എസ്‌ഐആർ ഹർജി ഇന്ന് സുപ്രീം കോടതിയിൽ; ഹർജിക്ക് തൊട്ടുമുമ്പ് 'സത്യം ശിവം സുന്ദരം' പോസ്റ്റുമായി രാഹുൽ ഗാന്ധി

കേന്ദ്ര തിരഞ്ഞെടുപ്പ് കമ്മിഷന്റെ പ്രത്യേക തീവ്ര പരിഷ്‌കരണ (SIR) പ്രക്രിയയുമായി ബന്ധപ്പെട്ട ഹർജികൾ സുപ്രീം കോടതി ഇന്ന് പരിഗണിക്കാനിരിക്കെ, സാമൂഹിക മാധ്യമങ്ങളിൽ മൂന്ന് വെള്ള വരകളും മധ്യത്തിൽ ചുവന്ന തിലകവുമുള്ള ശിവ ചിഹ്നത്തോടൊപ്പം 'സത്യം ശിവം സുന്ദരം' എന്ന സംസ്‌കൃത വാക്യം പങ്കുവെച്ച് രാഹുൽ ഗാന്ധി. മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനും തിരഞ്ഞെടുപ്പ് കമ്മിഷന്റെ തീരുമാനങ്ങൾക്കുമെതിരെ കോൺഗ്രസ് പ്രസിഡന്റ് മല്ലികാർജുൻ ഖാർഗെ, രാഹുൽ ഗാന്ധി ഉൾപ്പെടെയുള്ള 'ഇന്ത്യ' മുന്നണി നേതാക്കൾ നൽകിയ ഹർജികൾ സുപ്രീം കോടതിയുടെ പരിഗണനയിലിരിക്കെയാണ് ഈ പോസ്റ്റ്.

വോട്ടർ പട്ടിക പരിഷ്‌കരണത്തിൽ തിരഞ്ഞെടുപ്പ് കമ്മിഷൻ തങ്ങളുടെ കൂട്ടായ അധികാരം ഏകപക്ഷീയമായും അനിയന്ത്രിതമായും ഉപയോഗിച്ചുവെന്നാണ് രാഹുൽ ഗാന്ധി സുപ്രീം കോടതിയിൽ നൽകിയ ഹർജിയിൽ പ്രധാനമായും ആരോപിക്കുന്നത്. മറ്റു തിരഞ്ഞെടുപ്പ് കമ്മിഷണർമാരുടെ അറിവോ അംഗീകാരമോ ഇല്ലാതെയാണോ തീരുമാനങ്ങൾ എടുത്തതെന്നും ഹർജി ചോദ്യം ചെയ്യുന്നു. വോട്ടർ എന്റോൾമെന്റ് ഫോം 6-ൽ വരുത്തിയ മാറ്റങ്ങൾ, ഇലക്ടറൽ ഡാറ്റാബേസിന്റെ പ്രവർത്തനം, ആവശ്യമായ നോട്ടീസോ പുനഃസ്ഥാപിക്കാനുള്ള വ്യക്തമായ സംവിധാനമോ ഇല്ലാതെ വോട്ടർമാരെ ഒഴിവാക്കൽ എന്നിവയിലും ഇന്ത്യാ മുന്നണി നേതാക്കൾ ആശങ്ക രേഖപ്പെടുത്തിയിട്ടുണ്ട്. തിരഞ്ഞെടുപ്പ് കമ്മിഷന്റെ ബന്ധപ്പെട്ട രേഖകൾ പരിശോധിക്കാൻ അനുമതി നൽകുക, വോട്ടർമാരെ ഒഴിവാക്കിയതിലും മാറ്റങ്ങൾ വരുത്തിയതിലും സ്വതന്ത്ര ഓഡിറ്റ് നടത്തുക, കേസിൽ അന്തിമ തീരുമാനമാകുന്നതുവരെ നിലവിലെ വിജ്ഞാപന പ്രകാരമുള്ള നടപടികൾ നിർത്തിവെക്കുക എന്നിവയാണ് ഹർജിക്കാരുടെ പ്രധാന ആവശ്യങ്ങൾ.

അതേസമയം, തിരഞ്ഞെടുപ്പ് കമ്മിഷൻ തങ്ങൾക്കെതിരായ ആരോപണങ്ങൾ നിഷേധിച്ച് സുപ്രീം കോടതിയിൽ സത്യവാങ്മൂലം സമർപ്പിച്ചിട്ടുണ്ട്. വോട്ടർ പട്ടിക പരിഷ്‌കരണവുമായി ബന്ധപ്പെട്ട മൂന്ന് ഉത്തരവുകളും ഏകകണ്ഠമായി എടുത്ത തീരുമാനങ്ങളാണെന്നും തിരഞ്ഞെടുപ്പ് കമ്മീഷണർ ഗ്യാനേഷ് കുമാർ ഏകപക്ഷീയമായി പ്രവർത്തിച്ചിട്ടില്ലെന്നും കമ്മിഷൻ വ്യക്തമാക്കുന്നു. കേവലം ഒരു മാധ്യമ റിപ്പോർട്ടിന്റെ അടിസ്ഥാനത്തിലാണ് പ്രതിപക്ഷ നേതാക്കളുടെ ഹർജിയെന്നുമാണ് കമ്മിഷന്റെ വാദം. തിരഞ്ഞെടുപ്പ് പ്രക്രിയയിൽ ക്രമക്കേടുകളും വോട്ട് ചോർച്ചയും ആരോപിച്ച് നേരത്തെ രാഹുൽ ഗാന്ധിയുടെ നേതൃത്വത്തിൽ സുപ്രീം കോടതിയിലേക്ക് മാർച്ച് നടത്തുകയും പ്രതിപക്ഷ പാർട്ടികളോടും സിവിൽ സൊസൈറ്റി ഗ്രൂപ്പുകളോടും പൊതുജനങ്ങളോടും ഇതിൽ പങ്കുചേരാൻ അഭ്യർത്ഥിക്കുകയും ചെയ്തിരുന്നു.