തിരുവനന്തപുരം: പ്രതിപക്ഷനേതാവ് പിണറായി വിജയനും കുടുംബത്തിനുമെതിരെയുള്ള അന്വേഷണത്തെ രാഷ്ട്രീയമായി പ്രതിരോധിക്കാന് നീക്കങ്ങളുമായി സി.പി.എം. വിഷയത്തില് ഇടത് മുന്നണിയിലെ എല്ലാ ഘടകകക്ഷികളെയും അണിനിരത്തി പ്രതിരോധ നിര തീര്ക്കാനാണ് പാര്ട്ടി ആലോചിക്കുന്നത്. ഇതിന്റെ ഭാഗമായി ഉടന് തന്നെ എല്.ഡി.എഫ് യോഗം വിളിച്ചുചേര്ത്തേക്കും. അതേസമയം, കേസില് പോലീസ് അന്വേഷണം നടക്കുന്നതില് തെറ്റില്ലെന്ന നിലപാടിലാണ് സി.പി.ഐ.
ഇ.ഡി നടപടികളിലെ രാഷ്ട്രീയം ചൂണ്ടിക്കാണിക്കുമ്പോഴും, ഉയര്ന്നുവന്ന ആരോപണങ്ങളിലെ സത്യാവസ്ഥ പൊതുജനങ്ങള്ക്ക് മുന്നില് ബോധ്യപ്പെടാന് അന്വേഷണം തന്നെയാണ് നല്ലതെന്നാണ് സി.പി.ഐ നേതാക്കളുടെ നിലപാട്. സി.പി.ഐക്ക് പുറമെ മറ്റ് ഘടകകക്ഷികളും പരസ്യമായ ന്യായീകരണങ്ങള്ക്ക് മുതിരാതെ വിഷയത്തില് നിന്നും അകലം പാലിക്കുകയാണ്. സി.പി.എം സംസ്ഥാന സെക്രട്ടറി എം.വി. ഗോവിന്ദന് ഒഴികെ മറ്റ് മുതിര്ന്ന നേതാക്കളാരും കേസിന്റെ വിശദാംശങ്ങളിലേക്ക് കടന്ന് പ്രതിരോധിക്കാന് തയ്യാറാകാത്തത് പാര്ട്ടിനുള്ളിലും ഭിന്നസ്വരമുണ്ടെന്ന പ്രചാരണത്തിന് ഇടയാക്കിയിട്ടുണ്ട്.
പാര്ട്ടിക്കുള്ളില് ആശയക്കുഴപ്പമുണ്ടെന്ന പ്രചാരണം മറികടക്കാനായി വിഷയത്തില് വിശദമായ ലഘുലേഖ പ്രസിദ്ധീകരിക്കാന് സി.പി.എം സംസ്ഥാന കമ്മിറ്റി തീരുമാനിച്ചിട്ടുണ്ട്. അന്വേഷണം പ്രഖ്യാപിച്ചതിന് പിന്നാലെ തന്നെ പ്രാദേശികതലത്തില് പ്രതിഷേധങ്ങള്ക്ക് ആഹ്വാനം നല്കിയതും പാര്ട്ടി ഒറ്റക്കെട്ടാണെന്ന് വരുത്തിതീര്ക്കാനാണ്. വിഷയത്തില് നിലപാട് വ്യക്തമാക്കാന് സി.പി.ഐ സംസ്ഥാന സെക്രട്ടേറിയറ്റ് യോഗം ചേരാനിരിക്കെ, മുന്നണിയെ ഒന്നാകെ പ്രതിരോധത്തിന്റെ ഭാഗമാക്കാന് ഘടകകക്ഷി നേതാക്കളുമായി സി.പി.എം നേരിട്ട് ചര്ച്ച നടത്തേണ്ടി വരും.
