മലപ്പുറം ജില്ലയിലെ മങ്കടയിലുണ്ടായ വൻ മിന്നൽ അപകടത്തിൽ നാല് യുവാക്കൾക്ക് ജീവൻ നഷ്ടമായ സംഭവം അത്യന്തം വേദനാജനകമാണെന്ന് വി.ഡി സതീശൻ പറഞ്ഞു. പരിക്കേറ്റ് ചികിത്സയിൽ കഴിയുന്ന മറ്റ് മൂന്ന് കുട്ടികളുടെ ആരോഗ്യനിലയിൽ ആശങ്കയുണ്ടെന്നും അവർക്ക് ഏറ്റവും മികച്ച ചികിത്സാ സൗകര്യങ്ങൾ അടിയന്തരമായി ലഭ്യമാക്കണമെന്നും അദ്ദേഹം ആവശ്യപ്പെട്ടു. പരിക്കേറ്റവർ എത്രയും വേഗം പൂർണ്ണ ആരോഗ്യത്തോടെ മടങ്ങിവരട്ടെ എന്ന് അദ്ദേഹം ആശംസിച്ചു.
വെറും പതിനെട്ടും ഇരുപതും വയസ്സ് മാത്രം പ്രായമുള്ള, ജീവിതം മുന്നിൽ നിൽക്കുന്ന നാല് യുവാക്കളുടെ അപ്രതീക്ഷിത വിയോഗം നാടിനെയാകെ നടുക്കിയിരിക്കുകയാണ്. ഒരു കുടുംബത്തിനും താങ്ങാനാവാത്ത ഈ വലിയ നഷ്ടത്തിൽ എങ്ങനെ അവരെ ആശ്വസിപ്പിക്കണമെന്ന് അറിയില്ലെന്ന് പറഞ്ഞ അദ്ദേഹം, മരിച്ചവരുടെ കുടുംബാംഗങ്ങളുടെയും സുഹൃത്തുക്കളുടെയും ദുഃഖത്തിൽ പങ്കുചേരുന്നതായും അറിയിച്ചു. അകാലത്തിൽ വിടപറഞ്ഞവർക്ക് അദ്ദേഹം ആദരാഞ്ജലികൾ അർപ്പിച്ചു.
