തിരുവനന്തപുരം: സംസ്ഥാനത്തിന്റെ ടൂറിസം മേഖലയ്ക്ക് പുതിയ ദിശാബോധം നല്‍കിക്കൊണ്ട് സമഗ്രമായ പദ്ധതികള്‍ പ്രഖ്യാപിച്ച് ടൂറിസം വകുപ്പ് മന്ത്രി പി.സി. വിഷ്ണുനാഥ്. നിയമസഭയില്‍ ചോദ്യോത്തരവേളയില്‍ മറുപടി നല്‍കുകയായിരുന്നു അദ്ദേഹം. വിനോദസഞ്ചാരികളെ കൂടുതല്‍ ആകര്‍ഷിക്കുന്നതിനായി സംസ്ഥാനത്ത് പുതിയ ടൂറിസം സര്‍ക്യൂട്ടുകള്‍ ആരംഭിക്കുമെന്ന് മന്ത്രി സഭയെ അറിയിച്ചു. ഉത്തരവാദിത്ത ടൂറിസം കൂടുതല്‍ ശക്തിപ്പെടുത്തുമെന്നും അദ്ദേഹം വ്യക്തമാക്കി.
വിനോദസഞ്ചാര മേഖലയില്‍ വൈവിധ്യവല്‍ക്കരണം ലക്ഷ്യമിട്ടാണ് പുതിയ പദ്ധതികള്‍ ആവിഷ്‌കരിക്കുന്നത്. ഇതിന്റെ ഭാഗമായി സഞ്ചാരികള്‍ക്ക് കേരളത്തിന്റെ തനിമയാര്‍ന്ന ഗ്രാമീണ ജീവിതം നേരിട്ട് അനുഭവിക്കാന്‍ അവസരമൊരുക്കുന്ന പുതിയ ഗ്രാമീണ ടൂറിസം പദ്ധതിക്ക് രൂപം നല്‍കും. ഒരു ദിവസം മുഴുവന്‍ ഒരു സാധാരണ മലയാളിയായി ജീവിച്ചു മടങ്ങുവാന്‍ വിനോദസഞ്ചാരികള്‍ക്ക് അവസരം ഒരുക്കുന്ന രീതിയിലായിരിക്കും ഈ പദ്ധതി നടപ്പിലാക്കുകയെന്ന് മന്ത്രി നിയമസഭയിലെ ചോദ്യോത്തരവേളയില്‍ പറഞ്ഞു.
സംസ്ഥാനത്തേക്ക് എത്തുന്ന വിനോദസഞ്ചാരികളുടെ എണ്ണം വര്‍ദ്ധിപ്പിക്കുന്നതിനും ടൂറിസം കേന്ദ്രങ്ങളിലെ അടിസ്ഥാന സൗകര്യങ്ങള്‍ മെച്ചപ്പെടുത്തുന്നതിനുമുള്ള നടപടികള്‍ പുരോഗമിക്കുകയാണെന്നും മന്ത്രി കൂട്ടിച്ചേര്‍ത്തു. പുതിയ സര്‍ക്യൂട്ടുകളും ഗ്രാമീണ ടൂറിസം പദ്ധതികളും യാഥാര്‍ത്ഥ്യമാകുന്നതോടെ കേരളത്തിന്റെ ടൂറിസം ഭൂപടത്തില്‍ വലിയ മാറ്റങ്ങളുണ്ടാകുമെന്നാണ് പ്രതീക്ഷിക്കുന്നത്.
കേരള ടൂറിസത്തിന് പുത്തന്‍ ഉണര്‍വ്; പുതിയ ടൂറിസം സര്‍ക്യൂട്ടുകളും ഗ്രാമീണ ടൂറിസം പദ്ധതിയും നടപ്പിലാക്കുമെന്ന് മന്ത്രി പി.സി. വിഷ്ണുനാഥ്
Jaihind TV News Report
Jaihind TV Web Desk
2 min read
59 reads
