കൊയിലാണ്ടി എം.എൽ.എ. കാനത്തിൽ ജമീല അന്തരിച്ചു

Jaihind TV Web Desk

November 29, 2025

1 min read • Updated: June 02, 2026

കൊയിലാണ്ടി എം.എൽ.എ. കാനത്തിൽ ജമീല അന്തരിച്ചു

കോഴിക്കോട് കൊയിലാണ്ടി എം.എൽ.എ. കാനത്തിൽ ജമീല (59) അന്തരിച്ചു. അർബുദ രോഗത്തെ തുടർന്ന് കോഴിക്കോട്ടെ സ്വകാര്യ ആശുപത്രിയിൽ ചികിത്സയിലിരിക്കെയാണ് അന്ത്യം സംഭവിച്ചത്. 1966 മെയ് 5 ന് കോഴിക്കോട്ടെ കുറ്റ്യാടിയിൽ ടി.കെ. അലിയുടെയും ടി.കെ. മറിയത്തിന്റെയും മകളായി ജനിച്ച കാനത്തിൽ ജമീല, സി.പി.ഐ.എം. ജില്ലാ കമ്മിറ്റി അംഗമായിരുന്നു. മൂന്ന് പതിറ്റാണ്ടിലേറെക്കാലം പൊതുരംഗത്ത് സജീവമായിരുന്നു അവർ. അബ്ദുൽ റഹ്‌മാനാണ് ഭർത്താവ്, ഐറീജ് റഹ്‌മാൻ, അനൂജ സൊഹൈബ് എന്നിവരാണ് മക്കൾ.

പഞ്ചായത്ത് പ്രസിഡന്റ്, ബ്ലോക്ക് പഞ്ചായത്ത് പ്രസിഡന്റ്, ജില്ലാ പഞ്ചായത്ത് പ്രസിഡന്റ് എന്നീ നിലകളിൽ ശ്രദ്ധേയമായ പ്രവർത്തനങ്ങൾ കാഴ്ചവെച്ച നേതാവാണ് കാനത്തിൽ ജമീല. 1995-ൽ തലക്കുളത്തൂർ പഞ്ചായത്തിലെ മൂന്നാം വാർഡിൽ തന്റെ കന്നിയങ്കത്തിൽ ജയിച്ച് അവർ പഞ്ചായത്ത് പ്രസിഡന്റായി. തുടർന്ന് 2000-ൽ ക്ഷേമകാര്യ സ്റ്റാൻഡിങ് കമ്മിറ്റി ചെയർമാനായും 2005-ൽ ചേളന്നൂർ ബ്ലോക്ക് പഞ്ചായത്ത് പ്രസിഡന്റായും പ്രവർത്തിച്ചു. 2010-ലും 2020-ലും കോഴിക്കോട് ജില്ലാ പഞ്ചായത്ത് പ്രസിഡന്റായി തിരഞ്ഞെടുക്കപ്പെട്ട അവർ ഈ സ്ഥാനത്തിരുന്ന് ശ്രദ്ധേയമായ നേട്ടങ്ങൾ കൈവരിച്ചു.

2021-ലെ നിയമസഭാ തെരഞ്ഞെടുപ്പിൽ മത്സരിക്കാനായി ജില്ലാ പഞ്ചായത്ത് പ്രസിഡന്റ് സ്ഥാനം രാജിവെച്ച കാനത്തിൽ ജമീല, കോൺഗ്രസിലെ എൻ. സുബ്രഹ്‌മണ്യനെ 8472 വോട്ടുകൾക്ക് പരാജയപ്പെടുത്തിയാണ് കൊയിലാണ്ടി എം.എൽ.എ. ആയി നിയമസഭയിലെത്തിയത്. പൊതുപ്രവർത്തന രംഗത്തെ അവരുടെ സംഭാവനകൾ ശ്രദ്ധേയമായിരുന്നു.