ബെംഗളൂരു: കര്‍ണാടകയുടെ പുതിയ മുഖ്യമന്ത്രിയായി കോണ്‍ഗ്രസിന്റെ കരുത്തനായ നേതാവ് ഡി കെ ശിവകുമാര്‍ നാളെ സത്യപ്രതിജ്ഞ ചെയ്ത് അധികാരമേല്‍ക്കും. നാളെ വൈകിട്ട് നടക്കുന്ന പ്രൗഢഗംഭീരമായ ചടങ്ങില്‍ ഡി കെയ്‌ക്കൊപ്പം 11 മന്ത്രിമാരും ചുമതലയേല്‍ക്കുമെന്നാണ് ഒടുവില്‍ പുറത്തുവരുന്ന വിവരങ്ങള്‍.
കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖര്‍ഗെയുടെ മകന്‍ പ്രിയങ്ക് ഖര്‍ഗെയും, മുഖ്യമന്ത്രി സ്ഥാനം ഒഴിഞ്ഞ മുതിര്‍ന്ന നേതാവ് സിദ്ധരാമയ്യയുടെ മകന്‍ യതീന്ദ്ര സിദ്ധരാമയ്യയും പുതിയ മന്ത്രിസഭയില്‍ ഇടംനേടുമെന്ന് ഉറപ്പായിട്ടുണ്ട്. കേരളത്തിനും ഏറെ ശ്രദ്ധേയമായ വാര്‍ത്തയാണ് കര്‍ണാടകയില്‍ നിന്നും വരുന്നത്. പുതിയ മന്ത്രിസഭയില്‍ രണ്ട് മലയാളികള്‍ മന്ത്രിസ്ഥാനം ഉറപ്പിച്ചു കഴിഞ്ഞു. പ്രമുഖ നേതാക്കളായ കെ ജെ ജോര്‍ജ്, യു ടി ഖാദര്‍ എന്നിവരാണ് നാളെ സത്യപ്രതിജ്ഞ ചെയ്യുന്ന മലയാളി മുഖങ്ങള്‍.
ഇവര്‍ക്ക് പുറമെ ജി പരമേശ്വര, സതീഷ് ജാര്‍ക്കിഹോളി, എം ബി പാട്ടീല്‍, ഈശ്വര്‍ ഖന്ദ്രേ, രാമലിംഗ റെഡ്ഡി, ശിവരാജ് തങ്കടഗി, രൂപാ ശശിധര്‍ എന്നിവരും ഡി കെ ശിവകുമാറിനൊപ്പം നാളെ സത്യപ്രതിജ്ഞ ചെയ്യുന്ന ആദ്യപട്ടികയിലുണ്ട്. ഈ മാസം 18 ന് നടക്കുന്ന രാജ്യസഭാ തെരഞ്ഞെടുപ്പിന് ശേഷമാകും കര്‍ണാടകയില്‍ വിപുലമായ മന്ത്രിസഭാ വികസനം ഉണ്ടാകുക.
കര്‍ണാടകയില്‍ ഡി കെ ശിവകുമാര്‍ യുഗം; പുതിയ മുഖ്യമന്ത്രിയായി നാളെ സത്യപ്രതിജ്ഞ ചെയ്ത് അധികാരമേല്‍ക്കും
Jaihind TV News Report
Jaihind TV Web Desk
Updated Oct 11, 2026
2 min read
266 reads
