തിരുവനന്തപുരം: ആരോഗ്യരംഗത്ത് വിദേശ കമ്പനികളുടെ കടന്നുകയറ്റം ചികിത്സാച്ചെലവ് വര്‍ധിപ്പിക്കുന്നതായി മുഖ്യമന്ത്രി വി ഡി സതീശന്‍. നിയമസഭയില്‍ അടിയന്തര പ്രമേയത്തിന് മറുപടി പറയുകയായിരുന്നു മുഖ്യമന്ത്രി. രോഗങ്ങള്‍ മുന്‍കൂട്ടി തിരിച്ചറിഞ്ഞ് പ്രതിരോധ നടപടികള്‍ സ്വീകരിക്കേണ്ടത് അനിവാര്യമാണെന്നും വ്യക്തമാക്കി. ഇതിന്റെ ഭാഗമായി വെല്‍നെസ് സെന്ററുകളും റിഹാബ് സെന്ററുകളും കൂടുതല്‍ ആരംഭിക്കുകയെന്നതാണ് സര്‍ക്കാര്‍ നയമെന്നും മുഖ്യമന്ത്രി കൂട്ടിച്ചേര്‍ത്തു.
രോഗങ്ങള്‍ നേരത്തെ കണ്ടെത്തി പ്രതിവിധി കണ്ടെത്തുകയെന്ന ലക്ഷ്യത്തോടെ രൂപീകരിച്ച ടാസ്‌ക് ഫോഴ്‌സിനെക്കുറിച്ചും മുഖ്യമന്ത്രി സംസാരിച്ചു. രാജ്യത്തുടനീളം ആദരിക്കപ്പെടുന്ന പ്രമുഖ വ്യക്തികളെയാണ് ഈ ടാസ്‌ക് ഫോഴ്‌സില്‍ ഉള്‍പ്പെടുത്തിയിരിക്കുന്നതെന്ന് അദ്ദേഹം വ്യക്തമാക്കി. ആരോഗ്യരംഗത്ത് കേരളത്തെ മികച്ചൊരു കേന്ദ്രമാക്കി മാറ്റാന്‍ സര്‍ക്കാര്‍ ദൃഢപ്രതിജ്ഞ എടുത്തിട്ടുണ്ടെന്നും അദ്ദേഹം ഓര്‍മ്മിപ്പിച്ചു.
എസ്.എം.എ രോഗബാധിതര്‍ക്കായി ഗുണനിലവാരം ഉറപ്പുവരുത്തി കുറഞ്ഞ വിലയ്ക്ക് ഇന്ത്യന്‍ നിര്‍മ്മിത മരുന്ന് ലഭ്യമാക്കാന്‍ കഴിഞ്ഞത് ഏറെ ആശ്വാസകരമാണെന്ന് മുഖ്യമന്ത്രി പറഞ്ഞു. ഈ നിര്‍ണായക നേട്ടം കൈവരിച്ച ആരോഗ്യവകുപ്പിനെയും ഇതിന് നേതൃത്വം നല്‍കിയ ആരോഗ്യ മന്ത്രിയെയും അദ്ദേഹം പ്രത്യേകം അഭിനന്ദിച്ചു.
എസ്.എം.എ മരുന്ന് കുറഞ്ഞ വിലയ്ക്ക് ലഭ്യമാക്കി; ആരോഗ്യവകുപ്പിന്റെ ഇടപെടല്‍ അഭിനന്ദനാര്‍ഹമെന്ന് മുഖ്യമന്ത്രി
Jaihind TV News Report
Jaihind TV Web Desk
2 min read
279 reads
