പെൺകുട്ടികളുടെ വിദ്യാഭ്യാസം, ഹോസ്റ്റൽ സൗകര്യങ്ങളുടെ കുറവ് എന്നിവ മുൻനിർത്തി പ്രധാനമന്ത്രി നരേന്ദ്ര മോദിക്കെതിരെ രൂക്ഷ വിമർശനവുമായി ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. ഇൻഡോറിൽ നടന്ന 'ഛാത്രോം കീ ഗൂഞ്ച്' പരിപാടിയിൽ പങ്കെടുത്ത ഒരു പെൺകുട്ടിയുടെ ചോദ്യം പങ്കുവെച്ചുകൊണ്ടാണ് രാഹുൽ ഗാന്ധി പ്രധാനമന്ത്രിയോട് മറുപടി തേടിയത്.
"ദീപങ്ങൾ തെളിക്കാൻ സർക്കാരിന്റെ കൈയിൽ പണമുണ്ട്, പിന്നെന്തുകൊണ്ട് ഞങ്ങളുടെ ഹോസ്റ്റലുകൾക്കായി പണമില്ല?" എന്ന് ഇൻഡോറിലെ പരിപാടിക്കിടെ ഗ്രാമത്തിൽ നിന്ന് പഠിക്കാനെത്തിയ ഒരു പെൺകുട്ടി തന്നോട് ചോദിച്ചതായി രാഹുൽ ഗാന്ധി ഞായറാഴ്ച സോഷ്യൽ മീഡിയയിൽ കുറിച്ചു. ഹോസ്റ്റൽ സൗകര്യങ്ങൾ ലഭ്യമല്ലാത്തതിനാൽ വൻതുക വാടക നൽകി പേയിംഗ് ഗസ്റ്റ് (PG) കേന്ദ്രങ്ങളിൽ നിൽക്കേണ്ടിവരുന്ന വിദ്യാർത്ഥിനികൾ കടുത്ത സാമ്പത്തിക-മാനസിക സമ്മർദ്ദമാണ് അനുഭവിക്കുന്നത്. സുരക്ഷിതമായ താമസസൗകര്യം ലഭിക്കാത്തത് കാരണം പല പെൺകുട്ടികളും പഠനം പാതിവഴിയിൽ ഉപേക്ഷിക്കേണ്ട അവസ്ഥയിലാണെന്നും രാഹുൽ ചൂണ്ടിക്കാട്ടി.
വിദ്യാർത്ഥികൾക്ക് ലഭിക്കുന്ന അലവൻസുകൾ വിലക്കയറ്റത്തിന് അനുസൃതമായി വർദ്ധിപ്പിക്കുന്നില്ലെന്നും അഴിമതി കാരണം ആനുകൂല്യങ്ങൾ തടസ്സപ്പെടുകയാണെന്നും അദ്ദേഹം ആരോപിച്ചു. ഈ കൊച്ചുപെൺകുട്ടിയുടെ ചോദ്യത്തിന് പ്രധാനമന്ത്രിയുടെ കൈയിൽ മറുപടിയുണ്ടോയെന്നും രാഹുൽ ചോദിച്ചു. ഇതിന് പിന്നാലെ, അടിസ്ഥാന സൗകര്യങ്ങൾ, അധ്യാപകരുടെ നിയമനം, ഹോസ്റ്റലുകൾ, തൊഴിൽ അവസരങ്ങൾ എന്നിവ ഉറപ്പാക്കുന്നതിൽ പരാജയപ്പെട്ട കേന്ദ്ര സർക്കാർ, പരസ്യങ്ങൾക്കായി വൻതുക ധൂർത്തടിക്കുകയാണെന്ന് കോൺഗ്രസ് നേതാവ് പവൻ ഖേരയും വിമർശിച്ചു.
വിദ്യാർത്ഥികൾ ചോദ്യങ്ങൾ ചോദിക്കാൻ ധൈര്യപ്പെടുന്നവരായതുകൊണ്ട് നിലവിലെ ഭരണസംവിധാനത്തിന് അവരെ ഭയമാണെന്നും അവർക്ക് വേണ്ടത് ചിന്തിക്കുന്ന വിദ്യാർത്ഥികളെയല്ല, മറിച്ച് ‘അന്ധഭക്തരെ’യാണെന്നും രാഹുൽ പറഞ്ഞു. പ്രധാനമന്ത്രി നരേന്ദ്ര മോദി, ആഭ്യന്തരമന്ത്രി അമിത് ഷാ, ദേശീയ സുരക്ഷാ ഉപദേഷ്ടാവ് അജിത് ഡോവൽ, ആർഎസ്എസ് തലവൻ മോഹൻ ഭാഗവത്, വ്യവസായികളായ ഗൗതം അദാനി, മുകേഷ് അദാനി എന്നിവരടങ്ങുന്ന വ്യവസ്ഥിതി വിദ്യാർത്ഥികളുടെ ചോദ്യങ്ങളെ അടിച്ചമർത്താനാണ് ശ്രമിക്കുന്നതെന്നും അദ്ദേഹം ആരോപിച്ചു. പരീക്ഷാ ക്രമക്കേടുകൾ, തൊഴിലില്ലായ്മ, സ്കോളർഷിപ്പ് വിതരണത്തിലെ തടസ്സങ്ങൾ തുടങ്ങിയ വിഷയങ്ങൾ ഉന്നയിച്ചായിരുന്നു ഇൻഡോറിൽ 'ഛാത്രോം കീ ഗൂഞ്ച്' അഞ്ചാം പതിപ്പ് നടന്നത്.
