തേനിയിലെ ജയിൽച്ചാട്ടം: ഗാർഡുകളെ ആക്രമിച്ച് രക്ഷപ്പെട്ട 17 തടവുകാരെയും പിടികൂടി പോലീസ്

തേനി: തമിഴ്‌നാട്ടിലെ തേനി ജില്ലയിലെ തെക്കമ്പട്ടി സബ്‌ജയിലിൽ നിന്ന് ഡ്യൂട്ടിയിലുണ്ടായിരുന്ന ജയിൽ ജീവനക്കാരെ ആക്രമിച്ച് തടവുചാടിയ 17 തടവുകാരെയും പോലീസ്‌ പൂർണ്ണമായും പിടികൂടി. തിങ്കളാഴ്ച രാത്രിയാണ് ജയിൽ ഉദ്യോഗസ്ഥരെ ആക്രമിച്ച ശേഷം സംഘം ജയിൽ ചാടിയത്. ഒളിവിൽ കഴിഞ്ഞിരുന്ന അവസാനത്തെ രണ്ട് പ്രതികളായ തിരുപ്പതി, മീനാക്ഷിസുന്ദരം എന്നിവരെക്കൂടി അറസ്റ്റ് ചെയ്തതോടെയാണ് ദിവസങ്ങൾ നീണ്ട വൻ തിരച്ചിൽ ദൗത്യത്തിന് അവസാനമായത്.

ചൊവ്വാഴ്ച രാവിലെയോടെ തന്നെ 5 പേരെ പോലീസിന് പിടികൂടാൻ കഴിഞ്ഞിരുന്നു. തുടർന്ന് നടത്തിയ ശക്തമായ തിരച്ചിലിൽ ഉച്ചയോടെ 8 പേരെക്കൂടി പോലീസ് വലയിലാക്കി. റെജിൻ, പൊൻമുത്തു സെൽവം തുടങ്ങിയവരുൾപ്പെടെയുള്ള പ്രതികൾ നേരത്തെ തന്നെ പിടിയിലായിരുന്നു. അവസാന രണ്ടുപേരും അറസ്റ്റിലായതോടെ തടവുചാടിയ മുഴുവൻ കുറ്റവാളികളും വീണ്ടും പോലീസ് കസ്റ്റഡിയിലായി.

അറസ്റ്റിലായ പ്രതികളെ ജയിൽ ചാടിയ ശേഷം രക്ഷപ്പെടാൻ ഉപയോഗിച്ച വഴികളും ഒളിവിൽ കഴിഞ്ഞ കേന്ദ്രങ്ങളും കണ്ടെത്താനായി പോലീസ് മലയോര മേഖലയിലെത്തിച്ച് തെളിവെടുപ്പ് നടത്തി. കുറ്റകൃത്യം നടന്ന രീതിയും രക്ഷപ്പെട്ട വഴികളും കൃത്യമായി മനസ്സിലാക്കാൻ പോലീസിന് കഴിഞ്ഞിട്ടുണ്ട്.

പ്രത്യേക അന്വേഷണ സംഘവും ക്രൈംബ്രാഞ്ചും അടക്കം മുന്നൂറിലധികം പോലീസ് ഉദ്യോഗസ്ഥരാണ് വൻ തിരച്ചിൽ ദൗത്യത്തിൽ പങ്കാളികളായത്. ദുർഘടമായ മലയോര മേഖലയിലെ നീരീക്ഷണത്തിനായി മൂന്ന് ഡ്രോണുകളും പോലീസ് ഉപയോഗിച്ചു. പിടിയിലായ പ്രതികളെ സ്ഥലത്തെത്തിച്ച് ചോദ്യം ചെയ്തതിൽ നിന്ന് ലഭിച്ച വിവരങ്ങളാണ് ബാക്കിയുള്ള പ്രതികളെ അതിവേഗം വലയിലാക്കാൻ പോലീസിന് സഹായകരമായത്.