തിരുവനന്തപുരം: സംസ്ഥാനത്ത് യു.ഡി.എഫ് സര്‍ക്കാരിന്റെ പുതിയ മദ്യനയം പ്രഖ്യാപിക്കുന്നത് വരെ ബാറുകള്‍ക്ക് പുതിയ ലൈസന്‍സ് അനുവദിക്കരുതെന്ന് എക്സൈസ് വകുപ്പ് ഉത്തരവിറക്കി. സര്‍ക്കാരിന്റെ നിര്‍ദ്ദേശപ്രകാരം എക്സൈസ് കമ്മീഷണറുടെ ചുമതല വഹിക്കുന്ന അഡീഷണല്‍ എക്സൈസ് കമ്മീഷണറാണ് ഇതുസംബന്ധിച്ച സര്‍ക്കുലര്‍ പുറപ്പെടുവിച്ചത്.
പുതിയ ബാര്‍ ലൈസന്‍സുകള്‍ നല്‍കിയതുമായി ബന്ധപ്പെട്ട് നിലനിന്ന തര്‍ക്കങ്ങള്‍ എക്സൈസ് കമ്മീഷണറുടെ സ്ഥാനചലനത്തിനും രണ്ട് ഉദ്യോഗസ്ഥരുടെ സസ്പെന്‍ഷനിലേക്കും വഴിവെച്ചിരുന്നു. നിലവിലെ ചട്ടപ്രകാരമാണ് ലൈസന്‍സ് നല്‍കിയതെന്നാണ് സ്ഥാനചലനം നേരിട്ട മുന്‍ എക്സൈസ് കമ്മീഷണര്‍ ശ്രീറാം സാമ്പശിവറാവുവും സസ്പെന്‍ഷനിലായ ഡെപ്യൂട്ടി കമ്മീഷണര്‍മാരും വ്യക്തമാക്കിയത്.
പുതിയ നയം വന്നതിന് ശേഷമേ ലൈസന്‍സ് നല്‍കാവൂ എന്ന് നിര്‍ദ്ദേശിച്ചിരുന്നതായി എക്സൈസ് മന്ത്രി എം. ലിജു വിശദീകരിച്ചെങ്കിലും രേഖാമൂലം ഉത്തരവുണ്ടായിരുന്നില്ല. വിഷയം വിവാദമായതോടെ പുതിയ ലൈസന്‍സ് അപേക്ഷകള്‍ വന്നപ്പോള്‍ നയരൂപീകരണത്തിന് ശേഷം പരിഗണിച്ചാല്‍ മതിയെന്ന് അഡീഷണല്‍ ചീഫ് സെക്രട്ടറി കെ.ആര്‍. ജ്യോതിലാല്‍ അറിയിക്കുകയായിരുന്നു.
അതിനിടെ, മദ്യനയം ഉടന്‍ രൂപീകരിക്കണമെന്നും ഈ മാസം 30-നകം തീരുമാനം വേണമെന്നും ഹൈക്കോടതിയും നിര്‍ദ്ദേശിച്ചിട്ടുണ്ട്. നിലവില്‍ 21-ലധികം ബാര്‍ ലൈസന്‍സ് അപേക്ഷകളാണ് സര്‍ക്കാരിന്റെ മുന്നിലുള്ളത്.
പുതിയ മദ്യനയം വരും വരെ ബാറുകൾക്ക് ലൈസൻസ് നൽകരുത്: ഉത്തരവിറക്കി എക്സൈസ് വകുപ്പ്
Jaihind TV News Report
Jaihind TV Web Desk
2 min read
101 reads
