'വോട്ട് ചോരി': തിരഞ്ഞെടുപ്പ് കമ്മീഷണർക്കെതിരെ പ്രതിപക്ഷം സുപ്രീം കോടതിയിലേക്ക്; 'ചലോ ഡൽഹി' തിങ്കളാഴ്ച

'വോട്ട് ചോരി' ആരോപണങ്ങളിൽ മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ സുപ്രീം കോടതിയിൽ ഹർജി സമർപ്പിക്കുമെന്ന് കോൺഗ്രസ് നേതാവ് രാഹുൽ ഗാന്ധി പ്രഖ്യാപിച്ചു. കോൺഗ്രസ് ആസ്ഥാനമായ ഇന്ദിരാ ഭവനിൽ വിളിച്ചുചേർത്ത വാർത്താസമ്മേളനത്തിലാണ് അദ്ദേഹം ഇക്കാര്യം അറിയിച്ചത്. വരുന്ന തിങ്കളാഴ്ച സുപ്രീംകോടതിയിലേക്ക് പ്രതിഷേധ മാർച്ച് നടത്തിക്കൊണ്ടായിരിക്കും ഹർജി സമർപ്പിക്കുക.

ഇന്ത്യാ സഖ്യത്തിന്റെ നേതൃത്വത്തിൽ 'ചലോ ഡൽഹി- മാർച്ച് ഫോർ ഡെമോക്രസി' എന്ന പേരിൽ തിങ്കളാഴ്ച ഉച്ചയ്ക്ക് 1.30-നാണ് പ്രതിഷേധ മാർച്ച് ആരംഭിക്കുന്നത്. കൊണാട്ട് പ്ലേസ്-ബരഖംബ റോഡ് ജങ്ഷനിൽ നിന്ന് തുടങ്ങുന്ന മാർച്ച് സുപ്രീംകോടതിയിൽ അവസാനിക്കും. തുടർന്ന് ഉച്ചയ്ക്ക് 3.00 മണിയോടെ കോടതിയിൽ ഹർജി സമർപ്പിക്കുമെന്നും രാഹുൽ ഗാന്ധി വിശദീകരിച്ചു.

മുഖ്യ തിരഞ്ഞെടുപ്പ് കമ്മിഷണറായി ഗ്യാനേഷ് കുമാറിന് അധികകാലം തുടരാനാകില്ലെന്നും അദ്ദേഹം സ്വയം രാജിവെച്ച് ഒഴിയണമെന്നും രാഹുൽ ആവശ്യപ്പെട്ടു. ഗ്യാനേഷ് കുമാറിന് ഇപ്പോൾ ഉറങ്ങാൻപോലും കഴിയാത്ത സാഹചര്യമാണുള്ളത്. നടന്നിട്ടുള്ള ക്രമക്കേടുകൾക്ക് പിന്നിലെ ബുദ്ധികേന്ദ്രം അദ്ദേഹമല്ലെന്നും ഇതിനു പിന്നിൽ കൂടുതൽ ശക്തരായ ചിലരാണെന്നും രാഹുൽ ഗാന്ധി ആരോപിച്ചു.

പ്രതിഷേധങ്ങൾ ഭയന്ന് ഡൽഹിയെ പൂർണ്ണമായും പൊലീസ് കോട്ടയാക്കി മാറ്റിയിരിക്കുകയാണെന്ന് രാഹുൽ കുറ്റപ്പെടുത്തി. തലസ്ഥാനത്തേക്ക് എത്തുന്നവരെ വഴിമധ്യേ തടയുന്ന സാഹചര്യമാണുള്ളത്. ബസുകളിലും ട്രെയിനുകളിലും എത്തുന്നവരെ പോലും പൊലീസ് പരിശോധിക്കുകയും തടയുകയും ചെയ്യുന്നു. എന്നിരുന്നാലും, തങ്ങളുടെ മതം ഭരണഘടനയാണെന്നും മുഖ്യ തിരഞ്ഞെടുപ്പ് കമ്മിഷണർ രാജിവെക്കുന്നത് വരെ രാജ്യത്തെ യുവാക്കൾ പോരാട്ടം തുടരുമെന്നും അദ്ദേഹം വ്യക്തമാക്കി.

ഇത് നരേന്ദ്ര മോദിയുടെയോ രാഹുൽ ഗാന്ധിയുടെയോ വ്യക്തിപരമായ പോരാട്ടമല്ലെന്ന് അദ്ദേഹം ചൂണ്ടിക്കാട്ടി. രാജ്യത്തെ മുഴുവൻ ജനങ്ങളുടെയും അഭിപ്രായപ്രകടന സ്വാതന്ത്ര്യം സംരക്ഷിക്കാനുള്ള നിർണ്ണായക പോരാട്ടമാണിത്. അതിനാൽ രാജ്യത്തെ യുവാക്കളും പ്രതിപക്ഷ പാർട്ടി പ്രവർത്തകരും ഈ പ്രതിഷേധത്തിന്റെ ഭാഗമാകണമെന്ന് രാഹുൽ ഗാന്ധി അഭ്യർത്ഥിച്ചു.