തിരുവനന്തപുരം: സി.പി.എം പാർട്ടിയിലെ ആഭ്യന്തര സമിതിക്ക് മുന്നിലെത്തുന്ന പരാതികളെക്കുറിച്ചുള്ള ചോദ്യങ്ങളിൽ കൃത്യമായ മറുപടി നൽകാതെ വഴുതിമാറി സംസ്ഥാന സെക്രട്ടറി എം.വി. ഗോവിന്ദൻ. പാർട്ടിയിൽ ഇൻ്റേണൽ കമ്മിറ്റി നിലവിലുണ്ടെന്ന് സ്ഥിരീകരിച്ചെങ്കിലും, ഈ സമിതി ഏതൊക്കെ പരാതികളാണ് പരിഗണിക്കുന്നത് എന്ന് പരസ്യപ്പെടുത്താനാകില്ലെന്ന് അദ്ദേഹം വ്യക്തമാക്കി.
സുരേഷ് ബാബുവിനെ ജില്ലാ സെക്രട്ടറി സ്ഥാനത്തുനിന്ന് മാറ്റിയതുമായി ബന്ധപ്പെട്ട മാധ്യമ ചോദ്യങ്ങളോടും രൂക്ഷമായ ഭാഷയിലാണ് എം.വി. ഗോവിന്ദൻ പ്രതികരിച്ചത്. സുരേഷ് ബാബുവിനെ സ്ഥാനത്തുനിന്ന് മാറ്റിയതിന്റെ കാരണം മാധ്യമങ്ങളോട് പറയേണ്ട കാര്യമില്ലെന്ന് അദ്ദേഹം കടുപ്പിച്ചു പറഞ്ഞു. ആഭ്യന്തര സമിതിയുടെ പരിഗണനയിലുള്ള വിഷയങ്ങളെക്കുറിച്ചോ പാർട്ടി എടുത്ത നടപടികളെക്കുറിച്ചോ വിശദീകരിക്കാൻ തയ്യാറാകാതിരുന്നതോടെ, സിപിഎമ്മിലെ പരാതി പരിഹാര സംവിധാനങ്ങളുടെ സുതാര്യതയെച്ചൊല്ലിയുള്ള ചർച്ചകൾ കൂടുതൽ ശക്തമാകുകയാണ്.
