തൃശൂര്‍: സംസ്ഥാനത്തെ എല്‍ഡിഎഫ് സര്‍ക്കാരിന്റെ തുടര്‍ഭരണം സംഘടനയുടെ ദൈനംദിന പ്രവര്‍ത്തനങ്ങളെയും പോരാട്ടവീര്യത്തെയും പ്രതികൂലമായി ബാധിച്ചുവെന്ന് തുറന്നുസമ്മതിച്ച് ഡിവൈഎഫ്‌ഐ. തൃശൂരില്‍ നടക്കുന്ന ഡിവൈഎഫ്‌ഐ സംസ്ഥാന സമ്മേളനത്തില്‍ അവതരിപ്പിച്ച പ്രവര്‍ത്തന റിപ്പോര്‍ട്ടിലാണ് പ്രസ്ഥാനം കടുത്ത ആത്മവിമര്‍ശനം നടത്തിയത്. താഴെത്തട്ടിലുള്ള സംഘടനാ സംവിധാനങ്ങള്‍ പലയിടത്തും മന്ദഗതിയിലാകുകയും ശിഥിലമാകുകയും ചെയ്തതായും, യുവജന പ്രശ്‌നങ്ങള്‍ ഏറ്റെടുക്കുന്നതില്‍ വന്ന വീഴ്ച പരിഹരിച്ച് പഴയ കരുത്തിലേക്ക് മടങ്ങിവരണമെന്നും റിപ്പോര്‍ട്ട് വ്യക്തമാക്കുന്നു.
അംഗത്വ വിതരണത്തിലുണ്ടായ ഇടിവാണ് റിപ്പോര്‍ട്ടില്‍ പ്രധാനമായും ചൂണ്ടിക്കാണിക്കുന്നത്. ഇതിനുപുറമേ, സംഘടനയുടെ മുഖമാസികയ്ക്ക് പുതിയ വരിക്കാരെ കണ്ടെത്തുന്നതിലും കീഴ്ഘടകങ്ങള്‍ സ്വന്തം നിലയ്ക്ക് പ്രചാരണങ്ങള്‍ സംഘടിപ്പിക്കുന്നതിലും വീഴ്ച സംഭവിച്ചു. യുവാക്കളെ പ്രസ്ഥാനത്തിലേക്ക് ആകര്‍ഷിക്കുന്നതിനായി 'സിജെപി' പ്രക്ഷോഭത്തിന്റെ സംഘാടന ശൈലി മാതൃകയാക്കണമെന്ന ആഹ്വാനവും റിപ്പോര്‍ട്ടിലുണ്ട്. എല്‍ഡിഎഫ് സര്‍ക്കാരിന്റെ ജനക്ഷേമ പദ്ധതികളും വികസന നേട്ടങ്ങളും താഴെത്തട്ടിലുള്ള ജനങ്ങളിലേക്ക് കൃത്യമായി എത്തിക്കാന്‍ ഡിവൈഎഫ്‌ഐക്ക് സാധിച്ചില്ലെന്ന് റിപ്പോര്‍ട്ട് വിലയിരുത്തുന്നു. സര്‍ക്കാരിന്റെ പ്രവര്‍ത്തനം വിശദീകരിക്കുന്നതില്‍ വന്ന വീഴ്ച തെരഞ്ഞെടുപ്പുകളിലെ തിരിച്ചടികള്‍ക്ക് കാരണമായതായും പ്രവര്‍ത്തന റിപ്പോര്‍ട്ട് വ്യക്തമാക്കുന്നു.
തുടര്‍ഭരണം സംഘടനയെ ബാധിച്ചു; സിജെപി മുന്നേറ്റം മാതൃകയാക്കണം: സ്വയം വിമര്‍ശനവുമായി ഡിവൈഎഫ്‌ഐ
Jaihind TV News Report
Jaihind TV Web Desk
Updated Oct 13, 2026
2 min read
429 reads
