അമേരിക്കൻ തൊഴിലാളികളുടെ തൊഴിൽ സുരക്ഷയും നടന്നുകൊണ്ടിരിക്കുന്ന അന്വേഷണങ്ങളും ചൂണ്ടിക്കാട്ടി എട്ട് പ്രമുഖ സാങ്കേതിക വിദ്യ കമ്പനികളെ തങ്ങളുടെ 'പേം' (PERM) പ്രോഗ്രാമിൽ നിന്ന് യു.എസ് സർക്കാരിലെ ലേബർ ഡിപ്പാർട്ട്മെന്റ് സസ്പെൻഡ് ചെയ്തു. വിദേശ തൊഴിലാളികൾക്ക് സ്ഥിര താമസത്തിനുള്ള (ഗ്രീൻ കാർഡ്) അപേക്ഷകൾ സമർപ്പിക്കുന്നതിനായി തൊഴിലുടമകൾ ഉപയോഗിക്കുന്ന പെർമനന്റ് ലേബർ സർട്ടിഫിക്കേഷൻ പ്രോഗ്രാമിലാണ് ഈ വിലക്ക്. കോ Cognizant, ഇൻഫോസിസ്, ടാറ്റ (TCS), വിപ്രോ, എച്ച്.സി.എൽ, കാപ്‌ജെമിനി, മൈക്രോസോഫ്റ്റ്, അഡോബ് എന്നീ പ്രമുഖ സ്ഥാപനങ്ങളാണ് ഈ നടപടി നേരിട്ടത്. ഇതിനുപുറമെ, രാജ്യത്തെ ഒമ്പത് പ്രമുഖ സർവ്വകലാശാലകൾ ഉപയോഗിക്കുന്ന ജെ-1 എക്സ്ചേഞ്ച് വിസിറ്റർ പ്രോഗ്രാമിനെക്കുറിച്ച് അന്വേഷണം ആരംഭിച്ചതായി യു.എസ് വൈസ് പ്രസിഡന്റ് ജെ.ഡി. വിൻസും വ്യക്തമാക്കി.
അമേരിക്കയുടെ ഈ പുതിയ തീരുമാനത്തിൽ മോദി സർക്കാരിനെയും പ്രധാനമന്ത്രി നരേന്ദ്ര മോദിയെയും രൂക്ഷമായി വിമർശിച്ച് കോൺഗ്രസ് പാർട്ടി രംഗത്തെത്തി. ഇന്ത്യക്കാരായ ഐടി വിദഗ്ധരെ നേരിട്ട് ബാധിക്കുന്ന ഇത്തരം വിസ നിയന്ത്രണങ്ങൾക്കെതിരെ നിയമപരമായി തിരിച്ചടിക്കാൻ ഇന്ത്യക്ക് സാധ്യതകളുണ്ടായിട്ടും, ശക്തമായ രാഷ്ട്രീയ ഇച്ഛാശക്തിയില്ലാത്തതിനാൽ സർക്കാർ നിഷ്ക്രിയമായിരിക്കുകയാണെന്ന് കോൺഗ്രസ് ആരോപിച്ചു. യു.എസ് പ്രസിഡന്റ് ഡൊണാൾഡ് ട്രംപിനോടുള്ള മോദി സർക്കാരിൻ്റെ പ്രീണന നയം പൂർണ്ണമായും പരാജയപ്പെട്ടുവെന്ന് ഈ നടപടികളിലൂടെ തെളിഞ്ഞതായി കോൺഗ്രസ് ജനറൽ സെക്രട്ടറി ജയറാം രമേശ് ചൂണ്ടിക്കാട്ടി.
