ബെംഗളൂരു: പ്രമുഖ ഓൺലൈൻ ഫുഡ് ഡെലിവറി പ്ലാറ്റ്‌ഫോമുകളായ സ്വിഗ്ഗിയുടെയും സൊമാറ്റോയുടെയും സേവനം അവസാനിപ്പിക്കാൻ ബെംഗളൂരുവിലെ ആയിരത്തിലധികം ഹോട്ടലുകൾ ഒരുങ്ങുന്നു. ഓഗസ്റ്റ് 15-നകം തങ്ങളുടെ ആവശ്യങ്ങൾ പരിഗണിച്ചില്ലെങ്കിൽ ഇരു പ്ലാറ്റ്‌ഫോമുകളുമായുള്ള സഹകരണം പൂർണമായും അവസാനിപ്പിക്കുമെന്ന് റെസ്റ്റോറന്റ് അസോസിയേഷനുകൾ മുന്നറിയിപ്പ് നൽകി.
ഭക്ഷണത്തിന്റെ ഗുണനിലവാരമോ സേവനത്തിലെ പ്രശ്നങ്ങളോ അല്ല പ്രതിഷേധത്തിന് കാരണം. മറിച്ച്, ഡെലിവറി ആപ്പുകൾ ഈടാക്കുന്ന ഉയർന്ന കമ്മീഷൻ, ഹോട്ടലുകളുടെ സമ്മതമില്ലാതെ നടപ്പാക്കുന്ന ഡിസ്കൗണ്ടുകൾ, വിവിധ ചാർജുകൾ എന്നിവയാണ് വ്യാപാരികളെ കടുത്ത പ്രതിഷേധത്തിലേക്ക് നയിച്ചിരിക്കുന്നത്.
കെട്ടിട വാടക, ജീവനക്കാരുടെ ശമ്പളം, അസംസ്കൃത വസ്തുക്കളുടെ വിലക്കയറ്റം തുടങ്ങിയ കാരണങ്ങളാൽ ഹോട്ടൽ വ്യവസായം ഇതിനോടകം സാമ്പത്തിക പ്രതിസന്ധി നേരിടുകയാണെന്ന് ഹോട്ടലുടമകൾ ചൂണ്ടിക്കാട്ടുന്നു. ഇതിനിടയിൽ ഡെലിവറി ആപ്പുകളുടെ അമിത കമ്മീഷനും അധിക സാമ്പത്തിക ബാധ്യതകളും ലാഭം ഇല്ലാതാക്കുകയാണെന്നാണ് അവരുടെ ആരോപണം.
ഉപഭോക്താക്കളെ ആകർഷിക്കാൻ റെസ്റ്റോറന്റുകളുടെ അനുമതിയില്ലാതെ വിവിധ ഓഫറുകളും ഡിസ്കൗണ്ടുകളും നൽകുകയും, അതിന്റെ സാമ്പത്തികഭാരം ഹോട്ടലുകൾക്കുമേൽ ചുമത്തുകയും ചെയ്യുന്നുവെന്നാണ് പ്രധാന പരാതി. കൂടാതെ, വ്യക്തമായ സമ്മതമില്ലാതെ പ്രമോഷണൽ ക്യാമ്പെയ്‌നുകൾക്കും പരസ്യങ്ങൾക്കുമായി ഹോട്ടലുകളുടെ വരുമാനത്തിൽ നിന്ന് തുക ഈടാക്കുന്നതായും അസോസിയേഷനുകൾ ആരോപിക്കുന്നു.
ഉപഭോക്താക്കൾ പരാതിപ്പെട്ടാൽ വേണ്ടത്ര പരിശോധനയില്ലാതെ ഹോട്ടലുകളുടെ അക്കൗണ്ടിൽ നിന്ന് പണം കുറയ്ക്കുന്നതും വ്യാപാരികളെ ആശങ്കപ്പെടുത്തുന്നുണ്ട്. അതുപോലെ, ഭക്ഷണം തയ്യാറാക്കിയതിന് ശേഷം ഓർഡർ റദ്ദാക്കുന്ന സാഹചര്യത്തിൽ സംഭവിക്കുന്ന മുഴുവൻ നഷ്ടവും ഹോട്ടലുകൾ തന്നെ വഹിക്കേണ്ടിവരുന്നതായും അവർ ചൂണ്ടിക്കാട്ടി.
ഈ വിഷയങ്ങളിൽ സ്വിഗ്ഗിയും സൊമാറ്റോയും അനുകൂലമായ തീരുമാനം കൈക്കൊള്ളാത്ത പക്ഷം ഓഗസ്റ്റ് 15 മുതൽ സേവനങ്ങൾ പൂർണമായി നിർത്തിവയ്ക്കാനാണ് ബെംഗളൂരുവിലെ ആയിരത്തിലധികം ഹോട്ടലുകളുടെ തീരുമാനം. പ്രശ്നം പരിഹരിക്കാൻ ഉടൻ ചർച്ചകൾ ആരംഭിക്കണമെന്നാണ് റെസ്റ്റോറന്റ് അസോസിയേഷനുകളുടെ ആവശ്യം.
