ഫിഫ ലോകകപ്പിലെ ഗ്രൂപ്പ് എഫ് പോരാട്ടത്തില്‍ സ്വീഡനെ ഒന്നിനെതിരെ അഞ്ച് ഗോളുകള്‍ക്ക് തകര്‍ത്തുവിട്ട് നെതര്‍ലന്‍ഡ്‌സ് ഗ്രൂപ്പില്‍ തങ്ങളുടെ ആധിപത്യം ഉറപ്പിച്ചു. ഹൂസ്റ്റണ്‍ സ്റ്റേഡിയത്തില്‍ നടന്ന ഏകപക്ഷീയമായ മത്സരത്തില്‍ യുവതാരം ബ്രയാന്‍ ബ്രോബി, സൂപ്പര്‍ താരം കോഡി ഗാക്‌പോ എന്നിവരുടെ ഇരട്ടഗോള്‍ കരുത്തിലാണ് ഡച്ച് പട വമ്പന്‍ വിജയം സ്വന്തമാക്കിയത്. ആക്രമണ ഫുട്‌ബോളിന്റെ ആവേശക്കാഴ്ചകള്‍ സമ്മാനിച്ച മത്സരത്തില്‍ തുടക്കം മുതല്‍ നെതര്‍ലന്‍ഡ്‌സ് വ്യക്തമായ മേധാവിത്വം പുലര്‍ത്തിയിരുന്നു. കളി അവസാനിക്കാന്‍ മിനിറ്റുകള്‍ മാത്രം ബാക്കിയുള്ളപ്പോള്‍ ക്രിസെന്‍സിയോ സമ്മര്‍വില്ലിയും നെതര്‍ലന്‍ഡ്‌സിനായി ലക്ഷ്യം കണ്ടപ്പോള്‍ ആന്റണി എലാംഗയാണ് സ്വീഡന്റെ ആശ്വാസ ഗോള് നേടിയത്.
കോച്ച് റൊണാള്‍ഡ് കോമാന്‍ ആദ്യ ഇലവനില്‍ വരുത്തിയ മാറ്റങ്ങള്‍ തുടക്കത്തില്‍ തന്നെ ഫലം കാണുന്നതാണ് ഹൂസ്റ്റണില്‍ കണ്ടത്. സമ്മര്‍വില്ലിക്ക് പകരം ആദ്യ ഇലവനില്‍ സ്ഥാനം പിടിച്ച സണ്ടര്‍ലാന്‍ഡ് സ്ട്രൈക്കര്‍ ബ്രയാന്‍ ബ്രോബി പരിശീലകന്റെ വിശ്വാസം കാത്തു. അഞ്ചാം മിനിറ്റില്‍ കോഡി ഗാക്‌പോ നല്‍കിയ പാസില്‍ നിന്നും ഒരു ക്ലോസ് റേഞ്ച് ടാപ്പിലൂടെ ബ്രോബി നെതര്‍ലന്‍ഡ്‌സിനെ മുന്നിലെത്തിച്ചു. തുടര്‍ന്ന് 17-ാം മിനിറ്റില്‍ ഡെന്‍സല്‍ ഡംഫ്രീസിന്റെ അസിസ്റ്റില്‍ നിന്നും ബ്രോബി തന്റെ രണ്ടാം ഗോള് നേടി സ്വീഡിഷ് പ്രതിരോധത്തെ പൂര്‍ണ്ണമായി ഞെട്ടിച്ചു. ആദ്യ പകുതിയുടെ അവസാന മിനിറ്റുകളില്‍ ഗ്രഹാം പോട്ടറുടെ കീഴിലിറങ്ങിയ സ്വീഡന് തിരിച്ചടിക്കാന്‍ ശ്രമിച്ചെങ്കിലും ഡച്ച് ഗോള്‍കീപ്പര്‍ ബാര്‍ട്ട് വെര്‍ബ്രുഗന്റെ മികച്ച സേവുകള്‍ അവര്‍ക്ക് തടസമായി. ഇതിനിടെ സ്വീഡന്റെ ഗുസ്താഫ് ലാഗര്‍ബീല്‍കെ വലകുലുക്കിയെങ്കിലും റഫറി ഓഫ്സൈഡ് വിളിച്ചതോടെ ആദ്യ പകുതിയില്‍ നെതര്‍ലന്‍ഡ്‌സ് 2-0 ന് മുന്നിലായി.
