പ്രണയത്തിലാണെന്ന അഭ്യൂഹങ്ങൾക്ക് വിരാമമിട്ട് സാനിയ മിർസ; 'ജീവിതത്തിൽ നിലവിൽ ഒരു പുരുഷനുമില്ല' എന്ന തുറന്നുപറച്ചിൽ

ഹൈദരാബാദ്: പ്രണയത്തിലാണെന്നും രണ്ടാം വിവാഹത്തിന് തയ്യാറെടുക്കുകയാണെന്നും പ്രചരിക്കുന്ന അഭ്യൂഹങ്ങൾക്ക് വ്യക്തമായ മറുപടിയുമായി മുൻ ഇന്ത്യൻ ടെന്നീസ് താരം സാനിയ മിർസ. നേഹ ധൂപിയയും അംഗദ് ബേദിയും അവതാരകരായ 'ഡബിൾ ഡേറ്റ്' എന്ന ടോക്ക് ഷോയിൽ സംവിധായിക ഫറ ഖാനോടൊപ്പം പങ്കെടുത്തപ്പോഴാണ് താൻ നിലവിൽ ആരുമായും പ്രണയത്തിലല്ലെന്ന് സാനിയ സ്ഥിരീകരിച്ചത്.

അടുത്തിടെ ആരെങ്കിലും കോഫി ഡേറ്റിനായി ക്ഷണിച്ചിരുന്നോ എന്ന അവതാരകരുടെ ചോദ്യത്തിന് രസകരമായാണ് താരം മറുപടി നൽകിയത്. തന്റെ ആൺസുഹൃത്തുക്കൾ യാത്രകൾക്ക് ക്ഷണിക്കാറുണ്ടെങ്കിലും എല്ലാവരും ഒരു സാധാരണ സുഹൃത്തിനെപ്പോലെയാണ് തന്നോട് പെരുമാറുന്നതെന്നും ആരും പ്രണയ താത്പര്യങ്ങളൊന്നും പ്രകടിപ്പിച്ചിട്ടില്ലെന്നും സാനിയ വെളിപ്പെടുത്തി. തുടർന്ന്, ജീവിതത്തിൽ ഒരു പങ്കാളിയെ ആഗ്രഹിക്കുന്നുണ്ടോ എന്ന് അംഗദ് ബേദി ചോദിച്ചപ്പോഴാണ്, "എന്റെ ജീവിതത്തിൽ നിലവിൽ ഒരു പുരുഷനുമില്ല, ഭാവിയിൽ ഉണ്ടാകുമോ എന്നും അറിയില്ല" എന്ന് സാനിയ തുറന്നുപറഞ്ഞത്.

2010-ലാണ് സാനിയ മിർസ മുൻ പാകിസ്താൻ ക്രിക്കറ്റ് ക്യാപ്റ്റൻ ഷുഐബ് മാലിക്കിനെ വിവാഹം കഴിച്ചത്. 2018-ൽ ഇരുവർക്കും ഇസ്ഹാൻ എന്ന മകൻ ജനിച്ചു. 2024-ൽ ഈ വിവാഹബന്ധം വേർപിരിഞ്ഞതിന് ശേഷം മകനോടൊപ്പം കഴിയുന്ന സാനിയ സിംഗിളായി തുടരുകയാണ്. പിന്നീട് ഷുഐബ് മാലിക് പാകിസ്താൻ നടി സന ജാവേദിനെ വിവാഹം കഴിച്ചിരുന്നു. 2023-ൽ പ്രൊഫഷണൽ ടെന്നീസിൽ നിന്ന് വിരമിച്ച സാനിയ, നിലവിൽ കായിക പരിപാടികളിൽ അവതാരകയായും കമന്റേറ്ററായും സജീവമാണ്.