ന്യൂ ഓര്‍ലിയന്‍സ് പോര്‍ട്ടിന് സമീപം മിസിസിപ്പി നദിയില്‍ നിയന്ത്രണം വിട്ട ടാങ്കര്‍ കപ്പല്‍ നിര്‍ത്തിയിട്ടിരുന്ന റിവര്‍ ക്രൂയിസ് കപ്പലില്‍ ഇടിച്ച് അപകടം. വെള്ളിയാഴ്ച ഉച്ചയ്ക്ക് 12:30-ഓടെയാണ് സംഭവം നടന്നത്. ഇടിയുടെ ആഘാതത്തില്‍ ക്രൂയിസ് കപ്പല്‍ മറിയുകയും യാത്രക്കാര്‍ വെള്ളത്തില്‍ വീഴുകയും ചെയ്തു. എങ്കിലും, കപ്പല്‍ പൂര്‍ണ്ണമായി മറിയുന്നതിന് മുന്‍പ് തന്നെ 87 പേരെ സുരക്ഷിതമായി ഒഴിപ്പിക്കാന്‍ കഴിഞ്ഞത് വലിയൊരു ദുരന്തം ഒഴിവാക്കി.
അപകടത്തില്‍ പരിക്കേറ്റ 32 പേരെ ആശുപത്രിയില്‍ പ്രവേശിപ്പിച്ചെങ്കിലും ആരുടെയും പരിക്ക് ഗുരുതരമല്ല. രക്ഷാപ്രവര്‍ത്തനത്തില്‍ പങ്കെടുത്ത രണ്ട് പൊലീസുകാരും ഇതില്‍ ഉള്‍പ്പെടുന്നു. ക്രൂയിസ് കപ്പലിലുണ്ടായിരുന്ന മുഴുവന്‍ യാത്രക്കാരെയും സുരക്ഷിതമായി കണ്ടെത്താനായെന്ന് അധികൃതര്‍ സ്ഥിരീകരിച്ചു. ലൂസിയാന ഗവര്‍ണര്‍ ജെഫ് ലാന്‍ഡ്രി ഈ അത്ഭുതകരമായ രക്ഷപ്പെടലിനെ 'മിസിസിപ്പിയിലെ യഥാര്‍ത്ഥ അത്ഭുതം' എന്നാണ് വിശേഷിപ്പിച്ചത്.
ഫ്രഞ്ച് ക്വാര്‍ട്ടര്‍ പിന്നിട്ട് മുന്നോട്ട് പോവുകയായിരുന്ന 'അറ്റ്ലാന്റിക് അസ്ഫാല്‍റ്റ്' എന്ന ടാങ്കര്‍ കപ്പല്‍ പാലം കടന്ന ഉടനെ നിയന്ത്രണം വിടുകയായിരുന്നു. തുടര്‍ന്ന്, യാത്രാ കപ്പലിന്റെ ഡോക്കിങ് പോയിന്റിന് സമീപം നിര്‍ത്തിയിട്ടിരുന്ന 'അമേരിക്കന്‍ ഹെറിറ്റേജ്' എന്ന ക്രൂയിസ് കപ്പലില്‍ ഇത് ഇടിക്കുകയായിരുന്നു.
അപകടകാരണം കണ്ടെത്താന്‍ യുഎസ് കോസ്റ്റ് ഗാര്‍ഡും നാഷണല്‍ ട്രാന്‍സ്‌പോര്‍ട്ടേഷന്‍ സേഫ്റ്റി ബോര്‍ഡും സംയുക്തമായി അന്വേഷണം ആരംഭിച്ചിട്ടുണ്ട്. യാത്രക്കാര്‍ക്ക് ആവശ്യമായ താമസസൗകര്യങ്ങളും മറ്റ് സഹായങ്ങളും ക്രൂയിസ് കമ്പനി ഉറപ്പാക്കിയിട്ടുണ്ട്. രക്ഷാപ്രവര്‍ത്തനങ്ങള്‍ തുടരുന്നതിനാല്‍ മിസിസിപ്പി നദിയിലൂടെയുള്ള കപ്പല്‍ ഗതാഗതം താത്കാലികമായി നിര്‍ത്തിവെച്ചിരിക്കുകയാണ്.
മിസിസിപ്പി നദിയില്‍ കപ്പല്‍ അപകടം: ടാങ്കര്‍ ഇടിച്ച് ക്രൂയിസ് കപ്പല്‍ മറിഞ്ഞു; 32 പേര്‍ക്ക് പരിക്ക്
Jaihind TV News Report
Jaihind TV Web Desk
2 min read
218 reads
