ടാറ്റാ സൺസ് തർക്കവുമായി ബന്ധപ്പെട്ട് കേന്ദ്ര ധനമന്ത്രി നിർമല സീതാരാമന് ശക്തമായ ചോദ്യങ്ങളിലൂടെ രാഹുൽ ഗാന്ധി എക്സിൽ മറുപടി നൽകി. ടാറ്റാ ട്രസ്റ്റ്സിനെയും ടാറ്റാ സൺസിനെയും കേന്ദ്ര ആഭ്യന്തരമന്ത്രി അമിത് ഷായുടെ വസതിയിൽ വിളിച്ചുവരുത്തിയത് എന്തിനാണെന്നും, അങ്ങനെ സ്വീകരിക്കേണ്ട എന്ത് നിയമപരവും വാണിജ്യപരവുമായ കാര്യമാണ് ഉണ്ടായിരുന്നതെന്നും രാഹുൽ ചോദിച്ചു. നേരത്തെ ടാറ്റാ ഗ്രൂപ്പിനെ കേന്ദ്രസർക്കാർ ക്രിമിനൽ ബുദ്ധിയോടെ തകർക്കുകയാണെന്നും മോദിയും അമിത് ഷായും വ്യവസായരംഗത്തെ കളിപ്പാവകളാക്കി മാറ്റുകയാണെന്നും രാഹുൽ ആരോപിച്ചിരുന്നു. ഇതിനെതിരെ വ്യവസായപ്രമുഖർ ഭയം കാരണം നിശബ്ദരാണെന്നും അദ്ദേഹം ചൂണ്ടിക്കാട്ടിയിരുന്നു.
പേരെടുത്തു പറയാതെ അദാനിയെ 'അടുത്ത ചങ്ങാതി' എന്ന് വിശേഷിപ്പിച്ചുകൊണ്ട് രാഹുൽ ഗാന്ധി പോസ്റ്റിൽ ചോദ്യങ്ങൾ ഉന്നയിച്ചു. നിങ്ങളുടെ അടുത്ത ചങ്ങാതി എപ്പോഴാണ് ഈ കളിയിലേക്ക് പ്രവേശിക്കുന്നതെന്നും, ടാറ്റയുടെ ഏതെല്ലാം ഭാഗങ്ങളാണ് ചങ്ങാതിക്ക് ലഭിക്കാൻ പോകുന്നതെന്നും അദ്ദേഹം ചോദിച്ചു. കേന്ദ്രസർക്കാരിന്റെ മൂന്നോ നാലോ അടുത്ത കൂട്ടാളികൾ ഒഴികെ ഇന്ത്യയിലെ ബാക്കി എല്ലാ വ്യവസായികൾക്കും നിങ്ങളോട് വെറുപ്പാണെന്നും, അവരെ പ്രകോപിപ്പിക്കാൻ പ്രത്യേകിച്ച് ഒന്നും ചെയ്യേണ്ടതില്ലെന്നും രാഹുൽ ഗാന്ധി കൂട്ടിച്ചേർത്തു.
എല്ലാ വിഷയങ്ങളെയും രാഷ്ട്രീയവൽക്കരിക്കുന്നത് രാഹുൽ അവസാനിപ്പിക്കണമെന്നായിരുന്നു ധനമന്ത്രി നിർമല സീതാരാമന്റെ പ്രതികരണം. വാണിജ്യപരവും നിയമപരവുമായ വിഷയങ്ങളെ കുറ്റകൃത്യമായി ചിത്രീകരിക്കുന്നത് അംഗീകരിക്കാനാകില്ലെന്നും മന്ത്രി വ്യക്തമാക്കുകയുണ്ടായി. ടാറ്റാ സൺസ് ചെയർമാനായി എൻ. ചന്ദ്രശേഖരനെ വീണ്ടും നിയമിച്ചതിന് പിന്നാലെയാണ് കമ്പനിക്കുള്ളിൽ തർക്കം രൂക്ഷമായത്. ചന്ദ്രശേഖരന്റെ പുനർനിയമനത്തിന് നിയമസാധുതയില്ലെന്ന് ചൂണ്ടിക്കാട്ടി ടാറ്റാ ട്രസ്റ്റ്സ് ചെയർമാൻ നോയൽ ടാറ്റാ ടാറ്റാ സൺസ് കമ്പനി സെക്രട്ടറിക്ക് കത്തുനൽകിയതോടെയാണ് വിഷയം കൂടുതൽ സങ്കീർണ്ണമായത്.
