രവർത്തിക്കുന്ന ചെറുകിട-ഇടത്തരം സംരംഭങ്ങളെയാണ് പദ്ധതിയിൽ ഉൾപ്പെടുത്തുന്നത്. യന്ത്രസാമഗ്രികളിൽ 50 ലക്ഷം രൂപയിലധികം നിക്ഷേപമുള്ള മൈക്രോ യൂണിറ്റുകളെയും പദ്ധതിയുടെ പരിധിയിൽ പരിഗണിക്കും.

സംസ്ഥാനത്തെ അഗ്രി-ഫുഡ് മേഖലയിൽ നവീകരണവും സുസ്ഥിര വളർച്ചയും ഉറപ്പാക്കുന്നതിനുള്ള നിർണായക ചുവടുവയ്പ്പായിരിക്കും ‘കേര സ്മാർട്ട്’ പദ്ധതിയെന്ന് അധികൃതർ വ്യക്തമാക്കി.