തിരുവനന്തപുരം: സംസ്ഥാനത്ത് ഇന്ന് ഒറ്റപ്പെട്ട ശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ്. വടക്കന് കേരളത്തിലാണ് ശക്തമായ മുന്നറിയിപ്പ് നല്കിയിട്ടുള്ളത്. ജാഗ്രതയുടെ ഭാഗമായി മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളില് യെല്ലോ അലര്ട്ട് പ്രഖ്യാപിച്ചു.
മഴയ്ക്കൊപ്പം ഇടിമിന്നലിനും മണിക്കൂറില് 40 കിലോമീറ്റര് വരെ വേഗതയില് വീശിയടിച്ചേക്കാവുന്ന ശക്തമായ കാറ്റിനും സാധ്യതയുണ്ട്. മലയോര മേഖലകളിലേക്കുള്ള അനാവശ്യ യാത്രകള് പരമാവധി ഒഴിവാക്കണമെന്ന് അധികൃതര് നിര്ദേശിച്ചു. മുന്കരുതലിന്റെ ഭാഗമായി വയനാട് ജില്ലയിലെ സാഹസിക വിനോദസഞ്ചാര കേന്ദ്രങ്ങളുടെ പ്രവര്ത്തനത്തിനും ട്രക്കിങ്ങിനും ജില്ലാ ഭരണകൂടം വിലക്കേര്പ്പെടുത്തിയിട്ടുണ്ട്.
വടക്കന് തീരദേശ ആന്ധ്രാപ്രദേശിനും തെക്കന് ഒഡീഷയ്ക്കും മുകളിലായി നിലനില്ക്കുന്ന അതിതീവ്ര ന്യൂനമര്ദ്ദമാണ് നിലവിലെ മഴയ്ക്ക് കാരണം. ഇത് വടക്ക് - വടക്കുപടിഞ്ഞാറന് ദിശയിലേക്ക് നീങ്ങി ക്രമേണ ശക്തി കുറഞ്ഞ് തീവ്ര ന്യൂനമര്ദ്ദമായി മാറുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തല്. കേരള, കര്ണാടക, ലക്ഷദ്വീപ് തീരങ്ങളില് ഇന്നും മത്സ്യബന്ധനത്തിന് പോകരുതെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്കി. തീരപ്രദേശങ്ങളില് മണിക്കൂറില് 35 മുതല് 45 കിലോമീറ്റര് വരെയും ചില അവസരങ്ങളില് 55 കിലോമീറ്റര് വരെയും വേഗതയുള്ള കാറ്റിനും മോശം കാലാവസ്ഥയ്ക്കും സാധ്യതയുണ്ട്.
സംസ്ഥാനത്ത് ഇന്നും ശക്തമായ മഴയ്ക്ക് സാധ്യത; വടക്കന് ജില്ലകളില് യെല്ലോ അലര്ട്ട്, കടലില് പോകുന്നതിന് വിലക്ക്
Jaihind TV News Report
Jaihind TV Web Desk
2 min read
40 reads
