ന്യൂഡല്‍ഹി: മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെ സ്ഥാനത്തുനിന്ന് പുറത്താക്കുന്നത് വരെ കോണ്‍ഗ്രസിന്റെ സമരം ശക്തമായി തുടരുമെന്ന് സംഘടന ജനറല്‍ സെക്രട്ടറി കെ.സി. വേണുഗോപാല്‍ എം.പി. രാജ്യത്തെ തെരഞ്ഞെടുപ്പ് സംവിധാനം പൂര്‍ണ്ണമായും നിഷ്പക്ഷവും സുതാര്യവുമാകുന്നത് വരെ സമരരംഗത്തുനിന്ന് പിന്നോട്ടില്ലെന്നും ഡല്‍ഹിയില്‍ മാധ്യമങ്ങളോട് സംസാരിക്കവെ അദ്ദേഹം വ്യക്തമാക്കി.
രാജ്യത്തുടനീളം എല്ലാ സംസ്ഥാനങ്ങളിലും ജില്ലാ അടിസ്ഥാനത്തില്‍ പ്രതിഷേധങ്ങള്‍ ശക്തമായി നടന്നുവരികയാണെന്ന് അദ്ദേഹം പറഞ്ഞു. ദീപാവലി ആഘോഷങ്ങള്‍ പ്രമാണിച്ചുള്ള ചെറിയൊരു ഇടവേള മാത്രമാണ് നിലവിലുണ്ടായിരുന്നത്. നവംബര്‍ 1-ന് കോണ്‍ഗ്രസ് ഡല്‍ഹിയില്‍ സംഘടിപ്പിച്ച റാലി സമീപകാലത്തെ ഏറ്റവും ജനശ്രദ്ധയാകര്‍ഷിച്ച പ്രതിഷേധങ്ങളിലൊന്നായിരുന്നു. പ്രധാനമന്ത്രി നരേന്ദ്ര മോദിക്കും കേന്ദ്ര ആഭ്യന്തരമന്ത്രി അമിത് ഷായ്ക്കുമെതിരെയുള്ള ഈ പോരാട്ടം വഴിയിലുപേക്ഷിച്ച് മടങ്ങില്ലെന്ന് അദ്ദേഹം അടിവരയിട്ടു പറഞ്ഞു.
വോട്ടര്‍ പട്ടികയില്‍ നിന്നും വ്യാപകമായി പേരുകള്‍ നീക്കം ചെയ്യുന്നത് സാധാരണക്കാരായ പൗരന്മാരുടെ ജനാധിപത്യപരമായ വോട്ടവകാശത്തിന്മേലുള്ള കടന്നുകയറ്റമാണ്. വോട്ടര്‍ ഐ.ഡി പലവിധ സര്‍ക്കാര്‍ സേവനങ്ങള്‍ക്കും ആനുകൂല്യങ്ങള്‍ക്കും അത്യാവശ്യമായ സാഹചര്യത്തില്‍ ഇത്തരം നടപടികള്‍ ജനങ്ങളെ സാരമായി ബാധിക്കും. ഇതിനെ പ്രതിരോധിക്കാന്‍ വരും ഒന്നര മാസത്തിനുള്ളില്‍ പഞ്ചായത്ത് തലം മുതല്‍ രാജ്യവ്യാപകമായി 'വോട്ട് ബച്ചാവോ, ദേശ് ബച്ചാവോ' (വോട്ട് സംരക്ഷിക്കൂ, രാജ്യത്തെ സംരക്ഷിക്കൂ) എന്ന പേരില്‍ ശക്തമായ പ്രചാരണ പരിപാടികള്‍ക്ക് കോണ്‍ഗ്രസ് തുടക്കമിടുമെന്നും കെ.സി. വേണുഗോപാല്‍ അറിയിച്ചു.
തെരഞ്ഞെടുപ്പ് കമ്മീഷനെതിരെ സമരം കടുപ്പിക്കാന്‍ കോണ്‍ഗ്രസ്; ഗ്യാനേഷിനെ പുറത്താക്കും വരെ സമരം തുടരുമെന്ന് കെ സി വേണുഗോപാല്‍ എംപി
Jaihind TV News Report
Jaihind TV Web Desk
2 min read
207 reads
