ആദ്യം വൈഭവ് സൂര്യവംശിയുടെ ബാറ്റിംഗ് വെടിക്കെട്ട്, പിന്നെ ജോഫ്ര ആര്‍ച്ചറുടെ മാരക ബൗളിംഗ്; ഹൈദരബാദിനെ തകര്‍ത്ത് രാജസ്ഥാന്‍ ക്വാളിഫയറില്

ചെന്നൈ: ഐപിഎല്‍ എലിമിനേറ്ററില്‍ സണ്‍റൈസേഴ്‌സ് ഹൈദരാബാദിനെ 47 റണ്‍സിന് തകര്‍ത്ത് രാജസ്ഥാന്‍ റോയല്‍സ് രണ്ടാം ക്വാളിഫയറിന് യോഗ്യത നേടി. പതിനഞ്ചുകാരന്‍ വൈഭവ് സൂര്യവംശിയുടെ മാസ്മരിക ബാറ്റിംഗിന്റെയും ജോഫ്ര ആര്‍ച്ചറുടെ തകര്‍പ്പന്‍ ബൗളിംഗിന്റെയും കരുത്തിലാണ് രാജസ്ഥാന്റെ വിജയം. വെള്ളിയാഴ്ച ന്യൂചണ്ഡീഗഡില്‍ നടക്കുന്ന രണ്ടാം ക്വാളിഫയറില്‍, ആദ്യ ക്വാളിഫയറില്‍ ആര്‍സിബിയോട് തോറ്റ ഗുജറാത്ത് ടൈറ്റന്‍സാണ് രാജസ്ഥാന്റെ എതിരാളികള്‍.

ടോസ് നഷ്ടപ്പെട്ട് ആദ്യം ബാറ്റിംഗിന് ഇറങ്ങിയ രാജസ്ഥാന്‍ റോയല്‍സ് നിശ്ചിത 20 ഓവറില്‍ 8 വിക്കറ്റ് നഷ്ടത്തിലാണ് 243 റണ്‍സ് അടിച്ചുകൂട്ടിയത്. വെറും 29 പന്തില്‍ 97 റണ്‍സ് വാരിക്കൂട്ടിയ 15-കാരന്‍ വൈഭവ് സൂര്യവംശിയാണ് രാജസ്ഥാന്റെ ഇന്നിംഗ്‌സിന് അടിത്തറയിട്ടത്. മൂന്ന് റണ്‍സ് അകലെ കന്നി സെഞ്ചുറി നഷ്ടമായെങ്കിലും ഹൈദരാബാദ് ബൗളര്‍മാരെ വൈഭവ് കണക്കറ്റ് പ്രഹരിച്ചു.

മറുഭാഗത്ത് ധ്രുവ് ജുറെല്‍ 21 പന്തില്‍ 50 റണ്‍സുമായി തിളങ്ങി. യശസ്വി ജയ്‌സ്വാള്‍ (29 പന്തില്‍ 29), ക്യാപ്റ്റന്‍ റിയാന്‍ പരാഗ് (12 പന്തില്‍ 26) എന്നിവരും മികച്ച പിന്തുണ നല്‍കി. 15 ഓവറുകള്‍ക്ക് ശേഷം തുടര്‍ച്ചയായി വിക്കറ്റുകള്‍ നഷ്ടമായതാണ് രാജസ്ഥാനെ 250 കടക്കുന്നതില്‍ നിന്നും തടഞ്ഞത്; അവസാന 5 ഓവറില്‍ 36 റണ്‍സ് മാത്രമാണ് ടീമിന് നേടാനായത്. ഹൈദരാബാദിനായി പ്രഫുല്‍ ഹിംഗെ 3 വിക്കറ്റ് വീഴ്ത്തിയപ്പോള്‍, 4 ഓവറില്‍ 64 റണ്‍സ് വഴങ്ങിയ ക്യാപ്റ്റന്‍ പാറ്റ് കമ്മിന്‍സിന് വിക്കറ്റൊന്നും ലഭിച്ചില്ല.
തുടക്കത്തിലേ അടിതെറ്റി ഹൈദരാബാദ്

