മോദി 'പാനിക്' ആണ്; ഗ്യാനേഷ് കുമാറിനെ രക്ഷിക്കാനുള്ള ശ്രമങ്ങള്‍ പതനത്തിലേക്ക് നയിക്കും: കെസി വേണുഗോപാൽ

രാഹുല്‍ ഗാന്ധിയുടെ നേതൃത്വത്തില്‍ പ്രതിപക്ഷ പാര്‍ട്ടികള്‍ തിങ്കളാഴ്ച ചരിത്രപരമായ വന്‍ പ്രതിഷേധ പോരാട്ടത്തിന് തുടക്കമിടുമെന്ന് എ.ഐ.സി.സി ജനറല്‍ സെക്രട്ടറി കെ.സി. വേണുഗോപാല്‍ എം.പി അറിയിച്ചു. ചീഫ് ഇലക്ഷന്‍ കമ്മീഷണര്‍ ഗ്യാനേഷ് കുമാറിനെ സംരക്ഷിക്കാനുള്ള കേന്ദ്ര സര്‍ക്കാരിന്റെ ശ്രമങ്ങള്‍ അവരുടെ പതനത്തിലേക്ക് വഴിതെളിക്കുമെന്നും, ഗ്യാനേഷ് കുമാര്‍ രാജി വെക്കുന്നതുവരെ ഈ പോരാട്ടം തുടരുമെന്നും അദ്ദേഹം വ്യക്തമാക്കി. ഒരു പൗരന്റെ അടിസ്ഥാന അവകാശമായ വോട്ടവകാശത്തെ ചോദ്യം ചെയ്യുന്ന നടപടികളാണ് നിലവില്‍ നടക്കുന്നത്. ഈ വിഷയത്തില്‍ പ്രധാനമന്ത്രി നരേന്ദ്ര മോദി ഭയത്തിലാണെന്നും അദ്ദേഹത്തിന് ഇതില്‍ നിന്നും ഓടിയൊളിക്കാന്‍ കഴിയില്ലെന്നും ചൂണ്ടിക്കാട്ടിയ വേണുഗോപാല്‍, ഡല്‍ഹി സാക്ഷ്യം വഹിക്കാന്‍ പോകുന്ന ഈ പോരാട്ടത്തിന്റെ ഭാഗമായി സുപ്രീം കോടതി ചീഫ് ജസ്റ്റിസിന് നിവേദനം നല്‍കാന്‍ തീരുമാനിച്ചിട്ടുണ്ടെന്നും അറിയിച്ചു.

കേരളത്തിന് എയിംസ് (AIMS) അനുവദിക്കുന്ന കാര്യത്തില്‍ കേന്ദ്ര സര്‍ക്കാരും ബി.ജെ.പിയും നടത്തുന്ന വഞ്ചനയ്ക്കെതിരെയും അദ്ദേഹം രൂക്ഷവിമര്‍ശനം ഉന്നയിച്ചു. 2016-ല്‍ അടുത്ത വര്‍ഷം കേരളത്തില്‍ എയിംസ് അനുവദിക്കുമെന്ന് പ്രഖ്യാപിച്ച ബി.ജെ.പി, 13 വര്‍ഷമായി കേന്ദ്രം ഭരിച്ചിട്ടും അത് നടപ്പിലാക്കിയില്ലെന്ന് അദ്ദേഹം ചൂണ്ടിക്കാട്ടി. കഴിഞ്ഞ പാര്‍ലമെന്റ് സമ്മേളനത്തിലും കോണ്‍ഗ്രസ് ഇക്കാര്യം വീണ്ടും ആവര്‍ത്തിച്ചു ചോദിച്ചിരുന്നു. എയിംസ് അനുവദിച്ചതായി അവകാശപ്പെടുന്ന സ്ഥലങ്ങളില്‍ എന്തൊക്കെ അടിസ്ഥാന സൗകര്യങ്ങളാണ് ഉള്ളതെന്ന് പരിശോധിക്കണം. ബി.ജെ.പിയുടെ അജണ്ടയിലോ ഭൂപടത്തിലോ കേരളമില്ലാത്തതിനാല്‍ കേരളത്തിലെ ബി.ജെ.പി ഘടകം പിരിച്ചുവിടുകയാണ് വേണ്ടതെന്നും, കേന്ദ്രത്തിന് ഇനി പരമാവധി രണ്ടു വര്‍ഷം കൂടിയേ എയിംസ് തടയാന്‍ കഴിയൂവെന്നും, 2029-ല്‍ കേന്ദ്രം തന്നില്ലെങ്കിലും കേരളത്തില്‍ എയിംസ് യാഥാര്‍ത്ഥ്യമാകുമെന്നും കെ.സി. വേണുഗോപാല്‍ വ്യക്തമാക്കി.

അതേസമയം, മുന്‍ മുഖ്യമന്ത്രി പിണറായി വിജയനെതിരെ കേസെടുക്കാനുള്ള ഹൈക്കോടതി വിധിയെക്കുറിച്ചുള്ള ചോദ്യത്തോട് പ്രതികരിക്കവെ, നിയമത്തിന് മുന്നില്‍ ആര്‍ക്കും പ്രത്യേക ഇളവുകളില്ലെന്ന് അദ്ദേഹം കൂട്ടിച്ചേര്‍ത്തു. നിയമം നിയമത്തിന്റെ വഴിക്ക് തന്നെ മുന്നോട്ട് പോകുമെന്നും അദ്ദേഹം വ്യക്തമാക്കി. രാജ്യത്തെ ജനാധിപത്യ സംരക്ഷണത്തിനായുള്ള പോരാട്ടങ്ങളെ തടയാന്‍ കേന്ദ്ര ഭരണകൂടത്തിന് ചെയ്യാവുന്നതൊക്കെ ചെയ്യാം, എന്നാല്‍ വോട്ടവകാശ സംരക്ഷണത്തിനായി പ്രതിപക്ഷം തിങ്കളാഴ്ച സംഘടിപ്പിക്കുന്ന സമരത്തില്‍ ഡല്‍ഹി ഇതുവരെ കാണാത്ത പോരാട്ടവീര്യമായിരിക്കും പ്രകടമാകുകയെന്നും വേണുഗോപാല്‍ ഓര്‍മ്മിപ്പിച്ചു.