ഗണപതി ദർശനത്തിനിടെ ആരാധകക്കൂട്ടത്തിൽ സൽമാൻ ഖാൻ; കാർ ആരാധകന്റെ കാലിലൂടെ കയറി, ഡ്രൈവറോട് ദേഷ്യപ്പെട്ട് താരം

മുംബൈയിൽ ഗണപതി ആഘോഷങ്ങൾക്കിടെ ബോളിവുഡ് താരം സൽമാൻ ഖാൻ സഞ്ചരിച്ച വാഹനം ആരാധകക്കൂട്ടത്തിനിടയിൽ കുടുങ്ങി. രാഷ്ട്രീയ നേതാവ് ആശിഷ് ഷെലാറിന്റെ വസതിയിൽ ഗണപതി ദർശനത്തിനെത്തിയപ്പോഴായിരുന്നു സംഭവം. താരത്തെ നേരിട്ട് കാണാനായി നൂറുകണക്കിന് ആളുകൾ തടിച്ചുകൂടിയതോടെ വാഹനം മുന്നോട്ട് നീക്കാൻ പോലും കഴിയാത്ത സാഹചര്യമുണ്ടായി.

ജനത്തിരക്കിനിടയിലൂടെ കാർ മുന്നോട്ടെടുക്കുന്നതിനിടെ ഒരു ആരാധകന്റെ കാലിലൂടെ വാഹനം കയറിയിറങ്ങിയതായാണ് ഉയരുന്ന ആരോപണം. വേദനകൊണ്ട് ആരാധകൻ നിലവിളിക്കുന്നതും കാർ അല്പം പിന്നോട്ടെടുക്കാൻ പാപ്പരാസികൾ ഡ്രൈവറോട് വിളിച്ചുപറയുന്നതും വ്യക്തമാക്കുന്ന വീഡിയോ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. സംഭവത്തിന് പിന്നാലെ പ്രകോപിതനായ സൽമാൻ ഖാൻ ഡ്രൈവറോട് ദേഷ്യപ്പെടുകയും കൈയിൽ അടിക്കുകയും ചെയ്യുന്നത് വീഡിയോയിൽ കാണാം. 

വാഹനത്തിന് ചുറ്റുമുള്ള ജനക്കൂട്ടത്തിൽ നിന്ന് വണ്ടി മാറ്റാൻ താരം ഡ്രൈവർക്ക് നിർദ്ദേശം നൽകുകയും ചെയ്തു. സംഭവത്തിൽ താരത്തെ അനുകൂലിച്ചും ഡ്രൈവറോടുള്ള പെരുമാറ്റത്തെ വിമർശിച്ചും സോഷ്യൽ മീഡിയയിൽ ചർച്ചകൾ സജീവമാണ്.