ന്യൂയോര്‍ക്ക്: ചൈനീസ് ചാരവനിത ആലിസ് ഹുവാങ്ങുമായുള്ള തന്റെ വ്യക്തിപരമായ ബന്ധത്തെക്കുറിച്ച് എന്‍വിഡിയയിലെ ഉന്നത ഉദ്യോഗസ്ഥരെ മുന്‍ സി.ഇ.ഒ ജെന്സന് ഹുവാങ് തെറ്റിദ്ധരിപ്പിച്ചതായി റിപ്പോര്‍ട്ട്. കമ്പനിയുടെ ജനറല്‍ കൗണ്‍സല്‍ ടിം ടെറ്റര്‍, ചീഫ് മാര്‍ക്കറ്റിംഗ് ഓഫീസര്‍ അലിസണ്‍ വാഗണ്‍ഫെല്‍ഡ് എന്നിവരുള്‍പ്പെടെയുള്ള മുതിര്‍ന്ന ഉദ്യോഗസ്ഥരോട് ആലിസുമായുള്ള കൂടിക്കാഴ്ചകള്‍ കേവലം സാധാരണ ബിസിനസ്സ് ഇടപാടുകള്‍ മാത്രമാണെന്നാണ് ജെന്സന് ഹുവാങ് വിശദീകരിച്ചിരുന്നത്. കമ്പനിക്കുള്ളിലെ ആശയവിനിമയ രേഖകള്‍ ഉദ്ധരിച്ച് വാര്‍ത്താ ഏജന്‍സിയായ റോയിട്ടേഴ്‌സാണ് ഇക്കാര്യം പുറത്തുവിട്ടത്.
വിവാഹേതര ബന്ധങ്ങള്‍ പുറത്തായതിനെത്തുടര്‍ന്ന് വ്യാഴാഴ്ചയാണ് ജെന്സന് ഹുവാങ് എന്‍വിഡിയ സി.ഇ.ഒ സ്ഥാനം രാജിവെച്ചത്. എന്‍വിഡിയയുടെ ഉപഭോക്തൃ കമ്പനിയായിരുന്ന 'മെഗാസ്പീഡ് ഇന്റര്‍നാഷണലിലെ' മുന്‍ മുതിര്‍ന്ന ഉദ്യോഗസ്ഥയായിരുന്നു ആലിസ് ഹുവാങ്. ഇരുവരുടെയും പേരിനൊപ്പം 'ഹുവാങ്' എന്നുണ്ടെങ്കിലും ഇവര്‍ തമ്മില്‍ കുടുംബബന്ധമില്ല. ഞായറാഴ്ച പുറത്തിറക്കിയ പ്രസ്താവനയില്‍ തന്റെ പ്രവൃത്തികളില്‍ ഭാര്യയോടും കമ്പനിയോടും ജെന്സന് ക്ഷമാപണം നടത്തിയിരുന്നെങ്കിലും ആലിസിന്റെ പേര് പരാമര്‍ശിച്ചിരുന്നില്ല. 2023 ഡിസംബര്‍ മുതല്‍ അമേരിക്കയിലും ചൈനയിലുമടക്കം ഇരുവരും ഒരുമിച്ചുള്ള ചിത്രങ്ങള്‍ പുറത്തുവന്നിട്ടുണ്ട്.
ആലിസ് ഹുവാങ്ങിനെതിരെ അമേരിക്കന്‍ ഏജന്‍സികള്‍ ചാരവൃത്തി സംശയിക്കുന്ന സാഹചര്യത്തിലാണ് ഇവരുമായുള്ള ജെന്സന് ഹുവാങ്ങിന്റെ ബന്ധം വലിയ വിവാദമായത്. ആലിസ് ചൈനയ്ക്ക് വേണ്ടി ചാരവൃത്തി നടത്തിയെന്ന ആരോപണം ചൈന നിഷേധിച്ചിട്ടുണ്ട്. അതേസമയം, ആലിസിനെതിരെയുള്ള സംശയങ്ങളെക്കുറിച്ച് അമേരിക്കന്‍ സര്‍ക്കാര്‍ തന്നെ അറിയിച്ചിരുന്നില്ലെന്ന് ജെന്സന് ഹുവാങ് നേരത്തെ വ്യക്തമാക്കിയിരുന്നു. സംഭവത്തില്‍ സ്വതന്ത്ര അന്വേഷണം നടത്തുന്നതിനായി എന്‍വിഡിയ ബോര്‍ഡ് അംഗങ്ങള്‍ പ്രമുഖ നിയമസ്ഥാപനമായ 'വാക്‌റ്റെല്‍, ലിപ്റ്റണ്‍, റോസന്‍ & കാറ്റ്‌സിനെ' ചുമതലപ്പെടുത്തിയിട്ടുണ്ട്.
2025 ഒക്ടോബറില്‍ ഇരുവരുടെയും കൂടിക്കാഴ്ചകളെക്കുറിച്ച് 'ന്യൂയോര്‍ക്ക് ടൈംസ്' വാര്‍ത്ത നല്‍കിയപ്പോള്‍ പത്രത്തിനെതിരെ നിയമനടപടി സ്വീകരിക്കുന്ന കാര്യം ജെന്സന് ഉദ്യോഗസ്ഥരുമായി ചര്‍ച്ച ചെയ്തിരുന്നെങ്കിലും പിന്നീട് അതില്‍ നിന്ന് പിന്മാറുകയായിരുന്നു. ആലിസിന് പുറമെ എന്‍വിഡിയയിലെ രണ്ട് വനിതാ ജീവനക്കാരുമായും ജെന്സന് ബന്ധമുണ്ടായിരുന്നതായി റിപ്പോര്‍ട്ടുകളുണ്ട്. എ.ഐ (AI) തരംഗത്തിലൂടെ എന്‍വിഡിയയെ ലോകത്തെ ഏറ്റവും മൂല്യമുള്ള ചിപ്പ് നിര്‍മ്മാണ കമ്പനികളിലൊന്നാക്കി മാറ്റിയ ജെന്സന് ഹുവാങ്ങിന്റെ പടിയിറക്കം ടെക് ലോകത്തെ ഞെട്ടിച്ചിരിക്കുകയാണ്. വിവാദങ്ങളെത്തുടര്‍ന്ന് ഒക്ടോബര്‍ ആറിലെ ഉയര്‍ന്ന നിരക്കില്‍ നിന്ന് എന്‍വിഡിയ ഓഹരികള്‍ 30 ശതമാനത്തിലധികം ഇടിയുകയും കമ്പനിയുടെ വിപണി മൂല്യത്തില്‍ 1.8 ട്രില്യണ്‍ ഡോളറിലധികം നഷ്ടമുണ്ടാവുകയും ചെയ്തു.
ചൈനീസ് ചാരവനിതയുമായുള്ള ബന്ധം മറച്ചുവെച്ചു; ഉന്നത ഉദ്യോഗസ്ഥരെ ജെന്സന് ഹുവാങ് തെറ്റിദ്ധരിപ്പിച്ചതായി റിപ്പോര്‍ട്ട്
ചൈനീസ് വ്യവസായിയുമായുള്ള ബന്ധം മറച്ചുവെച്ച് എൻവിഡിയ ഉന്നത ഉദ്യോഗസ്ഥരെ ജെൻസൻ ഹുവാങ് തെറ്റിദ്ധരിപ്പിച്ചതായി റിപ്പോർട്ട്.
Jaihind TV News Report
Jaihind TV Web Desk
3 min read
561 reads
