മുറസു ചുഴലിക്കാറ്റ് ആന്ധ്രാപ്രദേശിന് മുകളിൽ; കേരളത്തിൽ വിവിധ ജില്ലകളിൽ ശക്തമായ മഴയ്ക്കും യെല്ലോ അലർട്ടിനും സാധ്യത

തിരുവനന്തപുരം: കര തൊട്ട മുറസു ചുഴലിക്കാറ്റ് തെക്കൻ തീരദേശ ആന്ധ്രാപ്രദേശിന് മുകളിൽ ശക്തമായ ചുഴലിക്കാറ്റായി തുടരുന്നു. ഇത് വടക്ക്-വടക്കുപടിഞ്ഞാറ് ദിശയിൽ നീങ്ങി ഉച്ചയോടെ ചുഴലിക്കാറ്റായി ദുർബലപ്പെടാനും, ചൊവ്വാഴ്ച അർധരാത്രിയോടെ വീണ്ടും ശക്തി കുറഞ്ഞ് അതിതീവ്ര ന്യൂനമർദ്ദമായി മാറാനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

ഇതിന് പുറമെ ലക്ഷദ്വീപിന് മുകളിലും, തീരദേശ കർണാടകയ്ക്കും തെക്കൻ തമിഴ്നാടിനും മുകളിലായി മൂന്ന് ചക്രവാതച്ചുഴികൾ നിലനിൽക്കുന്നുണ്ട്. ഇവയുടെ സ്വാധീനഫലമായി കേരളത്തിൽ അടുത്ത ദിവസങ്ങളിൽ ഒറ്റപ്പെട്ട സ്ഥലങ്ങളിൽ ഇടിമിന്നലോട് കൂടിയ ശക്തമായ മഴയ്ക്കും (24 മണിക്കൂറിൽ 7 മുതൽ 11 സെ.മീ. വരെ) മണിക്കൂറിൽ 30-40 കിലോമീറ്റർ വേഗതയിൽ കാറ്റിനും സാധ്യതയുണ്ട്. ജാഗ്രതയുടെ ഭാഗമായി വിവിധ ജില്ലകളിൽ യെല്ലോ അലർട്ട് പ്രഖ്യാപിച്ചിരിക്കുന്നു.

യെല്ലോ അലർട്ട് പ്രഖ്യാപിച്ചിരിക്കുന്ന തീയതികളും ജില്ലകളും:

. 03/11/2026: മലപ്പുറം, കോഴിക്കോട്, വയനാട്, കണ്ണൂർ, കാസർകോട്

. 04/11/2026: കോട്ടയം, ഇടുക്കി, വയനാട്

. 05/11/2026: പത്തനംതിട്ട

. 06/11/2026: ഇടുക്കി, എറണാകുളം

. 07/11/2026: പത്തനംതിട്ട, കോട്ടയം

24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അർത്ഥമാക്കുന്നത്.