244 റണ്‍സ് എന്ന ഹിമാലയന്‍ ലക്ഷ്യം പിന്തുടര്‍ന്നിറങ്ങിയ സണ്‍റൈസേഴ്‌സിന് രണ്ടാം പന്തില്‍ തന്നെ പ്രഹരമേറ്റു. റണ്ണൊന്നുമെടുക്കാത്ത അഭിഷേക് ശര്‍മ്മയെ ധ്രുവ് ജുറെലിന്റെ കൈകളില്‍ എത്തിച്ച് ജോഫ്ര ആര്‍ച്ചറാണ് വിക്കറ്റ് വേട്ടയ്ക്ക് തുടക്കമിട്ടത്. പിന്നാലെ വന്ന ഇഷാന്‍ കിഷന്‍ 11 പന്തില്‍ 33 റണ്‍സുമായി (3 ഫോര്‍, 3 സിക്‌സ്) രാജസ്ഥാന് ഭീഷണിയായെങ്കിലും ആര്‍ച്ചറുടെ അതിവേഗത്തിന് മുന്നില്‍ വീണു.

വെടിക്കെട്ട് വീരന്‍ ട്രാവിസ് ഹെഡിനെയും (8 പന്തില്‍ 17) ആര്‍ച്ചര്‍ ക്ലീന്‍ ബൗള്‍ഡാക്കി. സ്മരണ്‍ രവിചന്ദ്രനെ (1) നാന്ദ്രെ ബര്‍ഗര്‍ പുറത്താക്കിയതോടെ പവര്‍പ്ലേയില്‍ 4 വിക്കറ്റിന് 71 റണ്‍സ് എന്ന നിലയില്‍ ഹൈദരാബാദ് തകര്‍ന്നു. അപകടകാരിയായ ഹെന്റിച്ച് ക്ലാസന്‍ (10 പന്തില്‍ 18) യാഷ്രാജ് പുഞ്ചുവിന്റെ പന്തില്‍ വിക്കറ്റിന് മുന്നില്‍ കുടുങ്ങിയതോടെ ഹൈദരാബാദ് 83-ന് 5 എന്ന നിലയിലേക്ക് കൂപ്പുകുത്തി.
പ്രതിരോധിച്ച് നിതീഷും സലീലും, ഒടുവില്‍ കീഴടങ്ങല്‍

ആറാം വിക്കറ്റില്‍ ഒന്നിച്ച നിതീഷ് കുമാര്‍ റെഡ്ഡിയും സലീല്‍ അറോറയും ചേര്‍ന്ന് ടീം സ്‌കോര്‍ 100 കടത്തി. 20 പന്തില്‍ 38 റണ്‍സെടുത്ത നിതീഷിനെ രവീന്ദ്ര ജഡേജയുടെ പന്തില്‍ ദാസുന്‍ ഷനക തകര്‍പ്പന്‍ ക്യാച്ചിലൂടെ പുറത്താക്കിയതോടെ ഹൈദരാബാദിന്റെ അവസാന പ്രതീക്ഷയും അറ്റു. തൊട്ടടുത്ത ഓവറില്‍ ക്യാപ്റ്റന്‍ പാറ്റ് കമ്മിന്‍സിനെ (1) സുഷാന്ത് മിശ്ര പുറത്താക്കി.

പിന്നീട് സലീല്‍ അറോറയുടെയും (21 പന്തില്‍ 35) ശിവാംഗ് കുമാറിന്റെയും (24 പന്തില്‍ 27) പോരാട്ടമാണ് ഹൈദരാബാദിന്റെ തോല്‍വി ഭാരം കുറച്ചത്. 19.2 ഓവറില്‍ 196 റണ്‍സിന് സണ്‍റൈസേഴ്‌സ് ഇന്നിംഗ്‌സ് അവസാനിച്ചു. രാജസ്ഥാന് വേണ്ടി ജോഫ്ര ആര്‍ച്ചര്‍ മൂന്ന് വിക്കറ്റ് വീഴ്ത്തിയപ്പോള്‍ രവീന്ദ്ര ജഡേജ രണ്ട് വിക്കറ്റും നാന്ദ്രെ ബര്‍ഗര്‍, യാഷ് രാജ് പുഞ്ചു എന്നിവര്‍ ഓരോ വിക്കറ്റ് വീതവും സ്വന്തമാക്കി.