രണ്ടാം പകുതി ആരംഭിച്ച് മിനിറ്റുകള്‍ക്കകം ലിവര്‍പൂള്‍ താരം കോഡി ഗാക്‌പോ സ്വീഡന്റെ തിരിച്ചുവരവ് പ്രതീക്ഷകള്‍ പൂര്‍ണ്ണമായും തകര്‍ത്തു കളഞ്ഞു. 47, 54 മിനിറ്റുകളില്‍ തകര്‍പ്പന്‍ ഫിനിഷിംഗിലൂടെ ഗാക്‌പോ ലക്ഷ്യം കണ്ടതോടെ നെതര്‍ലന്‍ഡ്‌സ് 4-0 ലീഡോടെ വിജയം ഉറപ്പിച്ചു. ഈ ഗോളുകളോടെ നെതര്‍ലന്‍ഡ്‌സിനായി ലോകകപ്പില്‍ ഏറ്റവും കൂടുതല്‍ ഗോളുകള്‍ നേടുന്ന താരങ്ങളുടെ പട്ടികയില്‍ ഇതിഹാസ താരം യോഹാന്‍ ക്രൈഫിനെ മറികടക്കാനും ഗാക്‌പോയ്ക്കായി എന്നത് ഈ മത്സരത്തിന്റെ സവിശേഷതയായി മാറി.
വമ്പന്‍ തോല്‍വിയിലേക്ക് നീങ്ങിയ സ്വീഡന് വേണ്ടി 58-ാം മിനിറ്റില്‍ പകരക്കാരനായി ഇറങ്ങിയ ന്യൂകാസില്‍ യുണൈറ്റഡ് താരം ആന്റണി എലാംഗ ഒരു ഗോള് മടക്കി. അലക്‌സാണ്ടര്‍ ഇസാക്കിന്റെ മികച്ച മുന്നേറ്റത്തില്‍ നിന്നും പന്ത് സ്വീകരിച്ച എലാംഗ ക്ലിനിക്കല്‍ ഫിനിഷിലൂടെയാണ് ഡച്ച് വല കുലുക്കിയത്. തുടര്‍ന്ന് സ്‌കോര്‍ ഉയര്‍ത്താന്‍ ഇരുടീമുകള്‍ക്കും അവസരങ്ങള്‍ ലഭിച്ചെങ്കിലും 89-ാം മിനിറ്റില്‍ പകരക്കാരനായി ഇറങ്ങിയ സമ്മര്‍വില്ലി കൂടി സ്‌കോര്‍ ചെയ്തതോടെ സ്വീഡന്റെ പതനം പൂര്‍ണ്ണമായി. ഈ വമ്പന്‍ ജയത്തോടെ ഗ്രൂപ്പ് എഫില്‍ നോക്കൗട്ട് സാധ്യതകള്‍ നെതര്‍ലന്‍ഡ്‌സ് കൂടുതല്‍ ശക്തമാക്കി. ടൂണിഷ്യക്കെതിരെയാണ് നെതര്‍ലന്‍ഡ്‌സിന്റെ അടുത്ത മത്സരം. സ്വീഡന് തങ്ങളുടെ അടുത്ത മത്സരത്തില്‍ ജപ്പാനെ നേരിടും.
ഹൂസ്റ്റണില്‍ ഡച്ച് ഗോള്‍വര്‍ഷം; സ്വീഡനെ 5-1 ന് തകര്‍ത്ത് നെതര്‍ലന്‍ഡ്‌സ്; ബ്രോബിക്കും ഗാക്‌പോയ്ക്കും ഇരട്ട ഗോള്
Jaihind TV News Report
Jaihind TV Web Desk
Updated Oct 12, 2026
3 min read
752 reads
