കൊച്ചി: കാലടി സംസ്‌കൃത സര്‍വകലാശാലയില്‍ സസ്പെന്‍ഷനിലായ വിദ്യാര്‍ഥികള്‍ നല്‍കിയ ഹര്‍ജി ഹൈക്കോടതി ഇന്ന് പരിഗണിക്കും. കേസില്‍ ഈ ആഴ്ച തന്നെ വാദം കേള്‍ക്കുമെന്ന നിലപാടിലാണ് ഹൈക്കോടതി സിംഗിള്‍ ബെഞ്ച്. വാദം കേള്‍ക്കുന്ന തീയതി കോടതി ഇന്ന് പ്രഖ്യാപിക്കും. ഹര്‍ജിയില്‍ വേഗത്തില്‍ തീരുമാനം എടുക്കാന്‍ സുപ്രീം കോടതി നിര്‍ദേശിച്ചിട്ടുണ്ടെന്ന് ഹൈക്കോടതി പരാമര്‍ശിച്ചിരുന്നു.
നേരത്തെ സമര്‍പ്പിച്ച റിട്ട് ഹര്‍ജി ഭേദഗതി ചെയ്തുകൊണ്ട് പുതിയ അപേക്ഷയാണ് വിദ്യാര്‍ഥികള്‍ കോടതിക്ക് മുന്നിലെത്തിച്ചിരിക്കുന്നത്. തങ്ങള്‍ പരീക്ഷ എഴുതാന്‍ അര്‍ഹതയുള്ളവരാണെന്നും ഭൂരിഭാഗം പേര്‍ക്കും 60 ശതമാനത്തിലേറെ ഹാജറുണ്ടെന്നും ഹര്‍ജിയില്‍ ചൂണ്ടിക്കാട്ടുന്നു. സര്‍വകലാശാലാ ചട്ടപ്രകാരം ബാക്കി 20 ശതമാനം ഹാജര്‍ ഇളവ് നല്‍കാന്‍ വൈസ് ചാന്‍സലര്‍ക്ക് അധികാരമുണ്ട്. എന്നാല്‍ സസ്പെന്‍ഷന്‍ മൂലം ക്യാമ്പസില്‍ പ്രവേശിക്കാന്‍ തടസ്സമുള്ളതിനാലാണ് ഇളവിനായുള്ള അപേക്ഷ സമര്‍പ്പിക്കാന്‍ സാധിക്കാതിരുന്നതെന്നും ഹര്‍ജിയില്‍ വ്യക്തമാക്കുന്നു.
വിസിയെ ആക്രമിച്ചെന്ന ആരോപണവും പ്രതീകാത്മക ശവസംസ്‌കാരം നടത്തിയെന്ന കേസും കെട്ടിച്ചമച്ചതാണെന്നും വിദ്യാര്‍ഥികള്‍ ഹര്‍ജിയിലൂടെ വാദിക്കുന്നു.
കാലടി സർവകലാശാലയിലെ വിദ്യാർഥികളുടെ സസ്പെൻഷൻ: ഹർജി ഹൈക്കോടതി ഇന്ന് പരിഗണിക്കും
Jaihind TV News Report
Jaihind TV Web Desk
2 min read
74 reads
