ഊരാളുങ്കൽ ലേബർ കോൺട്രാക്ട് സഹകരണ സൊസൈറ്റി ചെയർമാനും സംസ്ഥാനത്തെ സഹകരണ മേഖലയിലെ മുൻനിര പ്രവർത്തകനുമായ രമേശൻ പാലേരി (65) അന്തരിച്ചു. അർബുദ രോഗബാധയെ തുടർന്ന് കോയമ്പത്തൂരിൽ ചികിത്സയിലിരിക്കെയാണ് അന്ത്യം. ഉച്ചയ്ക്കുശേഷം തൊണ്ടയാടുള്ള ഊരാളുങ്കൽ സൈബർ പാർക്കിൽ മൃതദേഹം പൊതുദർശനത്തിന് വെച്ച ശേഷം സംസ്കാര ചടങ്ങുകൾക്കായി വടകരയിലേക്ക് കൊണ്ടുപോകും.
1995 മുതൽ ഊരാളുങ്കൽ സൊസൈറ്റിയുടെ ചെയർമാനായി പ്രവർത്തിച്ചു വരികയായിരുന്നു അദ്ദേഹം. സഹകരണ പ്രസ്ഥാനത്തിന്റെ അമരത്ത് തലമുറകളുടെ പാരമ്പര്യമുള്ള കുടുംബത്തിൽ നിന്നാണ് രമേശൻ പാലേരി വരുന്നത്. 32 വർഷം സൊസൈറ്റിയെ നയിച്ച പ്രമുഖ സഹകാരി പാലേരി കണാരന്റെ മകനായ അദ്ദേഹം, ഊരാളുങ്കൽ സൊസൈറ്റിയുടെ രണ്ടാമത്തെ പ്രസിഡന്റായിരുന്ന പാലേരി ചന്തമ്മന്റെ പൗത്രൻ കൂടിയാണ്.
