ചരിത്രത്താൾ എഴുതിച്ചേർത്ത് ലയണൽ മെസ്സി; കന്നി ലോകകപ്പ് ഹാട്രിക്കിൽ അൾജീരിയയെ തകർത്ത് ചാമ്പ്യന്മാർ
കിരീടം നിലനിര്ത്താനിറങ്ങിയ അര്ജന്റീനയ്ക്ക് ലോകകപ്പില് സ്വപ്നതുല്യമായ തുടക്കം. ക്യാപ്റ്റന് ലയണല് മെസ്സിയുടെ മാന്ത്രിക ഹാട്രിക്കിന്റെ കരുത്തില് എതിരില്ലാത്ത മൂന്ന് ഗോളുകള്ക്കാണ് അര്ജന്റീന അള്ജീരിയയെ തകര്ത്തത്. കാന്സാസ് സിറ്റിയിലെ ആരോഹെഡ് സ്റ്റേഡിയത്തില് നടന്ന ഗ്രൂപ്പ് ജെ പോരാട്ടത്തിലെ ചരിത്ര നിമിഷത്തിന് ഫുട്ബോള് ആരാധകര് സാക്ഷ്യം വഹിച്ചു.
മത്സരത്തിന്റെ 17-ാം മിനിറ്റില് മിഡ്ഫീല്ഡര് റോഡ്രിഗോ ഡി പോള് നല്കിയ മനോഹരമായൊരു ത്രൂ പാസില് നിന്നായിരുന്നു മെസ്സിയുടെ ആദ്യ ഗോള്. പന്ത് സ്വീകരിച്ച മെസ്സി ബോക്സിന് പുറത്തുനിന്ന് തൊടുത്ത മനോഹരമായൊരു കര്വിങ് ഷോട്ട് അള്ജീരിയന് വലയില് ചെന്നുകയറി. രണ്ടാം പകുതിയുടെ തുടക്കത്തില്, 60ാം മിനിറ്റില് അള്ജീരിയന് പ്രതിരോധ നിരയെ പൂര്ണ്ണമായി കാഴ്ചക്കാരാക്കി മെസ്സി തന്റെ രണ്ടാം ഗോളും നേടി അര്ജന്റീനയുടെ ലീഡ് 2-0 ആയി ഉയര്ത്തി. തുടര്ന്ന് 76-ാം മിനിറ്റില് ഹാട്രിക്കും ടീമിന്റെ വിജയവും അദ്ദേഹം പൂര്ത്തിയാക്കി. അള്ജീരിയന് ഗോള്കീപ്പര് ലൂക്കാ സിദാന്റെ പിഴവുകളാണ് ആദ്യ രണ്ട് ഗോളുകളിലേക്ക് നയിച്ചത്.
ഈ തോല്വി അള്ജീരിയയ്ക്ക് വലിയ തിരിച്ചടിയാണ്. 12-ല് എട്ട് ടീമുകള് നോക്കൗട്ട് ഘട്ടത്തിലേക്ക് കടക്കുന്നതിനാല് ഗോള് വ്യത്യാസം നിര്ണായകമാകും. വരും മത്സരങ്ങളില് അവര്ക്ക് ജോര്ദാനെതിരെ വിജയം അനിവാര്യമാണ്, തുടര്ന്ന് ശക്തരായ ഓസ്ട്രിയയെയും അവര് നേരിടും. അതേസമയം, മിന്നും ജയത്തോടെ ആത്മവിശ്വാസത്തിന്റെ കൊടുമുടിയിലുള്ള അര്ജന്റീനയുടെ അടുത്ത രണ്ട് ഗ്രൂപ്പ് മത്സരങ്ങള് ഡാളസിലാണ് നടക്കുക. ജൂണ് 22 തിങ്കളാഴ്ച നടക്കുന്ന അടുത്ത മത്സരത്തില് അവര് ഓസ്ട്രിയയെ നേരിടും. കാന്സാസ് സിറ്റിയില് ലഭിച്ച അതേ തകര്പ്പന് പിന്തുണ ഡാളസിലും ലഭിക്കുമെന്ന പ്രതീക്ഷയിലാണ് മെസ്സിയും സംഘവും.
MOST POPULAR
EDITOR'S PICK 6
TRENDING
GET DAILY UPDATES
Newsletter
Get daily news updates directly to your inbox.