പാലക്കാട്: നെന്മാറ പോത്തുണ്ടി ഇരട്ടക്കൊലപാതക കേസില്‍ കൊല്ലപ്പെട്ട സുധാകരന്റെ കുടുംബത്തിന് ആശ്വാസവുമായി ആഭ്യന്തര മന്ത്രി രമേശ് ചെന്നിത്തല. സുധാകരന്റെ മകള്‍ക്ക് അടിയന്തരമായി ജോലി ലഭ്യമാക്കുന്നതിനുള്ള നടപടികള്‍ സ്വീകരിക്കുമെന്ന് അദ്ദേഹം കുടുംബത്തിന് ഉറപ്പുനല്‍കി.
കേസില്‍ വിധി പ്രസ്താവിക്കവേ, കൊല്ലപ്പെട്ട സുധാകരന്റെ മക്കള്‍ക്ക് ജോലി നല്‍കുന്ന കാര്യം സര്‍ക്കാര്‍ പരിഗണിക്കണമെന്ന് കോടതി നിര്‍ദ്ദേശിച്ചിരുന്നു. ഈ വിഷയം ചൂണ്ടിക്കാട്ടിയാണ് മന്ത്രിയുടെ ഇടപെടല്‍. മുഖ്യമന്ത്രിയുമായി നേരിട്ട് സംസാരിച്ച് ജോലി നല്‍കാനുള്ള നടപടികള്‍ വേഗത്തിലാക്കുമെന്ന് അദ്ദേഹം വ്യക്തമാക്കിയതായി കുടുംബാംഗങ്ങള്‍ പറഞ്ഞു.
സുധാകരന്റെ ഇളയ മകള്‍ക്കാണ് ജോലി നല്‍കാന്‍ ധാരണയായിരിക്കുന്നത്. പ്രായമായ മുത്തശ്ശനെയും മുത്തശ്ശിയെയും സംരക്ഷിക്കേണ്ട ചുമതല ഈ കുട്ടിക്കായതിനാല്‍ ജോലി അത്യന്താപേക്ഷിതമാണെന്ന് കുടുംബം കൂട്ടിച്ചേര്‍ത്തു. കേസിന്റെ വിചാരണ പൂര്‍ത്തിയാകാനും രേഖകള്‍ ലഭ്യമാകാനും വൈകിയതാണ് മുന്‍പ് പ്രഖ്യാപിച്ച സഹായങ്ങള്‍ നീണ്ടുപോകാന്‍ കാരണമായത്.
ജോലി ലഭ്യമാക്കുന്നതിനായി പാലക്കാട് കളക്ടറേറ്റില്‍ നിന്ന് എത്രയും വേഗം പ്രൊപ്പോസല്‍ അയക്കാന്‍ നിര്‍ദ്ദേശം നല്‍കിയിട്ടുണ്ട്. ഇതിനാവശ്യമായ അനുബന്ധ രേഖകളെല്ലാം കുടുംബം അധികൃതര്‍ക്ക് കൈമാറി. കോടതി നിര്‍ദ്ദേശവും ജനപ്രതിനിധികളുടെ ഇടപെടലും വന്നതോടെ സര്‍ക്കാര്‍ വേഗത്തില്‍ അനുകൂല തീരുമാനമെടുക്കുമെന്ന പ്രതീക്ഷയിലാണ് കുടുംബം.
നെന്മാറ ഇരട്ടക്കൊലപാതകം: കൊല്ലപ്പെട്ട സുധാകരന്റെ മകള്‍ക്ക് ജോലി ഉറപ്പുനല്‍കി ആഭ്യന്തര മന്ത്രി രമേശ് ചെന്നിത്തല
Jaihind TV News Report
Jaihind TV Web Desk
2 min read
200 reads