'ഭീഷണികൾക്ക് മുന്നിൽ തലകുനിക്കുന്നത് ഒരിക്കലും പ്രയോജനം ചെയ്യില്ല' എന്ന് എക്‌സിൽ (X) കുറിച്ച ജയറാം രമേശ്, യു.എസ് കമ്പനികൾക്ക് ഗുണകരമാകും വിധം യു.പി.ഐ ഇടപാടുകൾക്ക് മർച്ചന്റ് ഡിസ്കൗണ്ട് റേറ്റ് (MDR) ചാർജുകൾ ചുമത്താൻ ശ്രമിച്ചതും ട്രംപിനെ പ്രീതിപ്പെടുത്താനായിരുന്നുവെന്ന് കുറ്റപ്പെടുത്തി. ഡിജിറ്റൽ പേഴ്സണൽ ഡാറ്റ പ്രൊട്ടക്ഷൻ ആക്ട് (2023) ഉൾപ്പെടെ പാർലമെന്റ് പാസാക്കിയ നിയമങ്ങൾ ഉപയോഗിച്ച് അമേരിക്കയ്ക്കെതിരെ നിയമാനുസൃതമായ നടപടികൾ സ്വീകരിക്കാൻ കേന്ദ്രത്തിന് സാധിക്കുമെങ്കിലും അതിന് സർക്കാർ മുതിരുന്നില്ലെന്ന് അദ്ദേഹം ഓർമ്മിപ്പിച്ചു. തെരഞ്ഞെടുപ്പ് കമ്മീഷനുമായി ബന്ധപ്പെട്ട 'ജ്ഞാനേഷ് ഗേറ്റ്' (GyaneshGate) വിവാദത്തിൽ പ്രതിപക്ഷ സമ്മർദ്ദം നേരിടുന്ന പ്രധാനമന്ത്രി നരേന്ദ്ര മോദി പൂർണ്ണമായും നിർവീര്യമായ അവസ്ഥയിലാണെന്നും ജയറാം രമേശ് വിമർശിച്ചു.
തൊഴിൽ വിസ ദുരുപയോഗം ചെയ്യുന്നത് തടയാൻ രൂപീകരിച്ച യു.എസ് ആന്റി-ഫ്രോഡ് ടാസ്‌ക് ഫോഴ്‌സിന്റെ ഭാഗമായി വൈസ് പ്രസിഡന്റ് ജെ.ഡി വിൻസ്, ലേബർ സെക്രട്ടറി കീത്ത് സോണ്ടർലിംഗ്, അറ്റോർണി ജനറൽ ടോഡ് ബ്ലാഞ്ച് എന്നിവരാണ് വിലക്ക് പ്രഖ്യാപിച്ചത്. പ്രധാന ഐടി ഔട്ട്‌സോഴ്‌സിംഗ് കമ്പനികൾക്ക് പുറമെ, മൈക്രോസോഫ്റ്റ്, അഡോബ് എന്നിവയ്‌ക്കെതിരെ വിവിധ ഫെഡറൽ അന്വേഷണങ്ങൾ നിലനിൽക്കുന്നതിനാലാണ് നടപടിയെന്ന് അധികൃതർ വ്യക്തമാക്കി. 2025-ൽ യോഗ്യരായ പ്രാദേശിക ജീവനക്കാരെ ലഭിക്കുന്നില്ലെന്ന് കാണിച്ച് സർട്ടിഫിക്കറ്റുകൾ നൽകിയ ശേഷം, 6,000 അമേരിക്കൻ ജീവനക്കാരെ പിരിച്ചുവിട്ട മൈക്രോസോഫ്റ്റിന്റെ നടപടിയെ ജെ.ഡി വിൻസ് പ്രത്യേകമായി വിമർശിച്ചു. ജോലിയിൽ നിന്ന് പിരിച്ചുവിട്ട അമേരിക്കൻ തൊഴിലാളികളുടെ അതേ തസ്തികകളിലേക്ക് ഉൾപ്പെടെ ആയിരക്കണക്കിന് വിസ അപേക്ഷകളാണ് കമ്പനി സമർപ്പിച്ചതെന്നും അദ്ദേഹം വെളിപ്പെടുത്തി.
നിലവിലെ എച്ച്-1ബി (H-1B) വിസകളെ ഈ വിലക്കുകൾ നേരിട്ട് ബാധിക്കില്ലെങ്കിലും, ഗ്രീൻ കാർഡ് അപേക്ഷകളിലെ തടസ്സം വർഷങ്ങളായി അമേരിക്കയിൽ ജോലി ചെയ്യുന്ന ദശലക്ഷക്കണക്കിന് ഇന്ത്യൻ ഐടി പ്രൊഫഷണലുകൾക്ക് തിരിച്ചടിയാകും. എച്ച്-1ബി അപേക്ഷകളിൽ 70 ശതമാനത്തിലേറെയും ഇന്ത്യക്കാരാണ് നേടുന്നത്. കൂടാതെ, യേൽ, ഹാർവാർഡ്, സ്റ്റാൻഫോർഡ്, കാൽടെക് തുടങ്ങിയ മുൻനിര സർവകലാശാലകളിലെ ഗവേഷണ-പഠന പ്രവർത്തനങ്ങൾക്കായി ഉപയോഗിക്കുന്ന ജെ-1 വിസ പ്രോഗ്രാമിലെ ക്രമക്കേടുകളെക്കുറിച്ചും പ്രത്യേക അന്വേഷണം തുടരുകയാണ്.
