ഓണക്കാലത്ത് കടുത്ത വിപണി ഇടപെടല്‍ നടത്തി സംസ്ഥാനത്ത് വിലക്കയറ്റം പിടിച്ചുനിര്‍ത്താന്‍ സര്‍ക്കാരിന് കഴിഞ്ഞതായി ഭക്ഷ്യ പൊതുവിതരണ വകുപ്പ് മന്ത്രി അനൂപ് ജേക്കബ് വ്യക്തമാക്കി. വരും ദിവസങ്ങളിലും ഉത്സവകാലങ്ങളിലുമടക്കം വിപണി ഇടപെടലുകള്‍ കൂടുതല്‍ കാര്യക്ഷമമാക്കുമെന്നും വിലക്കയറ്റം തടയാന്‍ സജീവ നടപടികള്‍ തുടരുമെന്നും മന്ത്രി അറിയിച്ചു.
സമീപകാലത്തെ ഏറ്റവും ഉയര്‍ന്ന വില്‍പ്പനയാണ് ഈ ഓണക്കാലത്ത് സപ്ലൈകോ രേഖപ്പെടുത്തിയത്. അതിനിടെ, സപ്ലൈകോയിലെ പഞ്ചസാര ക്രമക്കേടുമായി ബന്ധപ്പെട്ട അന്വേഷണം പുരോഗമിക്കുകയാണെന്നും കേസില്‍ ഏഴ് ഉദ്യോഗസ്ഥര്‍ക്കെതിരെ ഇതിനകം നടപടി സ്വീകരിച്ചിട്ടുണ്ടെന്നും ഭക്ഷ്യമന്ത്രി കൂട്ടിച്ചേര്‍ത്തു.
അതേസമയം നിയമസഭയില്‍ ഇന്ന് ചട്ടം 118 പ്രകാരം രണ്ട് പ്രധാന പ്രമേയങ്ങള്‍ അവതരിപ്പിക്കും. തിരഞ്ഞെടുപ്പ് കമ്മീഷന്റെ പ്രവര്‍ത്തനം സുതാര്യമാക്കേണ്ടതിന്റെ ആവശ്യകത ഉന്നയിച്ചും, തീവ്ര വോട്ടര്‍ പട്ടിക പരിഷ്‌കരണത്തിലെ അപാകതകള്‍ പരിഹരിക്കണമെന്ന് ആവശ്യപ്പെട്ടുമാണ് മുഖ്യമന്ത്രി ആദ്യ പ്രമേയം അവതരിപ്പിക്കുന്നത്.
രാഷ്ട്രപതിയുടെ പരിഗണനയിലിരിക്കുന്ന 2025-ലെ കേരള സ്വകാര്യ സര്‍വകലാശാല ബില്‍ മടക്കി നല്‍കണമെന്ന് ഗവര്‍ണര്‍ മുഖാന്തിരം കേന്ദ്രസര്‍ക്കാരിനോട് അഭ്യര്‍ത്ഥിക്കുന്ന രണ്ടാമത്തെ പ്രമേയം ഉന്നത വിദ്യാഭ്യാസ മന്ത്രി റോജി എം. ജോണ്‍ സഭയില്‍ അവതരിപ്പിക്കും.
സപ്ലൈകോയ്ക്ക് ചരിത്ര വില്‍പ്പന; വിപണി ഇടപെടല്‍ ശക്തമാക്കുമെന്ന് മന്ത്രി അനൂപ് ജേക്കബ്
Jaihind TV News Report
Jaihind TV Web Desk
2 min read
222 reads
