തിരുവനന്തപുരം: തിരുവനന്തപുരത്ത് നിന്ന് ബെംഗളൂരുവിലേക്ക് പുറപ്പെട്ട കല്ലട ബസ് തകരാറിലായതിനെ തുടര്‍ന്ന് തമിഴ്നാട്ടില്‍ വഴിയില്‍ കുടുങ്ങിയ മലയാളി യാത്രക്കാര്‍ക്ക് തുണയായി ആഭ്യന്തര വകുപ്പ് മന്ത്രി രമേശ് ചെന്നിത്തലയുടെ മാതൃകാപരമായ ഇടപെടല്‍. പുലര്‍ച്ചെ 4:30-ഓടെ തമിഴ്നാട്ടിലെ ഈറോഡിന് സമീപമാണ് ബസ് കേടായതിനെ തുടര്‍ന്ന് സ്ത്രീകളും കുട്ടികളും അടക്കമുള്ള നിരവധി യാത്രക്കാര്‍ വഴിയില്‍ പെട്ടുപോയത്. അപരിചിതമായ സ്ഥലത്ത് പുലര്‍ച്ചെ എന്ത് ചെയ്യണമെന്നറിയാതെ യാത്രക്കാര്‍ പൂര്‍ണ്ണമായും വിഷമിച്ച ഘട്ടത്തിലാണ് പാരിപ്പള്ളി സ്വദേശിയായ സജീവനും കുടുംബവും ഉള്‍പ്പെടെയുള്ളവര്‍ കേരള ആഭ്യന്തര വകുപ്പ് മന്ത്രി രമേശ് ചെന്നിത്തലയെ ഫോണില്‍ വിളിച്ച് സഹായം അഭ്യര്‍ത്ഥിക്കുന്നത്.
സമയം പുലര്‍ച്ചെയെന്നോ അര്‍ദ്ധരാത്രിയെന്നോ നോക്കാതെ യാത്രക്കാരുടെ ഫോണ്‍ കോളിനോട് ഉടനടി പ്രതികരിച്ച മന്ത്രി, വഴിയില്‍ കുടുങ്ങിയവരുടെ സുരക്ഷ ഉറപ്പാക്കാന്‍ ആവശ്യമായ അടിയന്തര നിര്‍ദ്ദേശങ്ങള്‍ നല്‍കി. രാത്രിയില്‍ അപരിചിത സ്ഥലത്ത് അകപ്പെട്ടുപോയ യാത്രക്കാരുടെ സുരക്ഷയ്ക്കായി കേരള പൊലീസിന്റെ അടിയന്തര സഹായം ലഭ്യമാക്കാന്‍ മന്ത്രി നേരിട്ട് ഇടപെടുകയായിരുന്നു.
ഇതിന് പുറമെ, വഴിയില്‍ കുടുങ്ങിയ യാത്രക്കാര്‍ക്ക് ബാംഗ്ലൂരിലേക്കുള്ള തുടര്‍ന്നുള്ള യാത്ര തടസ്സമില്ലാതെ സാധ്യമാക്കുന്നതിനായി പകരം ഒരു ടൂറിസ്റ്റ് ബസ് ഉടനടി സംഭവസ്ഥലത്തേക്ക് ഏര്‍പ്പാടാക്കി നല്‍കുകയും ചെയ്തു. കൃത്യമായ സമയത്ത് അടിയന്തര സഹായഹസ്തവുമായി എത്തിയ ആഭ്യന്തര മന്ത്രി രമേശ് ചെന്നിത്തലയുടെ ഈ ജനകീയ ഇടപെടലിന് സജീവനും കുടുംബവും ഉള്‍പ്പെടെ ബസ്സിലുണ്ടായിരുന്ന എല്ലാ യാത്രക്കാരും ഹൃദയം നിറഞ്ഞ നന്ദി രേഖപ്പെടുത്തി.
തമിഴ്നാട്ടില്‍ ബസ് തകരാറിലായി യാത്രക്കാര്‍ കുടുങ്ങി,സമയം പുലര്‍ച്ചെയെന്നോ അര്‍ദ്ധരാത്രിയെന്നോ നോക്കാതെ അടിയന്തര സഹായവുമായി ആഭ്യന്തര മന്ത്രി രമേശ് ചെന്നിത്തല
Jaihind TV News Report
Jaihind TV Web Desk
Updated Oct 12, 2026
2 min read
276 reads
