സമുദ്രത്തിൽ പാക് നാവികസേന 1991-ലെ കരാർ ലംഘിച്ചതായി ഇന്ത്യ; ഇന്ത്യൻ കപ്പലിൽ ഇടിച്ചു; കടുത്ത പ്രതിഷേധം രേഖപ്പെടുത്തി ഇന്ത്യ
അന്താരാഷ്ട്ര സമുദ്രമേഖലയിൽ കൃത്യമായ മുന്നറിയിപ്പുകളില്ലാതെ നീങ്ങിയ പാകിസ്ഥാൻ നാവികസേനാ കപ്പൽ ഇന്ത്യൻ പട്രോളിംഗ് കപ്പലിൽ വന്ന് ഇടിച്ചു. ഒമാൻ കടൽത്തീരത്തുനിന്ന് ഏകദേശം 200 കിലോമീറ്റർ അകലെയാണ് സംഭവം നടന്നത്. ഏറ്റുമുട്ടലിൽ ഇന്ത്യൻ കപ്പലിന് കാര്യമായ കേടുപാടുകളൊന്നും സംഭവിച്ചിട്ടില്ലെന്നാണ് റിപ്പോർട്ടുകൾ സൂചിപ്പിക്കുന്നത്. അന്താരാഷ്ട്ര മേഖലയിലെ സമുദ്ര നീക്കങ്ങളെക്കുറിച്ചും സൈനിക അഭ്യാസങ്ങളെക്കുറിച്ചും മുൻകൂട്ടി അറിയിക്കണമെന്ന ഉഭയകക്ഷി ധാരണ പാകിസ്ഥാൻ ലംഘിച്ചതിൽ ഇന്ത്യ ശക്തമായ പ്രതിഷേധം രേഖപ്പെടുത്തി.
സംഭവത്തിന് പിന്നാലെ ഡൽഹിയിലെ പാകിസ്ഥാൻ നയതന്ത്ര പ്രതിനിധിയെ വിളിച്ചുവരുത്തി ഇന്ത്യ കടുത്ത അമർഷമറിയിച്ചു. പാക് നാവിക വിഭാഗത്തിന്റെ ഈ പെരുമാറ്റം തികച്ചും പ്രൊഫഷണൽ അല്ലാത്തതും അംഗീകരിക്കാനാകാത്തതുമാണെന്ന് ഇന്ത്യ വ്യക്തമാക്കി. സൈനിക നീക്കങ്ങളും പരിശീലനങ്ങളും സംബന്ധിച്ച് മുൻകൂർ വിവരം നൽകുന്നതിനായി 1991 ഏപ്രിലിൽ ഇന്ത്യയും പാകിസ്ഥാനും ഒപ്പുവെച്ച സുപ്രധാന കരാറിലെ ആർട്ടിക്കിൾ 10-ന്റെ നഗ്നമായ ലംഘനമാണ് ഈ സംഭവമെന്ന് വിദേശകാര്യ മന്ത്രാലയം ചൂണ്ടിക്കാട്ടി.
ഭാവിയിൽ ഇത്തരം അപകടകരമായ സംഭവങ്ങൾ ആവർത്തിക്കാതിരിക്കാൻ പാക് സൈനിക യൂണിറ്റുകൾക്ക് ആവശ്യമായ ജാഗ്രതാനിർദ്ദേശം നൽകണമെന്നും ഇരുരാജ്യങ്ങളും തമ്മിലുള്ള കരാറുകൾ കർശനമായി പാലിക്കണമെന്നും പാക് പ്രതിനിധിയോട് ആവശ്യപ്പെട്ടു. ഇതിനുപുറമേ, ഇസ്ലാമാബാദിലെ ഇന്ത്യൻ എംബസി വഴി പാകിസ്ഥാൻ വിദേശകാര്യ മന്ത്രാലയത്തെ നേരിട്ടും സമാനമായ പ്രതിഷേധം അറിയിക്കാൻ നിർദ്ദേശം നൽകിയിട്ടുണ്ട്.
MOST POPULAR
EDITOR'S PICK 6
TRENDING
GET DAILY UPDATES
Newsletter
Get daily news updates directly to your inbox.