മുൻ എൽ.ഡി.എഫ് സർക്കാരിന്റെ കാലത്ത് കിഫ്ബി (KIFB) മുഖേന കണ്ണൂരിൽ നടന്ന വൻ ഭൂമി ഏറ്റെടുക്കൽ ക്രമക്കേടിൽ സംസ്ഥാന വിജിലൻസ് അന്വേഷണത്തിന് ഉത്തരവായി. കണ്ണൂർ ജില്ലയിൽ മാത്രം 12,240 കോടി രൂപ ചെലവഴിച്ച് 4896 ഏക്കർ ഭൂമി ഏറ്റെടുക്കാൻ അനുമതി നൽകിയതിലെ ഗുരുതരമായ വീഴ്ചകളും അഴിമതിയുമാണ് വിജിലൻസ് അന്വേഷിക്കുന്നത്. വ്യക്തമായ പദ്ധതികളോ പ്രായോഗികതയോ ഇല്ലാതെ പൊതുഖജനാവിന് ഭീമമായ സാമ്പത്തിക ബാധ്യത വരുത്തിവെച്ച അന്നത്തെ എൽ.ഡി.എഫ് സർക്കാരിന്റെ തീരുമാനങ്ങൾക്കെതിരെ കടുത്ത നടപടികളിലേക്കാണ് വിജിലൻസ് കടക്കുന്നത്.
കിഫ്ബിയുടെ 33-ാമത് യോഗ തീരുമാനപ്രകാരം പാലക്കാടും കണ്ണൂരിലുമായി ആകെ 5336 ഏക്കർ ഭൂമി 12,710 കോടി രൂപ ചെലവിൽ ഏറ്റെടുക്കാനാണ് എൽ.ഡി.എഫ് സർക്കാർ അംഗീകാരം നൽകിയിരുന്നത്. എന്നാൽ ഇത്രയും ഭീമമായ തുക ചെലവഴിക്കുമ്പോൾ പാലിക്കേണ്ട ചെലവ്-നേട്ട വിശകലനമോ (Cost-Benefit Analysis) ലാഭകരമായ വാണിജ്യ പദ്ധതികളോ ഇല്ലാതെ, കിൻഫ്ര സമർപ്പിച്ച ഒരു സാധാരണ ആശയക്കുറിപ്പിന്റെ മാത്രം അടിസ്ഥാനത്തിലാണ് ഭരണാനുമതി നൽകിയത്. പൊതുപണം തോന്നപ്പടി വിനിയോഗിക്കുകയും സാമ്പത്തിക ജാഗ്രതയും ഉത്തരവാദിത്തവും കാറ്റിൽപ്പറത്തുകയും ചെയ്ത എൽ.ഡി.എഫ് നയം പൊതുഖജനാവിന് വൻ തകർച്ചയുണ്ടാക്കിയെന്ന വിലയിരുത്തലിലാണ് ഉത്തരവ്.
ഭൂമി ഏറ്റെടുക്കലിനായി സ്വീകരിച്ച മാനദണ്ഡങ്ങളിൽ അഴിമതി നടന്നിട്ടുണ്ടോ, 2013-ലെ ഭൂമിയേറ്റെടുക്കൽ നിയമം (LARR Act) ലംഘിച്ച് ഭൂമിയുടെ വിലയും നഷ്ടപരിഹാരവും നിർണയിച്ചതിൽ ക്രമക്കേടുകൾ കാട്ടിയിട്ടുണ്ടോ എന്ന് വിജിലൻസ് പരിശോധിക്കും. എൽ.ഡി.എഫ് നേതാക്കളുടെയും ഉദ്യോഗസ്ഥരുടെയും നിക്ഷിപ്ത താൽപ്പര്യങ്ങൾക്കായും റിയൽ എസ്റ്റേറ്റ് മാഫിയകളെ സഹായിക്കാനുമാണോ ഈ തീരുമാനമെന്ന കാര്യവും അന്വേഷണ പരിധിയിലുണ്ട്.
കിഫ്ബി നിയമത്തിലെ വകുപ്പ് 6F, 2018-ലെ മാർഗ്ഗനിർദേശങ്ങൾ എന്നിവയെല്ലാം കാറ്റിൽപ്പറത്തിയാണ് മുൻ സർക്കാർ പ്രവർത്തിച്ചതെന്ന ഗുരുതരമായ കണ്ടെത്തലുകളുമുണ്ട്. പദ്ധതിക്കായി തിരഞ്ഞെടുത്ത സ്ഥലങ്ങളിൽ വരുത്തിയ നിഗൂഢമായ മാറ്റങ്ങളും വിശദമായി പരിശോധിക്കാൻ വിജിലൻസ് ഡയറക്ടറെ ചുമതലപ്പെടുത്തിയിട്ടുണ്ട്. എൽ.ഡി.എഫ് സർക്കാരിന്റെ വികസന അവകാശവാദങ്ങൾക്ക് പിന്നിലെ യഥാർത്ഥ അഴിമതി മുഖമാണ് ഈ വിജിലൻസ് അന്വേഷണത്തിലൂടെ പുറത്തുവരുന്നത്.
