തിരുവനന്തപുരം: കരിമണൽ കമ്പനിയായ സിഎംആർഎല്ലുമായി ബന്ധപ്പെട്ട മാസപ്പടി കേസിന് പിന്നിൽ നടന്നത് വൻ അഴിമതിയാണെന്നും ഇക്കാര്യങ്ങൾ ഇപ്പോൾ കോടതിക്ക് പൂർണ്ണമായി ബോധ്യപ്പെട്ടിട്ടുണ്ടെന്നും മാത്യു കുഴൽനാടൻ എം.എൽ.എ. കേസിൽ കൃത്യമായ ഒരു വിജിലൻസ് അന്വേഷണമോ അതല്ലെങ്കിൽ സിബിഐ അന്വേഷണമോ ഉണ്ടായാൽ മുഖ്യമന്ത്രി പിണറായി വിജയൻ പ്രതിപ്പട്ടികയിൽ വരുമെന്നത് ഉറപ്പാണെന്നും അദ്ദേഹം വാർത്താ സമ്മേളനത്തിൽ അവകാശപ്പെട്ടു.
ഹൈക്കോടതി വിധിക്ക് പിന്നാലെയാണ് സർക്കാരിനും മുഖ്യമന്ത്രിക്കുമെതിരെ കടുത്ത രാഷ്ട്രീയ ആരോപണങ്ങളുമായി മാത്യു കുഴൽനാടൻ രംഗത്തെത്തിയത്. മുൻപ് ഇതേ വിഷയത്തിൽ വിജിലൻസിന് മുന്നിൽ കാര്യങ്ങൾ കൃത്യമായി ബോധ്യപ്പെടുത്താൻ തങ്ങൾക്ക് സാധിച്ചിരുന്നില്ലെന്നും എന്നാൽ നിയമപോരാട്ടത്തിലൂടെ കേസിന്റെ യഥാർത്ഥ വസ്തുതകൾ പുറത്തുകൊണ്ടുവരാൻ കഴിഞ്ഞെന്നും അദ്ദേഹം കൂട്ടിച്ചേർത്തു. വരും ദിവസങ്ങളിൽ കേസ് അന്വേഷണം കൂടുതൽ ശക്തമാക്കണമെന്നാണ് പ്രതിപക്ഷത്തിന്റെ ആവശ്യമെന്നും അദ്ദേഹം വ്യക്തമാക്കി.
