ഫെറാന് ടോറസിന്റെ എക്സ്ട്രാ ടൈം ഗോള്; അര്ജന്റീനയെ വീഴ്ത്തി സ്പെയിന് ലോക ചാമ്പ്യന്മാര്; രണ്ടാം കിരീടമുയര്ത്തി സ്പാനിഷ് പട
ന്യൂജേഴ്സി: ഫുട്ബോള് ലോകം കാത്തിരുന്ന മഹാപോരാട്ടത്തില് ലയണല് മെസ്സിയുടെ അര്ജന്റീനയെ തകര്ത്ത് സ്പെയിന് വീണ്ടും ലോകരാജാക്കന്മാര്. ഏകപക്ഷീയമായ ഒരു ഗോളിനാണ് സ്പെയിന് അര്ജന്റീനയെ പരാജയപ്പെടുത്തിയത്. എക്സ്ട്രാ ടൈമിന്റെ 106-ാം മിനിറ്റില് ഫെറാന് ടോറസ് നേടിയ തകര്പ്പന് ഗോളാണ് സ്പെയിന് തങ്ങളുടെ രണ്ടാം ലോകകപ്പ് കിരീടം സമ്മാനിച്ചത്. ഇതോടെ മെസ്സിയുടെ ലോകകപ്പ് കരിയറിന് കണ്ണീരോടെയുള്ള അന്ത്യമായി.
മത്സരത്തിലുടനീളം സ്പാനിഷ് പടയുടെ വ്യക്തമായ ആധിപത്യമാണ് കാണാന് കഴിഞ്ഞത്. നിശ്ചിത സമയത്ത് ഇരുടീമുകള്ക്കും ഗോള് നേടാനാകാത്തതിനെ തുടര്ന്ന് മത്സരം എക്സ്ട്രാ ടൈമിലേക്ക് നീളുകയായിരുന്നു. 106-ാം മിനിറ്റില് ബോക്സിനുള്ളിലേക്ക് വന്ന പന്ത് പകരക്കാരനായി ഇറങ്ങിയ ഫെറാന് ടോറസ് തന്റെ ഇടംകാല് കൊണ്ട് അര്ജന്റീനയുടെ വലയിലേക്ക് പായിച്ചു. മത്സരത്തിലുടനീളം വെറും ഒരു ഗോള് മാത്രം വഴങ്ങി ചരിത്രത്തിലെ ഏറ്റവും മികച്ച പ്രതിരോധ റെക്കോര്ഡോടെയാണ് സ്പെയിന് ഈ ലോകകപ്പ് സ്വന്തമാക്കിയത്. സ്പാനിഷ് പരിശീലകന് ലൂയിസ് ഡി ലാ ഫ്യൂന്റേ (65) ഇതോടെ ലോകകപ്പ് നേടുന്ന ഏറ്റവും പ്രായം കൂടിയ പരിശീലകനെന്ന റെക്കോര്ഡും സ്വന്തമാക്കി.
തന്റെ കരിയറിലെ അവസാന ലോകകപ്പ് മത്സരമെന്ന് സൂചന നല്കിയിരുന്ന ലയണല് മെസ്സിക്ക് ഈ തോല്വി വലിയ ആഘാതമായി. അര്ജന്റീനന് ഗോള്കീപ്പര് എമിലിയാനോ മാര്ട്ടിനെസിന്റെ അസാമാന്യ പ്രകടനമാണ് സ്പെയിന്റെ നിരവധി ഗോള്ശ്രമങ്ങളെ തടഞ്ഞുനിര്ത്തിയത്. മത്സരത്തില് റെക്കോര്ഡ് സേവുകളാണ് മാര്ട്ടിനെസ് നടത്തിയത്. സ്പെയിനിന്റെ 12 ഗോള്ശ്രമങ്ങളാണ് മാര്ട്ടിനെസ് തടുത്തത്.
രണ്ടാം പകുതിയുടെ ഇഞ്ചുറി ടൈമില് എന്സോ ഫെര്ണാണ്ടസ് ചുവപ്പ് കാര്ഡ് കണ്ട് പുറത്തായതോടെ 10 അംഗങ്ങളുമായാണ് അര്ജന്റീന മത്സരം പൂര്ത്തിയാക്കിയത്. അവസാന നിമിഷങ്ങളില് ഗ്വിലിയാനോ സിമിയോണിക്ക് ലഭിച്ച സുവര്ണ്ണാവസരം ലക്ഷ്യത്തിലെത്തിക്കാന് കഴിയാതെ പോയതും അര്ജന്റീനയ്ക്ക് തിരിച്ചടിയായി. 2023-ല് വനിതാ ലോകകപ്പ് നേടിയ സ്പെയിന്, ഇതോടെ ഒരേസമയം പുരുഷ-വനിതാ ലോകകപ്പ് കിരീടങ്ങള് കൈവശം വയ്ക്കുന്ന ആദ്യ രാജ്യമായി മാറി. തുടര്ച്ചയായ 38 മത്സരങ്ങളില് തോല്വി അറിയാതെ കുതിക്കുന്ന സ്പെയിന്, ഇറ്റലിയുടെ 37 മത്സരങ്ങളുടെ യൂറോപ്യന് റെക്കോര്ഡും മറികടന്നു. ടൂര്ണമെന്റിലെ മികച്ച കളിക്കാരനുള്ള ഗോള്ഡന് ബോള് പുരസ്കാരം സ്പാനിഷ് ക്യാപ്റ്റന് റോഡ്രി സ്വന്തമാക്കി.
അമേരിക്ക, കാനഡ, മെക്സിക്കോ എന്നീ രാജ്യങ്ങള് സംയുക്തമായി ആതിഥേയത്വം വഹിച്ച 48 ടീമുകള് പങ്കെടുത്ത ചരിത്രത്തിലെ ഏറ്റവും വലിയ ലോകകപ്പിനാണ് ഇതോടെ സമാപനമായത്. പോപ്പ് താരം മഡോണ, ജസ്റ്റിന് ബീബര്, ബി.ടി.എസ്, ഷക്കീര തുടങ്ങിയ പ്രമുഖര് പങ്കെടുത്ത വിസ്മയകരമായ കലാപരിപാടികളും ഫൈനല് മത്സരത്തിന് കൊഴുപ്പുകൂട്ടി. അര്ജന്റീനന് കളിക്കാര്ക്ക് ഫിഫ പ്രസിഡന്റ് ജിയാനി ഇന്ഫാന്റിനോയും യു.എസ് പ്രസിഡന്റ് ഡൊണാള്ഡ് ട്രംപും ചേര്ന്ന് റണ്ണേഴ്സ് അപ്പ് മെഡലുകള് സമ്മാനിച്ചു.
MOST POPULAR
EDITOR'S PICK 6
TRENDING
GET DAILY UPDATES
Newsletter
Get daily news updates directly to your inbox.