തിരുവനന്തപുരം: സംസ്ഥാനത്ത് ബാറുകളുടെ പ്രവർത്തന സമയം കുറയ്ക്കാൻ സർക്കാർ ആലോചന. നിലവിലെ രാത്രി 12 മണിവരെയുള്ള സമയക്രമത്തിൽ മാറ്റം വരുത്തി, ബാറുകൾ രാവിലെ 11 മുതൽ രാത്രി 11 മണിവരെ മാത്രം പ്രവർത്തിപ്പിക്കുന്ന രീതിയിലേക്ക് സമയപരിധി പുനഃക്രമീകരിക്കാനാണ് നീക്കം നടക്കുന്നത്. വരാനിരിക്കുന്ന പുതിയ മദ്യനയം രൂപീകരിക്കുന്നതിന്റെ ഭാഗമായി ഈ മാസം 23 മുതൽ 28 വരെ വിവിധ സംഘടനകളുമായി സർക്കാർ വിഷയം ചർച്ച ചെയ്യും.
ബാറുകളിലെ തൊഴിലാളികളുടെ അമിത ജോലിഭാരവും രാത്രി വൈകിയുള്ള യാത്രയിലെ ബുദ്ധിമുട്ടുകളും കണക്കിലെടുത്താണ് സമയക്രമത്തിൽ മാറ്റം വരുത്തണമെന്ന ആവശ്യം ശക്തമായത്. രാത്രി വൈകിയുള്ള ബാറുകളുടെ പ്രവർത്തനം മൂലം ഉണ്ടാകുന്ന ക്രമസമാധാന പ്രശ്നങ്ങളും വിവിധ സംഘടനകൾ മുന്നോട്ടുവെച്ച നിർദ്ദേശങ്ങളും സർക്കാരിന്റെ പരിഗണനയിലുണ്ട്. പൊതുജനങ്ങളുടെയും വിവിധ സംഘടനകളുടെയും അഭിപ്രായങ്ങൾ കൂടി കണക്കിലെടുത്ത ശേഷമായിരിക്കും ബാർ സമയക്രമത്തിൽ അന്തിമതീരുമാനം കൈക്കൊള്ളുക.
